شيخ ابو الاكبر

بدايه المشاكل

كنت طالع للمصنع واخوي كان وياي خلصنه شغل راجعين بالسياره سمعت رنة جهازي فتحت خط وكان عمي حازم وصوته تعبان واكو هوسه يمه مفهمت منه اي شي بس كلي تعال لبيتي هسه .اني كنت خايف خاف صار عليه شي رحت اني وعباس شفت مرت عمي تبجي وعمي منهار كلش ردت افهم السالفه وعمي بده يحجي
-شيخ ابني راح من اديه وماعرف شنو اسوي
-عمي هدي ان شاء الله ماكو شي بس اريد افهم شنو السالفه
-بويه قاسم تدري ماعندي بالدنيه غير هالولد الوحيد واخته ليلى الولداني خربته دللته دلال زايد وهسه ضاع من ايدي
-عمي فدوه القلبك بس فهمني محمد شبي شنو طايح بسالفه جايده حته نكدر نحلها
-شيخ بويه الولد مختفي صار يومين ماعرف وينه قبل كم يوم شفته وي ناس ماعرفهم بس شكلهم مايطمن اخر فتره حيل تغير صار يطلب فلوس ويصرف هواي وميكلي وين وداهن حته تلفونه غيره وتعارك ويانه وطلع ماكو اي خبر عنه هسه قبل لا اتصل بيك خابرني ولد كلي ابنك يتعاطه وهوه هسه باربيل ساعدني بعد عمك الولد ضاع ماعرف شنو اسوي كلت بلكي تدلني عله حل
-ابشر عمي هسه اذز ناس الاربيل يجيبونه وان شاء الله خير
طمنت عمي ورجعت للبيت سلمت واجت فاطمه كتلها تحضرلنه لكمه وصعدت سبحت وبدلت ملابسي ونزلت اكلت وكعدت وي الاهل سوالف وضحك بس الاكبر ماهوه سالت عنه كالو اجه ونام لان امتحان باجر عنده وبعدها كل واحد راح الغرفته واني بقيت افكر بسالفت ابن عمي لحد ما نمت
ثاني يوم اجاني خبر من جبار صديقي الي كلفته يشوف اخبار محمد كلي لكيناه بس الولد متورط بسالفه وي جماعته كتله يحاول يجيبه للناصريه وتنحل .. طلعت لشغلي والتهيت العصر بسوالف المشيخه والعشاير واجاني اتصال من جبار كلي محمد بالمستشفى مال اربيل ومضروب ضربة موت لو تلحكه لو متلحكه اخذت امه وعمي الو محمد واخوتي علي وعباس وطلعنه لاربيل ويانه جماعتنه يمكن قبطنه ٤ سيارات وعمامي همات لحكونه دخلنه المستشفى بليل الدنيا مكلوبه حاجينه الدكتور كال الولد مالحكناه توفه لان ماخذ جرعه ونزف دم هواي اجه جبار كلي الولد الضاربه موجود اجتي عمتي كامت تعيط اريد دم بدم الزلم كلها ثارت صحت عله جعفر ابن عمي
-جعفر روح اعرفلي عشيرته وره الفاتحه نكعد عشاير
-امرك شيخ
رجعنه للناصريه والكل ضلو يحضرون للفاتحه وعمي كل شوي يتخربط ويوكع بعد الفاتحه رحنه اهل ولد من بغداد وكعدنه جاانو زلمنه كلها دمها حار ويفور يردون ياكلون الناس وصار العياط وماوصلنه الحل وعمي هم وكع وخذو للمستشفي طلعو جماعتنه اجه جعفر يمي كلي
-شيخ عرفت السالفه من ولد صديق محمد
-كول شنو صاير وخله ابنهم يكتل ابنه
-شيخ السالفه بدت من محمد شاف وحده ولحكها للكليه ومن صايحه عليه متجمعين الناس عليه وابنهم اسمه علي شايف الوضع فتعارك وي محمد ودافعه وكع عله راسه ومات والولد جان رايح علمود اخته هناك هذا كل الي عرفته
-زين خلي نحاول نشوف حل وهم نبعد عمي عن الهوسه هاي اي يتعب
-امرك شيخ
كعدنه ابغداد وكلساع عمامي الهم راي وابو محمد كلبه نار عله ابنه ويصيح دم بدم كالو اخر كعده هاي النه وياهم لازم نحلها رحنه عليهم وهم ساعه عياط ساعه يهدون اني احاول اوصل الحل يرضي الطرفين لان ابنه هم غلطان بس ميصير اوكف ضد اهلي وعمامي صاح ابو محمد
-شيخ ابو الاكبر اني مااتنازل عن دم ابني اريد حك ابني
حجه شيخهم
-يعني راح نفتح عله العشاير سلسله دم مايوكف
-الحل نفصل اكو غيرها
-شيخنه ابني مايتعوض بمال ولو يردون اشتري الدنيه وانت تدري ماعايزين فلوس والناصريه تشهد علينه
-والنعم منكم ومن شيخكم بس يبو محمد ابنه هم عزيز شلون ننطي للموت
جان واحد من شيوخهم  جاي حته يدخل ويحاول يحلها ويكون طباب خير كال
-ماكو غير الفصليه
-شيخ شتحجي شلون ننطي بتنه فصليه
كلها ايدت الراي كتلهم
-خلص الراي لبو محمد هوه يكول واعتقد عمي اله حك لان فصل دم ابنه بس عمي انت ماعندك ولد شراح تكول رد عليهم
جنت اتوقع يرفض لان المن ينطيها وبعدين ظلم دتكبر السالفه بس صار العكس
-خلص الي كالو يصير ناخذ فصليه
كل هذا وابو علي ساكت من تم الموافقه احس حيله انهد وكام يرجف
-مادام وافقو الكل ابو علي جهزو البنت ونجي ناخدها باجر الصبح

