شيخ ابو الاكبر

خجل

اجت عمتي رقيه شاورتني وكالتلي البنيه خجلانه بس مبين موافقه كالت اذا الشيخ يشوفه مناسب الي اني براي الشيخ اتصل عليه جبار يريد يعرف شنو الاخبار
-الو ها جبار
-هلز شيخ بشرني فدوه
-شكلك خويه البنيه سكتت وخليت عمتي تحاجيها هسه جانت يمي
-اي وشنو كالت شيخ
-جبار البنيه كالت السالفه يمك شيخ
-اي يعني موافقه مو
-هيه كالت هيج يعني السالفه يمي وانه جاي افكر
-افا شيخ تفكر فدوه وافق مو روحي طلعت
-ههههههه الف مبروك خويه مقدما
-ها شنو صدك شيخ يعني خلص
-اي يعني يومين ودز الحجيه تحجي وي حجيتنه
جبار حيل فرحان وجان وده يدز اهله هسه بالليل الساعه١٠ ونص دخلت لجوه لكيت ندو شافتني وخجلت لبدت وره عمتي بس عيونها تسالني شنو صار البنات جانن مسويات كيك انجمعو الكل بالصاله الجبيره شفتها فرحانه حيل استغليت فرصه الكل موجود وجلال هم وياهم فحاجيتهم
-ياجماعه اسمعوني مادام الكل هنا عندي خبر
-اخبار الشيخ دوم تفرح
-اسكت عدنان خلي اكمل
-امرك شيخ
-اسمعو اليوم جبار صديقي واخوي طلب ايد ندى اختي مني والولد خوش ولد وابن اصل واني موافق
-الف مبروك ان شاءالله
-ان شاءالله هاليومين يجون بس يحجون بيها وره الاربعين مال محمد عود نكعد ونتفاهم.
راحن عليها البنات باركن الها وعماتي كلهن باركن الها بس عمه سهام وعذراء ضلن يحجن بس ماهتمت الهن بينت قوتها الشباب هم باركولنه واخوتي شهدو الجبار باخلاقه كدام الكل جلال راد يدخل
-شنو نسيتو عدنه ميت شنو هالاستخفاف
رد عليه علي وعاط بي
-جلال احترم نفسك الشيخ يعرف شلون يتصرف وكال وره الاربعين يصير الحجي هسه بس سالفت نسوان
-ها والاخ جبار بهالفتره يضل طاب طالع عليها براحته.
هنا انه الماتحملت بس لازم اعصابي كوه ماريد عركه تالي الليل حجه عدنان
-جلال زودتها تره كلنه نعرف اخلاق الشيخ راهل هذا البيت
كلتلهم باجر سفره لازم تكعدون من وقت يلا روحو ارتاحو اجت عذراء كالتلي
-شيخ باجر الكل يطلعون واحنه ماعدنه شي من بعد اذنك انريد انروح للسوك محتاجين شغلات وهم نغير جو
-منو يطلع وياجن
-نحاجي عمو ابو احمد ياخذنه
-منو تروح منجن
-اني وفطم ونور وزهوره بت عمه رقيه
-ميصير لازم مره جبيره وياجن عمه رقيه تروح وياجن
-من رخصتك شيخ
-كولي بويه نور
-انه ماكدر اطلع اله براي عباس
-والله انج بت حموله هاي المره الزينه وينك عبيس
-ها شيخ والله انه اخاف عليها لان حامل
-البنات. وياي وعمه وياي شيخ وعادي اخذ جنه هم
-انه ماعندي شي بكيفها خليها تروح بكيفها جنه بويه ترحين وياهن بس عمه فدوه جنه امانه عندج
-اي عمه تدلل بعيوني مرت الشيخ
اخذت خاجيتي وصعدت للغرفه اجت جنه وراي بس فتحت الباب شفت اكو تغير والعطر يخبل بالغرفه ودافيه دخلت هيه وراي اخذت الخاجيه من ايدي
-بويه شمسويه للغرفه صاير بيها روح
-ماسويت شي بس غير البرادي والشراشف الوانهن جانت مضلمه الغرفه اذا معجبتك ارجعها مثل ماجانت
تحجي وياي وهيه مدنكه ماعرف شجاي يصير وياي انه رجال ب٣٥ سنه جبير اهلي وشيخ عشيره هاي الزغيرونه هيج تسوي بيه تكلب كياني
-لا حيل عجبتني عاشت ايدج بس لاتعبين روحج
جنت تعبان بدلت ونمت كعدت الصبح مالكيتها لكيت ملابسي محضره ملابسي بدلت ونزلت شفتها تحضر الريوك سلمت عليها دخلت اصبح عله الحجيه نزل علي وكعد يتريك وياي دقيقه ونزل عباس وياه نور نور صبحو علينه شفت البيت هادء
-بويه شو البيت هادء
-اي الشباب قبل شوي تريكو طلعو للمزرعه والبنات بعدهن نايمات
-ها جا خوش يلا علي تحرك ورانه شغل وانت عباس هاك روح شغل السياره. بويه جنه احنه مانرجع منا لليل تطلعين بويه وي نور.
