عالمي الإفتراضي🌐💔

الحلقه الاخير 1️⃣7️⃣

(عالمي الافتراضي 🌐)

للكاتبه Lames monje
الحلقه السابعه عشر 1️⃣7️⃣
.
.
.
هيا لعبة حظ
نسبة الخُذلان فيها كبيرة
لكن حتى الخسارة فيها ربح !
.
.
.
.
.
عند أسيل ❤
مع العشاء كنت ندوش طلعت صليت نحيت متعت الصلاة و قعمزت ع زيانه نجفف في شعري
رن المسنجر وكانت 😳 كوثر
في بداية ستغربة بس بعدين قلقة مانعرفش علاش فيسع تغير خوف وبدا قلبي يطلع وقعدو عيوني يتعبو دموع كيف نار ..جتني رساله منها..
《سيلو ردي ضروري 》
وين تاكدت ان فيه مصيبه 💔يارب اللطف في من خلقت كيف رتحت من الخوف والهم توا يجيني تاني ..
عاودة 📞
• انا : ايو
• كوثر بصوت باكي: كيف حالك اسيل ..
• أنا : الحمدالله خيرك ..
• كوثر : بنقولك بس مانعرفش كيف ..
• انا قعدت نرعش : شن فيه ادوي فيسع ..
• كوثر : بوي وجاد وماما دارو حادث 💔وقعدت تبكي ..تعاليلي يا اسيل راني بروحي ماحد معاي ياسيل ماما حالتها خطير
• انا خلاص وكان تربقت طبلت ودني وقعدت نسمع في صوتها بعيد...ياربي نجي نجيهم يارب يارب اعطي جاد القوة يارب ما توريني فيه شر ياربي صغير وبدو دموعي ينزلو كيف نار ...باه حالت بوي وجاد شني
• كوثر : جاد في غيبوبه يا اسيل وبوي عنده كسر في العمود الفقري ولا حاجه زاي هكي راني مافهمت يا اسيل ماعندي حد غيرك انتي واسمر تعالي يا سيلو بنموت بروحي
• أنا : باهي باه توا نحجز وننزل لليبيا كلمي اسمر ولا رشا تجيك ..
• كوثر : لالا مش حايجو ..
• انا : وعلاش توا اكيد ما سمعوش بس كيف رشا ما جتش
• كوثر : خالتي جت بس بناتها لا لان ماما تعركت معاهم 💔🤷🏻‍♀️ واسمر من لما ماجاش لعرسك قاله ماعندكش ولد حتي لجنازتك مش حانجي اعتبرني ميت..اسيل والله بوي طيب بس
• أنا : طيب باهي باه مش وقت الكلام هذا توا نكلمهم واكيد ان شاءالله يجوك ومايخلوك لين نجيكم.. وسكرنا
ومعاتش قدرت نكتم بكاي وبديت نبكي بس بصوت لدرجه كان نادر ف صاله سمعني جاء يجري وهوا يدف بالكرسي وفتح الباب ..
• نادر : خيرك سيلو ..شن فيك وبدا يقيم فيا ليه ..
• قمت راسي وانا نشهق وعيوني معبيات دموع : بوي يا نادر بوي ...
• نادر : وراسك اهدي خيرهم ...وقدت نصبلها في المياة هاكي اشربي ...وشربتها ونمسح في دموعها ..
• انا : امس في ليل جاد وامه وبوي كان ماشين لعرس نقلبت بيهم السيارة والي كان يسوق جاد يانادر جاد ياربي صبرني وقعدت نضرب في وجهي ياربي الا جاد ياربي فيا ولا فيه وقعدت زاي الي شغلت فيها نار ياحليلي ع وخي ياربي ما تكسرني بيه ياريت ما ختلطت بيه ياريت كرهتك كيف امك وقعدت نقز زاي البهلول ونحاول ناخد نفسي بس شكلي من الاعصاب ماباش يطلع والدموع مابطلو نزول وبديت نكح بس نفس هرب نشبح في نادر يضرب فيا ع ضهري ويفتحلي في بطم سوريتي ويدلك في صدري ...لين جاني النفس وشهقت مرة وحدة وطحت 💔
• نادر : لما شهقت وفتحت عيونها ع الاخر زي😳 زبطت انها جاها النفس ولما طاحت وين خلاص معاتش فهمت ولي زاد خوفني طلع من فمها حاجه بيضه😳 شن نديرلها وستغليت لحظة اغماءها وجريت جبت عطر وبديت نبخ في ايدي ونشممها ونمسح في فمها يارب ماتقصدني في هادي فيا وفي صاحتي فيها لا يارب ولما مافاقتش كان لازم نتصرف ومش وقت نكشف روحي ع طول كلمت كريم قولتله توا تكون عندي لازم ناخدها للمستشفى ..وجاني وقامها كريم 💔وكان اول موقف تمنيت مانشوفه مرتي حب عمري المفروض انا نقيمها نجري بيها وهي في حظني مش خوي 💔🤷🏻‍♂️بس الي مصبرني ان خلاص قريب بنقوللهم وتم المعانات ..ورفعناها للمستشفى وقالولنا عندها اعصاب وسكرها نزل هلبا والواضح انه تعرضت لضغط عصبي قوي عطينها ابرا وان شاءالله اصبح تفيق كويسه كنت طول الوقت ع اعصابي ..
