عالمي الإفتراضي🌐💔

الحلقه الثالثه3️⃣✔

《عالمي الافتراضي🌐💔》

Lames monje✍🏻
#الحلقه الثالثه ✔3️⃣

تفاعلكم حبايبي❤ ماتنسوش التصويت عاد ❤
.
.
ماكنتش متعمده أنّي انحبك ، لاكن حُبك تعمدني ..
.
.
.
.

نرجعو لنادر ...🏬 في شركه
خشو لشركه والكل بدا يصبح ع نادر والكريم والكل محترمينه وبزيادة ركبو في الأسنسير وخشو قاعة الاجتماعات..لقو المندوب ورائيس شركه الي في ليبيا ووكرانيا ...وتناقشو وتفقو ان فيه تغيرات في روائسى الشركات بس مش توا ..تم الاجتماع وخش نادر لمكتبه ..
وكريم مشى لمكتبه لانه مايحبش يعامل او يحسس خوه كانه عاجز ...
شديت تلفوني لقيتها قابلتني ❤
واول منشور شفته مش عارف علاش انهزيت في داخلي بطريقه وكان انغميت ولا طعنوني بخنجر
《كم تمنيتهٌ أن يكون حلماً ..استيقظ يتلاشى كل شيء
صباحكم الله بما تشاءونا 》 تشعر باظلم😔
وياريت ماركزت وشفت كلمة ظلم 💔
حسيت بيها والله حسيت بكل حرف كتابته وكانها قاصدة انه توجعني اني ..💔ومازاد عليا تعليق واحد ما عرفت من بس ..
ربي يفرج عليك سيلو ولا يحرمني منك 😦
هني ركبت فيا نار ولسبب ماعرفتاش درت احزانني وعلقتلها ..
💬 لا يعلم الانسان ما الخير الدي يرزقه الله بعد الابتلاء فاصبر ف جزاء الصبر عظيم ..صباحك فل 🍁
....شوي هكي خش عليا كريم وفادي صاحبي
• كريم: شني كملت ولا مزال ..
• نادر : خيرك اللطف ساعة عقلك مقدمه راه كيف خشينا قاعد كيف فتحت الملفات..
• كريم : نمشو نفطرو ونجو
• أنا : لالا عندي شغل ..وشوي ونفتح الباب بنت تخدم معانا ومعروفه تحبني وتحاول تتقرب مني من قبل بس كنت خاطب فا نصد فيها لكن لما ...زادة قربت مني المهم نرجعولها..كانت لابسى جيمب سود ع اسود راسمه جسمها رسم وشعرها ديل حصان وفتحت صدرها قريب لصرتها😦
• فادي : احا 🤤😉والله وحلويت يا كيمو 😂
• كريم : لا والله الا انت الاسود الي ح ياكل منك حتة🤤 غر عطينا شوية بس وضربو ايديهم في بعض وضحكو
• أنا : احم احم تفضلي استادة ماريا
• كريم : الحق ياصاحبي واسمك ماريا وه هههه
• أنا : استاد كريم وفادي ب...
• كريم : طالعين بلا زران 😂😂وجو بيطلعو تلفت كريم للبنت لانها قاعدة واقفه ...ممكن النمبر يامقروض مخلط بعمبمر 😂
• أنا بصوت رجولي وجدي : كريمم..وحدفتهم بالبيرو
هربو زوز هههههههههه ضحكت ع منظرهم وهما يتجرو ويدفو في بعض 😂😂
• ماريا تضحك : جدا كيوت 😉
• أنا : احم احم اي خدمه استاذة ...وبدت تقرب ع اساس جايبة وراق ..
• ماريا بدلع : كنت عند المراجعه واخدت منهم الاوراق هدول مشان توقيع حظرتك لو ممكن ...وطبست عليا وانا نشبح في الوراق متعمدة باش نشبح فتحت صدرها 🙄
• أنا من تحت السنون : ممكن تجبدي روحك ال تالي شوي ع خاطر النفس .. وهي بصحت وجه ولا قالت نتحشم ..
• ماريا : ليش استادة وانا اش سويتلك ما أنا عم ورجيك مكان التوقيع وعم اشرحلك ..