رجعنه بلبيت واني ممصدك عمامي هيج سوو انجمعنه وحاجيتهم بعصبيه
-شنو هالافكار من يمته عشيرتنه تقبل بالفصليه انه ماردت ازعجكم وماحجيت بس شلون تافقون عله الحجي شلون تصححون غلط بغلط اكبر
متكلي منو را يتكفل بيها منو ياخذها كل ولد عمامنه متزوجين وابو محمد معنده ولد
-اي صح وانه هم كلت شلون اذا جبناها منو يعقدها
-عمي فاضل هسه يله فكرت بيها وين جنت من اتفقو مانكدر نغير راينه والفصليه صارت فكرو شنو راح تصير حياتها وين تبقه منو ياخذها
-تسمعون رايي لو تكولون رجال جبير ويخوف
-الك الحشيمه عمي ابو محمد اكيد نسمع
-عمي بس لا الك نيه تجدد عهد وتعقدها ههههه اذا تريد اني اوله ني  اخو الشيخ
كلها ضحكت كال
-انت شتحجي غير ام احمد مابدلها بنسوان الدنيه
-يمه الحب يمه
-اسمعو اني فكرت الشيخ ماعنده مره هوه يعقدها
-عمي شتحجي انه هدولي نسوان وماقبلت تريد بعد هالعمر اتزوج
-لاعمي ياعنر بعدك صغير
شتكولون يالعمام مو احق بيها الشيخ
الكل وافقو اني مكدرت احجي وجنت تعبان رحت حته ارتاح واني عقلي مبطل تفكير حياتي شلون راح تكون
(نعرفكم ع الشيخ )
اسمي قاسم الكل يصيحلي ابو الاكبر لان ابني الكبير اكبر عمره 17وعندي بنت عمرها 16سنه اسمها فاطمه انه جبير العايله عندي اخوان اصغر مني الاول عباس واخوي الثاني علي واختي
كنت اقرب شخص لوالدي الله يرحمه لما تمرض اخر فتره حياته جنت وياه بكل زغيره وجبيره مافاركته لحضه وتعلمت هواي اشاء منه وسلمني الشيخه عله حياته ولما قرب من الموت اخر ايامه كلي ازوجك قبل لا اموت جان حلمي اكون مهندس بس بسبب المسوليات الي خلاها والدي عله جتافي ماكملت دراسه تزوجت وجان عمري 18سنه بعدها توفه الوالد وصرت الشيخ وجان الكل يهابني وصار عندي الاكبر ولقبوني ابو الاكبر بعدها بسنه انولدت بنتي فاطمه وتمرضت زوجتي باثر الولاده وتوفت بعد كم شهر ضليت اربي اولادي واهتم باهلي وامور الشيخه وشلت من تفكيري الزواج وجان شغل المصنع ماخذ كل وقتي انجبرت مره وتزوجت ماريد انجبر مره ثانيه بس الظاهر هاي المره هم راح انجبر واخذ فصليه
.
.
.
.
.
هاي حبايب انطوني رايكم 😘
هاي اول قصه الي اكتبها واذا عجبتكم اكمل نشر الاحداث البقيه واذا اكو شي معجبكم انطوني فكره عنه بالتعليقات شكرا الكم واحبكم هواي 😘😘