• كريم بصوت عالي وبعصبيه: شن درتلها خليتها في الحال هادي يانادر البنت ماصدقنا ارتحت و ...
• نادر : مش مني ياراجل هادي
• كريم : مالا من من تي عندها غيرك معاها ..
• نادر : تي وطي حسك زفت ولا يطردونا توا من كوثر
• كريم : من كوثر ..
• نادر : اختها من بوها قالتلها ان خوها وبوها حالتهم خطيرة ..وهي نقهرت ان خوها تاعب
• كريم : يارب اللطف فيها صبرها غربه ..بس وشبحلي ..
• نادر : ماتقول بس نعرف شن بتقول ..ونزل...راسه لو طلبت حا نخليها تمشي ..
• كريم : وكان ما رجعتش وهربت منك كيف حادير ...
• نادر بلع ريقه : حنعطيلها التقة ..في نهاية بوها وخوها شني حانحبسها
• كريم : ربك يستر ..
• نادر طلعت وانا في داخلي نقول يارب ما تكسريني يا اسيل
#ثاني يوم 🌻
فقت وحسيت راسي اثقل من رصاص شن فيه وين انا فتحت عيوني قابلني كريم راقد ع صالو ورجليه ع الطاولة والواضح راقد وهوا صقعان تلفتت يسار بنجبد ايدي قمت راسي لقيت نادر حاط راسه ع ايدي وراقد 😯 جبدتها وكان ضربه فيه الشمس 🤩 شعره يلمع نازل ع وجهه ونقول سبحان من خلق ها رموش الي ناعسات وزينه بها لحيه الخفيفه 💔 قعدت نمس فيها ودموعي ينزلو ..زعما بيحن عليا وبيسيبني نمشي ل جاد زعما لما نوصل غادي نرجعله ولا لا
.
.
.
.
.
.
يتبع
.
.
..
نبصر تعالو جاي هههههخهخهههههه مزال وين ماشين متتحملوش البصارة 😱😂😂..
...
كنت سارحه فيه زعما يهون عليا ومعاتش نرجعلك 💔
بس ...لين فاق وفتح عيونه وكانو لا فهمتهم عسليات ولا خضر وكان عاكس فيهم الرموش واول ما فاق ..شد يدي وباسها ...
• نادر : خوفتيني عليك ..
• انا : صباح الخير ياحلو 😢 ونزلو الدموع مانعرفش علاش
• نادر : باه وعلاش الدموع توا 😢ولا حلاوتي غرتي منها ياشينه
• انا ضحكت ونمسح في دموعي : انا شينه ..وقلبت شفايفي😖..
• نادر : لالا ..وقرصتها ع خدها..احلا شينه في دنيا 😊😂 ..شن تحسي حبي ...
• كريم بصوت بنواتي : نحس اني نموت فيك ياعمري
• انا تلفتت ليه : هههههههههههههههه ناس تقول صباح الخير
• كريم : انتم خليتو فيها خير الواحد ما سد سنقل وفي غربه وياريت غربه زاي الناس في الهند الي ما تشبح كان في شعر اسو وعيون مش مفهومات مفتوحا ولا مسكرا ...
• نادر : خزيه يامحسدي .. ورجعت نشوف لي اسيل ..بجد شن تحسي شوي ويجي الدكتور يشوفك ..