• وخرت الكرسي ال تالي 🧐😠 : شن رايك تعدلي لسانك وتتكلمي ليبي وتجيبي ها وينا كرسي وخودي مكاني 😒😠
• ماريا تحشم بس قربت اكثروحطت ايدها ع لحيتي وقربت وجهها وعينها في عيني بصوت قريب للهمس : نادر انت تعرف كم ليا نحبك انت تعرف ان ليا مشاعر ليك علاش تحاول تبعد عليا وانا والله نحبك وما يهمني الي انت فيه معاق مش معاق مشاعري هما هما ارجوك تقبل تقربي ليك انا نساعدك في كل شيء حما ..
أول ما قالت معاق في داخلي ولعت نار الله وحده يعلمها وحسيتها وكانها تشفق عليا وخاص بعد ما بدات توصف في اعمالها..
بصوت عالي و جدا حاد دفيتها من عليا
• أنا : ابعدي عليا انا مانستناش في وحدة زايك تساعدني وحدة قريب بتبيع روحها وهي مبسوطه لو ليا مشاعر ليك وحق لا اله الا الله راه مسحتهم تي انتي مني باش تشفقي عليا نجيب عشرة زيك يتمنو رضاي ..
• ماريا : ههههه 😏اما عشرة الي هما وحدة منهم خطيبتك الي سيباتك بعد ما نشليت بالله ماضحكني انت ماتعرف لا مصلحتك ولا تعرف شيء احمد ربك وحدة بجمالي راضية تاخد واحد لولى خوه ماكان يقدر يجيب مياة لروحه هههه والله دمك خفيف ..
وبلا وعي جيت بنوض بنطربقلها كف يلخبطلها خليقتها بس خانوني رجليا وطحت ع الارض 💔 وجت بتساعدني قمت يدي 🤚🏼😔 برا من فضلك ووجهك معاتش نبي نشوفه في الشركه ..
• ماريا : ههههههه توا تندم علي دير فيه ابسط شيء شوف روحك بس
• أنا بصوت عالي : ومن قالك من ندمتش برااااااا ياحقيرة ..
• ماريا : طالعه طالعه ..وطلعت
ودموعي خانوني نهزيت من داخل وكأنا كيف سمعت ان اني نشليت 💔
حسيت كم عن جد اني كيف ما قالو معاق💔
وكان حد جاء وشوش في ودني (ألا بذكر الله تطمئن القلوب )مانعرفش علاش بس اول ما قولت يارب رحمتك حسيت بعزم وبديت نعاود يارب لا حوله ولا قوة الا بك وبديت نحاول نوقف على المكتب وجبدت الكرسي ورجعت قعمزت وخديت نفس ..شفت الساعه لقيتها ال 11:30 وما نعرفش علاش خطرت في بالي أسيل ممكن لانها عندها متحان قالت باه علاش انا مهتم ماهو زيها زاي الي قبلها وزي هلبا منها في المسنجر 💔
ولا شعوري فتحت المسنجر وبعثلها ...
《ان شاءالله تكوني جاوبنتي 📨》..
وفي نفس الوقت شافتها بس ما ردتش وين ايقنت ان فيها حاجه 💔😔
شوي هكي كلمت ماكس سواق متاعي باش ياخدني للعلاج الطبيعي ...مع 12 طلعت من الشركه وركبت السيارة رن تلفوني وكان مسنجر فرحه 😍 نحسبها أسيل ههه رديت طول
• أنا : صباح الحلو ع الحلاء كله ..😍
• امي : اشيه اشيه هدا كله ليا لا اليوم حالتك باهية بدون مانسال هههههههه
• أنا 😳😅: ااامي ههههه ملا شني انتي ست الحلوين كلهم هههه
• أمي : ايه رقع رقع ..شن الجديد الي خلاء وليدي كيف قبل ان شاءالله غر كنه تفرحني بيك😍❤
• أنا : كح كح كنت شني سمله اللطف برا وبعيد يام وينا وين الزواج قاعدين نبو نعيشو ولا قلقتي منا
• امي : لاه عليك ياولدي ريته ولا يبي يركبني العيب
• أنا : لا والله حشاك ياغالية انتي الخير والبركه ❤ كيفك وكيف حال بوي ❤
• أمي : اهو هذا نوتو في روحنا انا وخوتك بنمشو ل حوزتنا في زاوية دنيا مخضرة وريحت الترابه مستحشينها 😍
• أنا : سعدودكم والله يا يما والبكبوكه ع الحطب وعصبان اههه ريحته للعندي واصله جوعتيني ياغاليه ع صبح 😅😂🤤
• امي : خسا الجوع وانا امك تعالى والي في خاطرك نديرهولك غر تعالى بس سلم وليدي ليك اربع سنين ما ريتك ولا تبونا نجوك علاش هذا كله 💔😔
• أنا برتباك : ءء لان يا يما مانقعد في مكان كل يومين في بلاد والهند كبيرة اهو قريب ان شاءالله ننزل ونشوفكم
• أمي : حاظر سلم ولدي نبي نشوفك راني مريضه وبوك خايف عليك وانا قلبي مغموم
• أنا : الله لا يغمكم خاطر يام ماتخوفوني عليكم والله راني نشقى باش نوقف ع رجليا ..