راحو الشباب صحت عله نور خذتها عله صفحه
-بويه نور تعالي هاج هاي فلوس اريدج ماتخلين شي بنفسها وجهزيها من كلشي
- امرك شيخ
طلعت للحديقه وحسيت بيها وراي التفتت لكيتها رجعت عليها
-ها بويه محتاجه شي قبل لااروح
-شيخ ادري البنات كالن خلي اروح وياهن اذا ماتريد اطلع ماطلع
-لابويه انه اريدج ترحين غيري جو من اجيتي ليومج مطلعتي
طلعت رحت للمصنع كملت شغلي جان شغل هواي خلصنه ورحنه لكعده الشيخ ضياء حضرو الغده كملنه الكعده شفت الوكت تاخرنه ع الشباب طلعنه بسياراتنه وصلنه للمزرعه المغرب صار علينه صادو الشباب ومتونسين صار اليل كملو جمعو اغراضهم حته نرجع صعدت بالسياره ورجعنه للبيت سلمنه ع الحجيه وعمي ابو احمد وعماتي باين عليهن تعبانات هسه راجعات عيوني تدور عليها شفت نور تحضر الصاله الحبيره حته ننجمع بيها للعشه رحت عليها اريد اسالها عن عصفورتي
-شلونج بويه نور
-هلا بالشيخ
-وحدج وين البنات
-هسه جانن هنا راحن فوك يصعدن الغراض هسه يجن
-زين الشباب هسه يجون راحو يوصلون جبار وجعفر
مسوين عشه لو اجيب من بره
-جاب عشه عمو ابو احمد
-بويه سويتي الكتلج عليه
-اي شيخ اشترينه كلشي واختارت حلقه حلوه
واحنه نحجي دخلو الشباب وانجمعو الكل نزلت عذراء لابسه ملابس جديده وتراويها النه اني خزرتها لان ولد عمنه هنا نزلت جنه لابسه لبس كلش حلو وجديد انه من شفتها ردت روحي تعشينه وكلها كامت تضحك وتتشاقه بعد ماتسامرنه صعدت ارتاح تعبت كلش اليوم بدلت وتمددت ع الفراش واتصفح المبايل بعد ربع ساعه اجت جنه سلمت وشفتها متردده
-بويه بحلكج حجي كولي شصاير
-لا ماكو شي بس هاي الك
جان علبه انطتنياها بيدي فتحتها بيها حلقه ضحكت
-اسفه شيخ اذا ماتريدها عادي بس نور اشترت حلقه الي وجان العلبه بيها حلقه زوج وزوجه
-لا حلوه تسلمين اني هم جايبلج شي هاج افتحيها
-شنو هاي مبايل الي مشكور شيخ
-بيه رقم ااهلج خليته ورقمي خليته هم وباي وقت تكدرين تحجين وياهم
-شكرا شيخ
كتلها طفي الضوه تعبان نمت وماحسيت عله روحي كعدت الصبح ماهيه يمي دخلت غسلت وبدلت نزلت لكيت الكل مجموعين وكالو اليوم يرحون لاهلهم بس عمتي سهام وبتها عذراء راح تبقه علمود عذراء تريد تشوف بيت عمي محمد تبقه يمهم فتره انه سلمت عليهم وطلعت للمصنع رجعت الضهر سلمت واكلت وياهم دخلت للاستقبال كاعد اتصل عليه ابو جنه
-الو سلام عليكم شيخ
-هلا بيك عمي ابو علي شلونك
-بخير شخبارك الاهل شلونهم ابو احمد شلونه
-الكل بخير شلون الاهل سلمنه