• انا : الجمدالله بس نبي نطلع يانادر ..نبي ..قطع عليا
• نادر : طيارتك مع العصر وان شاءالله كان كتبلك الخروج ناخدوك للحوش وياخدك كريم
• كريم 😳
• نادر : ايه ايه ماتشبحليش هكي بتاخدها وبترجعلي
• كريم : عينك تعرفها تي شني تحسابني تي راهو 8ساعات راه مش شوي ..
• أنا : نادر تحكي جد ولا تساير فيا بتخليني نرجع لليبيا ...
• نادر وبلع ريقه وبتسم : ايه خوك وبوك واختك محتاجينك وانا مش حانحرمك منهم ..
• انا : ماتخافش ان...
• نادر : اطلق الشيء واعطيه حريته اد رجع لك كان ملكك وإن رحل فهو في الاساس لم يكون لك😊 وهادي قناعتي وانا عندي اهم شيء راحتك وانتي تعرفي قداش نحبك ❤ومش حانجبرك انك تقعدي غصبن عنك 💔🤷🏻‍♂️
• انا بفرحه : شكرا نادر والله ..
• نادر : ماتقولي وتعطيني وعود وانتي فرحانه ❤ وربي يفرج كرب عمي وجاد وينوضو باصحتهم ..
• انا قلبي وجعني : يارب ..وجاني دكتور وعطاني الاذن بالخروج ..وطول الطريق وانا بين فرحه وخوف ان بجد لما نوب غادي معاتش نقدر نرجع 💔🤷🏻‍♀️
• نادر كنت نوصل فيها ونجامل فيها بس في داخلي نار بتحرقني حرق لين حسيت بوجع في قلبي وتمنيت نعيط ونمنعها بس في الاخير الحب مش بالغصب ولو حبتني حتي شوي حاتقدر ترجع ودرتلها تدكرت الدهاب والعودة لو حبت ترجع ..
• اسيل كنت نجهز في شنطي وحطيت هلبا حوايج بس خليت اكثر مش عارفه علاش بس المهم وكانت راما ع الخط...
• راما : يعني انتي حا تجي لليبيا ..ونادر..
• انا : نادر مايقدرش ينزل لان امه ما تعرفش ..وحسيته عطيني ثيقه خايف ...ان مش حنرجع ... جت في ودن نادر ..فجاة انفتح الباب ..
• انا : عندك هلبا هني ..
• نادر كنت جايبلها جوازها وتدكرة وحسيتها تتكلم في تلفون وسمعتها تقول ان مش حانرجع 💔معقوله يا اسيل تسبيني رغم كل شيء معاتش عرفت نقدم ونعطيها باش تهرب مني للابد ولا نخليها ونحرمها و...قررت نعطيها والي مايبيني ما نبيه وتمت عندها حريه الختيار وفي الاخيار العودة بعد 20يوم وبعدها حا نقرر لو رجعت نكملو ولا لا معنها قصتنا كملت 💔🤷🏻‍♂️
• نادر بجفاف : اهو جوازك و تدكرة واهو فلوس صرفتهم اخر مرة بس مانزلت بعدها مديتلها شنطا صغيرة هاك خوديهم مرات تحتاجي حاجه ..
• انا : شن هادي ..
• نادر : فلوس وما تقوليلي عندي ولا مانبيش في الاخير انا زوجك حتي ع الاوراق ..
• انا : لالا مانبيهم ..
• نادر عقد حواجبه : قولت خوديهم ..وطلعت .. ورجعت ااا ع فكرة كلمت اسمر انه يستقبلك في المطار لان كريم قال عنده ما يدير فا مش يقدر يمشي معاك ..
• انا : تمام عادي عادي ...
جهزت شنطي ولبست وخدانا ماكس وجنبه نادر للمطار ..ووصلني نادر لين بوابت المغادرة ...
• نادر : اسيل ..
• انا تلفتت : نعم
• نادر : ربي يشفيهم ويطمنك عليهم ..طمنينا
• أنا : حاظر ..
• نادر : ربي يوصلك ع خير ..
• انا جيت بنمشي ورجعت وضميت نادر وبسته ع خده ..ومشيت
• نادر بصوت عالي : أسييييل..تلفتت...دكري حانستناك نحبك🤷🏻‍♂️
• أنا كانه ضربني بخنجر في قلبي لما سمعت كلامه وبدا قلبي يدق وحسيت حاجه في داخلي تقولي أسيل ردي بالك راك تغدري 💔🤷🏻‍♀️ وركبت الطايرة ..وفوضت امري ل ربي لعله يرتبلي حياتي 💔
.