• أمي : خيرهم رجليك وه عليا شن فيك ..
• أنا : يايام نتكلم ع اساس ع شركه يعني نبيها تخدم زيادة ودولار الي نازل طالع متعبني
• أمي : اه خوفتني ياولدي اهي ندى جت خود كلمها ..
• أنا : يما راني خدمه ومستعجله توا بعدين نكلمكم سلام توا ... وسكرت ..
عند أمي
• ندى : امي سكر راه خسارة كان في خاطري نهدرزله حاجات
• أمي : حبكت توا دكرتيها راهو من قبل راك درتيله تلفون خوك في الغربه وانتي لاهية ف ها الوليد وراجلك وناسية خوك الي في الغربه حولي من عليا انتي وهاتبوديع
• ندى : حرام عليك يام والله نشغلت بس 💔
عند نادر ..
وصلت للمركز ودخلت ع طول للكوتش ..وبدا فيا تمرينات والغريب كان اليوم فيا حاجه غريبه هوا عموما اليوم كله غريب ..
• الكوتش : اراك اليوم متحماس
• أنا : جدا اليوم بكامل قوتي أتمنى فقط أرجع كما كنت..
• الكوتش : وأنا أيضا اتمنى لك الصحه ولكن أشعر أن هذه الطاقه التي بك مصدره فتاة اليس كدالك
• أنا : هههههه انت بتاكيد ساحر دعني أكون صريح نعم فتاة بس لا اعلم هل هي التي اختارها قلبي ام أنا فقط معجب ...
• الكوتش : لا تهتم اجعل قلبك هوا من يهتم واعطي لعقلك بعض الراحه ههههه فلنبدا الان مع العلاج الجديد هل انت جاهز له
• انا : يس لاتس قو هههه ...بديت بتمرين واحدة وحدة قريب ساعه ومعاها ..وبعدين اوصلت لعلاج الابر هي عبارة عن ابر ينخصوها في اماكن العضلات وهم طبعا حديد بس وكانهم ضعيفات شوي لتوصيل الكهرباء باش ينشطو العظلات والاعصاب المهم دارهم في في رجليا زوز من تالي ل ظهري الفقرات الاخيرة عرفتوهم اما هما المهم ...
وبدا يوصل فيهم للكهرباء من تحت لفوق الي يضرب فيها ينحيها وحدة وحدة لين وصل ل منطقة الافخاد ع الجنب بديت نحس في وجع بس خفيف وكل مايزد يقرب يزيد يوجع ..
• الكوتش: اتشعر بشيء ..
• أنا بملل : نعم ..
• الكوتش : ولماذا لم تخبرني هذه اشارة مفرحه لم تفقد أعصاب الجزء السفلى
• أنا بفرح وعدم استوعاب😳😅: ممم ماذا تقول انت
• الكوتش : ستقف من قريبا ع قدميك فقط مساءلت وقت او فترة بسيطة و اجدك تتسابق معي
كنت منبطح ومن الفرحه لان قاعد فيا الاباري بديت نعيك ووووووووو الله اكبر الحمدالله ونزلو دموعي وع قد ما بكيت حسيت ان فعلا فرج الله قريب 😔 ودكرت حكمته ان الحمدالله هلبا موضيع صارو باش نكون نادر سالم مدير اكبر شركات في الهند وشمال افريقيا والمورد الاول لليبيا ❤ ...
ومر الوقت ووصلت ساعة 2 وجاني شوفير وروحت للحوش ❤
.
.
.
.
.
#عند أسيل
وانا في الامتحان نكتب ودموعي ينزلو لان حتي صوابعي يوجعو 💔 وكل ما قريب نكمل لمتحان ندكر الحوش نبدا نحاول نبطى شوي بس باش مانرجعش لهذاك الحوش 💔😔
ومر الوقت بطريق سريعة وكان ندعي بالعكس وطلعت انا وراما ...تلقينا مع فرح هههه
دكرتوها اما المحسدية هههههههه عكس اسمها طبعها خيه ع الاخر المهم...