-يوصل ان شاء الله شيخ اعذرني بس والله ام علي كلت كلبي حته اتصل جنه شخبارها
-هسه اخليها تحجي وياكم تدلل بس تجي يمي هسه يم البنات
سديته وي ابوها اجت شايله الجاي خلته كدامي باوعت عليها
-والدج اتصل يسال عنج ليش ماحاجيتيهم
-شيخ التهيت بالبيت
- لازم اتطمنيهم يلا اتصلي عليهم
اخذت الجهاز اتصلت وفرحت من سمعت اهلها ضلت تحجي شافتها عذراء من بره ماتدري اني يمها دخلت عليها تركض ولزمتها وعاطت كلها اجت تركض خلتها جوه رجليها وتضرب اني صرخت عليها اتفاجائت
-شيخ هاي جسره تلفون بيدها وهيه فصليه ويه منو تحجي هالسكط مامربايه
-انجبي وكلمه زايده ماريد
جنه لبدت وراي وعدلت حجابها لفيت ايدي عليها وخليتها يمي ضلت ترجف من عصبيته هاي عذراء كتلها
-يلا بلا حجي زايد اكو واحد يدخل هيج علينه يلا منا
كلها طلعت عذراء عيونها تجدح نار طمنتها وكتلها لتخاف من اي احد واني موجود طلعت يم البنات عذراء ضلت تسمعها كلام وتهديد( راح اخذ الشيخ واني الي اصير مرت الشيخ) هالشي ياذيها ويخليها تغار
بعد ٣ ايام اجتني رساله (شرفك انداس شيخ شرف مرتك ويامن تحجي) من شفت الرساله تخبلت وتسودنت شنو شكو شصاير لييش هيج شقصرت هالاساله والحيره براسي وصلت للبيت جنت طالع وي جبار كوه وصلت صعدت ادور عله جنه خذت المبايل لكيته عله الميز فتحته وشفت الرسايل لرقم كاتبه عليه حب حياتي رسايل غرام ومواعدها يطلع وياها ماكمت اشرف كدامي ماكدر اسوي شي شنو اسوي اروح اكسر راسها ضليت اكسر بالغرفه كسرت كلشي بيها وضرب المرايه بايدي انشكت وضلت تنزف صعدت فطم شافتني صرخت اجت جنه ونور والبنات انه طاحت عيني عله جنه وانه فرت بزياده دخل علي شافني بسرعه لزمني وطلعنه اخذني لامضمد ضمد ايدي وكتله ماريد ارجع للبيت طلعنه للمزرعه كتله ماريد احد يمي عوفني وحدي راد يعرف شبيه محجيت شي ماريد ااذيهم وماريد يشوفوني ضعيف ماعافني وحدي عنودي حيل علاوي اتصل عله جبار اجه يمي حته يغيرون جوي شويه
بالبيت جانت جنه تفرفح ونور حاضنتها تسكت بيها
كل هذا بغرفت الحجيه ندى رجعت من الدوام شافت الهوسه كلها عرفت شنو صار راحت يم جنه سالتها
-وين مبايلج
-مادري يمكن عد الشيخ لان شفته بيده من جان يكسر بالغرفه
-ارتاحي اني راح انضف الغرفه وادوره
-لا انه انضفها
-كتلج ارتاحي معلج انتي
طلعت ندو من غرفت الحجيه صعدت لغرفت الشيخ نضفتها وكملت رادت تنزل وهيه ع الدرج سمعت صوت من وره الممر سمعت عذراء تحجي بالتلفون..