.
.
...
عند راما ورشا كانو يتكلمو ع تلفون ..
• رشا : شني صار في اسيل بتجي لبوها ولا بتفوته ..
• راما : كان انا في مكانه والله مانجي يموت ولا ينحرق بس هي قالت ع الاقل ع خاطر جاد هو الي حارقها..
• رشا : ايه صح انا جادو حبيبي ما وجعني غيره مش زاي خالتي والله قلبه حليب مايستاهل ..
• راما : سبحان الله ماتقولي خو كوثر الشلال ..
• رشا : هي من قاللها ل أسيل ع بوها ..
• راما : تخيلي من ...كوثر
• رشا : هدا ماتدكرها كان في المصايب ..
• راما : شن انتو ماشيتوش انتي وروان ..
• رشا : لالا بس امتى تجي اسيل حانمشيلها ..
• راما : لكن عيب عليك في نهاية خالتك اخت امك في العناية بين الحياة والموت وبنت خالتك صغيرة بروحها الواحد مرات تيصر الحاجات هادي باش تهدى النفوس مش تزيدي تسوديها ..
• رشا : عندك علم حسيت تصرفي غلط بس نفكر بالك نمشي
• راما : امشي امشي الموضوع مش محتاج تفكير
• رشا : باهي خلاص وانتي تزني بنمشي بس مش توا دنيا ليل ...
• راما : مني اني الي ننصح فيك 😂😂اقلبي ..
وسكرنا ..
.
.
..
..
...
....
#تسريع في الاحداث
بعد مرور 15يوم ...وصلت أسيل وكانت قاعدة في حوش بوها وطول الفترة اسمر ماشي جاي وكانت رشا واسمر يتمعشقو 💔 وجان تحسن وناض من الغيبوبه بس رجل مجبسة والايد وروحنا بيه بعد الحادث بسبوع بس بوي قاعدة حالته ما طمن لان ضربه كلها جت من جهته هوا ومضرر هلبا اما مرت بوي فا الضربه جتها ع راس ونتيجه الضربه هادي تشكلت كتلة ع المخ فا ضغطت ع الاعصاب وفا ضربتلها العصب البصري والعصب السابع والحركه 💔يعني موت بطي يارب ..راما كانت تجري ع بتاتها ..واسمر مقرر انه لو ناضو ع خير حايطلع بالعرس طول ...نادر ماحب يضايق اسيل بالاسئله وينك وحا تروحي او لا بس قرر انه مايكلمه الا مرة وحدة سئلها ع حال بوها وتحمدا ليها ع سلامت جاد وطبعا هي ما ردت لانها اصلا ما فضت لتلفونها لانها كانت مهتما بالكامل ب جاد ...وكوثر كانت متغيرة جدا وسبب مش مفهوم 💔🤷🏻‍♀️
• هانم : ارتاحي يابنتي خوك راقد مايبي شيء وانتي من امتى ما طلع وانتي مرتحتي ..
• انا : مانبي يحتاج شيء ياخالتي
• هانم : يحتاج وانتي موجودة بس اتاحي وانتي رايحه قريب بتموتي لا تاكلي لا تشربي ..
• انا : لا عادي ..وحسيت روحي بنرجع وحطيت يدي ع فمي وجري ع الحمام
• هانم جت وراي بطاست مية : خيرك يابنتي شن فيك ..
• انا : اه اه حسيت روحي بطلع من فمي وفجاء غمت عليا وحسيت روحي بنرجع ..
• هانم : بالك ااا...
• انا : لالا قاعدة عليا ...وفي خاطري من شني بالله
• هانم : معنها من قلت الماكله والاعصاب ..ماهو قولتك سلم بنتي اهو نديرلك رز مبكبك تاكليه يشد ..
• انا : ع راحتك خالتي بس ماتعبني روحك
• هانم : تعبك راحه في نهاية كيف بنتي اهو نص ساعه ويكون واتي
• طلعت من الحمام : بارك الله فيك ياخالتي ورجعت شفت جاد وطمنت عليه
• كوثر : اسيل ممكن شويه ..
• انا : هي لحظة بس ..ومشيتلها ..نعم
• كوثر بدت تبكي : سامحيني يا أسيل والله لو وحدة غيرك ماكاانت سمعتني ولا جتنا وفوقها تهتمي با جاد..قاطعتها..