• فرح : هاي صبايا كيفكم
• انا مرديتش ردت راما : الحمدالله كيفك انتي
• فرح : مية مية شني جاوبتو ولا كيفي
• انا بلا وعي : ع اساس انتي امتى جاوبتي
• فرح😅: اه اه كل حد ودماغه ماعندكش علاقه عاد مني اني اصلا الي وقفت عليكم ..
• راما : ماحد جابرك تسالي 😏
• فرح : اصلا فاضية كمشت حشرات 😏🤚🏼..ومشت
....
راما جت بتلحقها بتضربها بس شديتها في اخر لحظة هههههههه
• انا : وين ياحاجه ناوية تعرينا والله مافيا جهد لطريحه تانية هههههههههه
• راما : سيبين خلي نربيها ها سوسة المسوسة خزيه شكيلات ..
• أنا : احمدي ربك تشبحي فيهم غر في الجامعه والي يشوف فيهم ليل نهار شن يقول
• راما : لا هدوك ربي يكون في عونهم والموت عليهم حق 😂😂😂😂😂
• انا :😂😂تعرفي تفوه ع الي عرف بوك ع امك باش جابو مسخه زيك خزيه 😂😂حولي من عليا تراه ههه
• راما : والله نبصر ياحمارة وانتي ماتصدقي 😂
مشينا للكفتيريا 🍰🍷 باش نفطرو ونهدرزو
• أنا : هاكي الفلوس وبالله عليك اطلبيلي انتي وجيبلنا الفطور ..
• راما 😒: تبي نوكلك ولا تاكلي بروحك تي نوضي ناضت عليك فاطمه الغوله 😂😂😂
• أنا : وراس امك مافيا حيل لفاطمه اهو نوض معاك خزيه ...بالله اشبحيه كيف يخزر
• راما : من هوا وين وين ...
• انا : نقولك بس ماتتلفتيش طول
• راما : باه ..
• أنا : الي واقف بحدا سيراج في ايده شيشة ندى
وكاني قولتلها تلفتي 🤦🏻‍♀️🤷🏻‍♀️ معليش ماهو الوحد لما يكون حمار صعب يفهم بالكلام..لازم تشرح ع صبورة
• راما : ايه عرفته انتي من وين تعرفيه
• أنا : ياستي هذا دازلي طلب ليه قريب سنه وكل فترة ينحيه ويرجعه ومش غر ع فيس لالا الانستا والتويتر وتلقرام وما بعده من عطاه رقمي ودنيتي الله اعلم
• راما : ااااااي هذا كله وداسة عليا خزيه عليك ..
• أنا : مش داسة بس هذا الي صار مانحساب بنشوف ام وجهه هني هههه
• راما: اوقفي هني مدام نجيب الفطور ..ومشت
انا قلقت من الوقفة وصنت الزيت طلعت شوي نتمشى في ساحه في فم الكفتريا وفجاء زن طب ..يوقف عليا ..
اي وه الي جاء في بالكم
• سند : صباح الخير
• أنا : صباح النور 😏تفضل ..
• سند : يفضالك الخير بس ممكن طلب بسيط لان ماتجي الهدرزة ع الواقف
• أنا : بيني وبينك حاجه لا قدر الله باش نهدرز اني وانت اي خدمه احكي هني
• سند : تمام اهم شيء اعصابك بس يا بنت اني عاجبتيني من قبل وانا ندور وراك ول صراحه نبي نرتبط بيك ..
• أنا : سكتت ..
• سند : ردي يابنت شن جاوبك ولا نعتبرك موافقه
• أنا : أولا انا اسمي أسيل مش يا بنت ...تاني شي أعتقد في حوشنا باب تقدر تجي تخبط زاي ناس وتكلم بوي ..وكان تبي نبعثلك رقمه عادي ..ومشيت وسيبته واقف..بس
• سند : اسيل ..
تلفتت 😒
• سند : صدقيني غصبن عنك حاتكلميني وحاتجي لعندي تتمني رضي ومانرضى ..
• رجعتله وضحكت : هذا بٌعدك يا ولد 😏😉 لو تلحس السماء ماناخد واحد زيك 😏
ومشيت وسيبته وطلعت راما وفطرنا وهدرزنا ع كل شيء وقبل ما نطلع وصلولي ع الواتس من رقم غريب أنا وراما 😱😰
.
.
.
.
.
.
يتبع ❤
صلو ع النبي عليه افضل الصلاة والسلام