• انا :جاد من البداية مش زعلانه منه بس ...وتفجاءة انها نزلت ع رجليها ع رجليها وتبكي ..
• كوثر : اسفه والله ماكنت نعرفك هكي ..
• انا : شن فيه كوثر ..ماتقنعنيش انك المحبه نزلت عليك فجاة
• كوثر سكتت ورجعت قعمزت ع سريرها ..
• انا : ماهو نعرفك مدايرة مصيبه احكي شن هيا
• كوثر : يعني تساعديني..
• انا : لو عندي كيف اكيد..
• كوثر : انا كنت نحب واحد وكونا علاقه قريب 3سنين بس كونا زاي اي ثنين نكلم فيه ونهدرزو ونتلاقو ونب
• انا : وطبعا صور وسكايبي..
• كوثر : س س سكايبي من قالك انتي ..
• انا : معندكش علاقه المهم عرفت..لخصي شني فيه
• كوثر : قاعد يهدد فيا بإفيديو كان مسجله لما نفتحو في سكايبي ونحكو 🔞😱وقالي بأحرش ل أسمر وقالي حانقوله وحنديرلك مشكله كان ما تطلعي معاي وقالي انه مدام بوك مريض وامك اطلعي معاي ع اساس مش حاينتبه حد..قطعتها بكف..
• أنا : لما البنت تكون مش متربية حا دير اكثر من هكي بس حسابك مش توا حسابك بعدين قوليلي اسمه ومن هوا ..
• كوثر : نقولك بس ماتقولي لحد ..
• انا : ع اساس تخافي ..قولي
• كوثر : سند 🤷🏻‍♀️😧
• انا : ولد خالك 😱
• كوثر : ايه ..وخبط باب دار كوثر ...من ..نفتح
• خالتي هانم : تعالو خالكم وولده وسميرة يبو يسلمو عليكم ..
كوثر شبحتلي وطلعنا ليهم ..
انا اول ما شفته😠 ما تحملتش وع طول مشيتله جري وع طول عطيته بوكس لين فمه نزل دم رجعلي جاء بيضربني شده بوه شن دير انت علاش يابنتي ..
• انا : الحقير الكلب المنحط كان يكلم في كوثر وضاحك عليها ومصورها وهلبا حاجات الحقير وقاعد يهدد فيها باش تطلع معاه واقتعد كان نتكلم اكثر من هكي حانطيح قدر الكبار ..قربت خالتي هانم ليه وعطاته كف ..ياقليل الادب يا حيوان ما كتفيت من رشا لو لا ستر ربي راهو ضيعتها وحبيت تخرب حتي بنت فاطمه تي خيرك انت من اي طينه انت يا وسخ وبدت دف فيه اطلع برا اطلع وامه كانت دافع عليه بس بدون ماتتكلم بس داري عليه من ضرب بس خو هانم كان كانه مصدوم ..
• هانم بصوت عالي : جيبي طاسه ميه ل خالك فيسع
قعمز خالهم وكانه سمع خبر وفاة حد ..
• سمير : علاش ياهانم
• هانم : شن تبي نقولك ترا ..
• سمير : راك قولتيلي راه عرفت نتصرف مع هذا الكلب بس حسابه معاي ..
• هانم : ماتحرقش دمك بس صحتك ياخوي وماتنساش القلب وضغط الي عندك وولدك توا يعرف كبر عملته بعد ما نكشف قدامنا ..
• سمير : وتوا نوريه حتي انا ...وطلع..
ومشت هانم لكوثر وزدتلها كف وعطلها طريحه نباش القبور ماخداها هههههه ودخلتها لدار..وقالتلها توا نوريك ..
المهم فات اليوم واحني ع اعصابنا لين جت الساعه 4في ليل رن تلفوني لقيته اسمر رعشت مع بعضي وقلب قريب وقف💔😱يارب استر ..
• انا بصوت ناعس وخوف: الوو
• اسمر بصوت واضح باكي : الوو اسيل ..كيفك
• انا : تمام شن فيه ..
• أسمر : نوضي خالتي وقوليلها تفتح الحوش بوك عطاك عمره سامحيه يا اسيل طلب السماح ياسيل سامحيه ...
• انا عيطت ووووووووه ع بوي ووووه ومشيت نوضت خالتي وقولتلها وبدت تعيط وناض جاد من رعشا قريب نزل ع رجله كلم اسمر وجاء خداه وبدو الجيران يخشو وانا حالتي يعلم بيها ربي ...وجت عميمه جميله ونرجس وندى 💔وبكيت مش ع بوي بس بكيت ان علاش كنت هكي 💔معاي ومع ولدك وكنت نتمنى نبكي ان حانفقدك بس الله يسامحك ويرحمك ..
#مرو ثلاث ايام العزة وتحسنت حالة مرت بوي بس للاسف بدت لا تشوف ولا تتحرك 💔
مش عرافه كيف نوصفلكم منظرها كان يقطع القلب بس
كان وجهها ماشي جهة الايمين وعين وحدة تسكرت بكل ايديها ع حجرها ماتقدر تقيمهم وهي شادينها ل تالي باش ماطيح القدام 💔 ربي يلطف بينا
هو مش مشمتا بس لما شفتهت نفس الوقت دكرت انها هي الي تبلت ع اولاد ايتامه صغار كيف غاب عليها عقاب ربي و يهون ع قلبي ..
وناس الي يخش يشبحلها ويشفق عليها وطبعا ماكانت تاكل بروحها مرو كم يوم تقريبا 6ايام 💔 روحت خالتي هانم ضم حوشها عندها هلبا ماشافت لا رجلها ولا حوش قالت نمشي ونجي..ولصدفه عطلت وجاء وقت تغيرت شمالها 💔😢وبدت تبكي فاطمه ..خشيت صدفه الدار كانت عافنه بطريقه غريبه سمرت خشمي وجتلها
• فاطمه : من هنا حد يناديلي كوثر ولا هانم ..هاهاها تبكي من هني الي يسمع فيا يناديلي حد من الحوش..
• انا : خيرك يا مرت بوي تبي حاجه ..قعدت تبكي ماقدرت تتكلم .. شن هاريحه افف
• فاطمه : أنا انا درتها تحتي وين هانم وين كوثر حد يجي يغيرلي تحشمت من الناس ..
• انا قلبي ماعطاني وفي الاخير الواحد يعمل بأصله ودنيا دور : اهو نغيرلك شوي ونجي ..
• فاطمه : لالا ضبحيلي ع هانم ولا كوثر ..
• أنا : ما تسكريش راسك يامرت بوي كوثر مش حاتقدر البنت صغيرة وحرام عليك البنت ماتعرفش عطيني الاذن وان شاءالله مانقصر ...زادت تبكي ومابين بكاه بدت تقول ..يارب سامحني أسيل يا بنتي سامحيني كنت معمية وربي عماني حق كيف ما نعميت ع حق ربي فيكم سامحيني ...
مارديتش عليها لان ليش الكدب مانقدرش نسامحها دمرتني ودمرت مستقبلي كنت حانولي دكتورة وخوي متربي في حوش عيله خلاته يعيش وكانه مقطوع من شجرة وفعلا سايستها وشوي شوي نظفتها وغيرتلها وفتحت الدار تتهوى وجبت البخور وقعدت نبخر في دار وعطرتها هي ...
• فاطمه : نظف عرضك سامحيني وبارك الله فيك..
• انا قبل ما نطلع : الله يسامحك أنا سامحتك ونزلو دموعي دكرت أيه من كلام ربي (فاعفوا واصفحوا حتى يأتي الله بأمره)..
وطلعت وفي داخلي رتحت جدا وحسيت ان ربي نصرني وخديت حقي من كل من ظلمني وخشيت للحمام توضيت وجبدت لابست الصلاة صليت العشاء ..وفي كل ركعه نبكي لان ربي ما نسى حق وقت الي انا نسيته وقت الي سكتت عليه ووكلت امري ليه الف حمد ليك يارب وخسى بالله ان يكونا نسيا ..
وحسيت روحي تعبت حطيت راسي ع صلاية وغفت عيني ..وكان نادر فتح الباب وخشلي ينوض فيا أسيل هي نوضي بنتك تبيك وجت من وراه بنته وشكلها فيها مني هلبا تجي تجري وتقولي ماما ونقزت في حظني ..نخلعت نضت لقيت رشا تنوض فيا ..
• رشا : خيرك اللطف راقدة ع صلاية نوضي ارقدي ع سرير سلم خيتي وتلفونك من مبكري يرن ماعرفت لا نفتحه ها رمز الي درتيه ..
• انا : والله ماحسيت بروحي تخيلي ..
• رشا : طبعا طول الايام الي فاتت وانتي تجري امتى بترتاحي ارقدي شوي ..
• انا : كوثر وين امك جت..
• رشا : ايه جت وكوثر عندها غدوا امتحان قاعدة في دارها تقرا ..
• انا : باهي مش عيب نرقد وانتي هني ..
• رشا : نوضي كان بتنوضي ما جابك لها الحال كان عيب وبابخه ونتحشم نوضي ارقدي مانبي خليقتك انا بنهدرز ع حبيبي 😋😜
• انا : خزيه راعي شعوري شوي ..
• رشا: انتي الي ماتبيش تروحي لراجلك نوضي درتي العار يزيلك قاعد توا ليك قريب سبوعين ولا ثلاث خلاص العزا تم وعرس خوك تاجل لبعد ثلاث شهور يعني ممكن مع سلفك فا روحي..
• انا : خيرك انتي فيسع قلقتي مني تي بوي كيف سكر سبوع وين بنروح..
• رشا : تي مش هكي بس عندك علم حرام تهجري راجلك ليك كم يوم هني لا شبحتك تكلمتي تلفون لا نشتي عليه لا هوا حتي جاء ..
• انا : باهي باه توا نشوف ...طلعت رشا قعدت نفكر شوي وعاود رن تلفوني ❤ نادر ..فتحت الخط
• انا : الو
• نادر : ستحشتك 💔 حاولت اني مانتصل بس وربي ماتحملت ..
• انا : بعد غدوا مروحه ..
• نادر : ش شني ..
• أنا : معاتش نقدر نقعد بلاك حاولت نقنع روحي انك كدبة عليا ولازم نعاقبك باني نسيبك بس حسيت ان بنسيب روحي ع سبب كانت حاجه لو انقالت مش حاضرني 💔 نادر ..
• نادر : عيونه ..ياروحه ..ياكل نادر..
• انا : نحبك يا عالمي الافتراضي والواقعي وكل شيء ❤
...........
#ومر_الوقت_بسرعه
وروحت وانصدمت امتى ستقبلني وهوا واقف ع رجليه ❤🤷🏻‍♂️ وكانت اول ضم ليا ليه وهوا واقف واقف ع رجليه قامني وقعد يدور بيا ❤ ونزل ع رجليه قالي تقبلي تتزوجيني مرة تانية ❤ هزيت براسي وانا دموعي معاتش نقدر نشدهم قعدو كل المطار يصفقو ويصورو ههههههه ..روحت معاه وكان قريب بيطير والاغاني تخبط وانا بنموت من الفرحه بس نزلني ع سنتر كبير ستغربت طلعولي اربعه صنيات ولا هنديات وجبدوني من سيارة كانهم بيخطفوني وانا نشبح وراي لقيته يلوح بايده بمعنى باي 😜😂
وطلع السنتر تجميلي خشيت ل ساونا ودارولي جلسات تجملية وانا قاعدة حتي راحه ما رتحت بس نسيت ال 8ساعه ونسيت ان بوي مات ونسيت انا من اصلا ومع الدلع الي يدرولي فيه وين ضعت مرة وحدة هههههههه ولا أميرة في اياماتها بعد ما كملولي الحاجات تابعات الجسم دارولي مكياج ودارولي تسريحه بسيطة وصدمتي امتى جابولي فيلو ❤ خيالي كان كانه قفاطين الاميرات متع زمان خفيف سنبل طويلي شوي منفوخ عاري من ضهر بس ومن قدام شفاف وكله مخدوم بلولي ❤...وطرحه طوووويله تهبل ❤ ولبسولي طاقم والواضح كان الماس وقعدت نصور لين رن المسنجر بحكم ماعنديش شريحه كان هوا ❤ونفسهم فتحولي الباب لبسوني كانه برنوس بس قصير كان كستاني ❤🥰 وطلعت لقيتها واقف لابس بدله رسمية سوداء ومرسات ثلاث سيارات فلاتشتهم والعه..كانت وحدة لكريم وفادي وسيارة العريس مزينه طبعا ...وباس راسي قدامهم كلهم قعدو يزفرو وكريم يزغرط ههههههههههههه وركبنا وع طول ل حوشنا ❤ ودارو العاب نارية وجو مش عادي وركبنا لدارنا 🥰
كانت مزينه وشموع وجو مش طبيعي خشيت انا الاولى وبعدها نادر وسكر الباب كان قلبي بيوقف 😖😊
تلفتت
• نادر : الف مبروك يامرتي شرعى وقانونا ❤
• انا : الله يبارك فيك حبيبي..
• نادر : شني شني عوديها وراسك ..وقعد يقرب مني
• انا : ح ح حبيبي وجيت بنهرب منه 😜شدني ولصقني فيه وقالي ..حصلتي ع خير ...نادر وراسك خليني نغير ع الاقل ..
• نادر : انا نغيرلك و......خلاص عاد عيب 🔞😋❤
سعدودها 😂😂
.
.
..
.
.
.
.
..
بعد شهرين بضبط ..
• كريم : هيا وانتو ساعه ...
• نادر : نزلنا وانت تنق ...
• كريم : ماهو ماسمعتش نعمان قداش سبني لان ماشين ع سبوع عرسه بزبط ..
• نادر : خالي يمبح وانت ماقولتلهمش ع ان رجعت نمشي ولا
• كريم : لالا غر هي سقد المدام..
• نادر : هي هي اسيل هي اطلعي كريم بينجلط..
• انا وانا طالعه من الحمام : هي هي غر معدتي توجع ..وكنت نرجع نحس في نفسي غامه عليا ..
• نادر : ناخدك لدكتور بالك اعصاب معدة ..ولا حاجه قبل ما نمشو للمطار ..
• انا : لالالا ماهو...ودرت ايدي ع بطني 🤰 فيه نادر صغيرون بيجي ع طريق 😂😉
• نادر : قصدك اااا..
• انا : هزيت راسي بمعنى ايه ههههه
قعد ايعيط ويبوس فيا الله واكبر بنولي اب ياروروري هييييه باهي هي هي بس بشوية خالي نمشو ...
.
.
.
.
...
....

.....

...
#وبعد مرور عامين ..
اول شي مرت بوي توفت 💔
رشا واسمر تزوجو وعندهم بنوتا مسمينها ع عمتها أسيل ❤ ورشا حامل ثاني ❤ في شهر الثالث..
وليل نهار غيرة اسمر قريب بيقتل رشا من حبه فيها حتي اسيل نسخه من امها ❤
.......
نٌعمان وراما جابو تؤام ولاد يامن ويزن ...وطبعا نٌعمان يلخبط فيهم وطلعو شياطين كيف امهم قريب بيهبل نعمان منهم وراما مقرر مش حاتجيب ثاني لين يسكرو اربعه سنين لان تعبت فيهم هلبا ❤ بس عايشين في حياة رومانسية وسعيدة ❤
........
جيت في ختام ...
أنا ونادر اول حملي حملت با ثلاث بنات 😉😂 وجبتهم في سابع قريب متت لولا لطف ربي وزوز طلعو نفس بوهم بس الثانيه يقولو نسخه كريم يعني اني طلعت منها بوجاع وخلاص وطبعا قالي مش حانوقف هههه وفعلا توا حامل ويستر الله قاعدة في الاشهر الاولى ❤
عايشه في الهند وساكن معانا كريم اااا نسيت نقولكم ...
كريم تزوج وتخيلو من ههههه تزوج كوثر من شهور قاعدين عرسان جدد وقريب بتشيبه ساعه يتعاكو وساعه تكبسهم يبسو ويناشبو في بعض ههههههه❤🤷🏻‍♀️
....
وجاد تخرج وقرر يكمل في مجال الطياران وحاليا كل فترة نتلاقو في تركيا ❤ لان مايقدرش يجي ل هند
..... .
..........
الخاتمه
سامحوني عطلت عليكم بس لان كانت الاحداث هلبا ❤
وان شاءالله ما تكون ع قد انتظاركم وتعجبكم ❤
.....
نصيحه
عمرك ما تجبري حد ع ان يحبك خليك واضح/ه لان الي يحبك ل مال ولا جمال سيوره يكمل لازم يحبك لداتك ل روحك لان في نهاية هادي الي حا دوم ❤
....
ياداير يا لاقي عمرك ماتنسي ان الي بديريه سواء خير ولا شر بيجي يوم ويرجعلك ويجيك بنفس الوجع او كمية الفرح ❤
.......
عمرك ماتسلمي رقبتك لولد بصورك وحافضي ع شرفك مش كل مرة تسلم الجرا وعمرك ما يغرك الكلام المعسل ❤
.......
خودي كل شيء بحكمه الي يصير معاك اسباب يرتبها ربي بس باش ياخدك لطريق صحيح فا احمدي ربك ديما ❤