شيخ ابو الاكبر

خوف

-الوو السلام عليكم
-وعليكم السلام منو وياي
-انت الشيخ ابو الاكبر
-اي نعم اني
-شلونك شيخ اني ابو علي
-اهلا وسهلا الحمد لله انت شلونك
-الحمد لله اني مستحي منك شيخ ادري اليوم المفروض تاخذون البنت بس تكدر تاجلها لباجر بس حته تجهز البنت
-لا تكول هالكلام ان شاء الله باجر نجي
ثاني يوم اتصلت على عمامي واولاد عمي واخذنه شيخ ويانه لان عمي كال نعقد بيت اهلها احسن وصلنه وكان الجو حزن عدهم ابو علي جان مو طبيعي وعلي مموجود وعمامهم اثنين عقدنه الشيخ بعدها جهزنه حته نطلع بالباب وطلعت بنت شابه تصرخ على أبو علي تكله الحكو وكعت اني مفهمت شيء بس شفت أبو علي مكدر يوكف عله طوله وكع والعمامهم ركضو لداخل البيت دخلنه احنه وبقينه بالحديقة شفت مره جبيره تبجي وعاطت جيبو بخاخها عرفتها هاي ام الفصليه حاجيت عباس وعلي وكتلهم اخذو الجماعه وروحو واني وعمي ابو احمد نجيبها ونلحكم اخذو جماعتنه وبقينه اني وعمي ننتضر
هدء الوضع وطلعت بنيه قصيرة ولابسه عبايه ومغطيه كل وجها صعدوها للسياره عمي كعد بالصدر سمعت أبو علي يكلي
-هاي وحيدتي ماعندي غيرها دير بالك عليها وهيه تختنك ربو عدها
التفتت عليه وحاجيته
-لاتخاف عني بنتك بامان واذا مساها احد بشي تجي تشلع عيوني وتاخذها انت لتخاف وخلي بالك على صحتك في امان الله
حركت السياره واسمعها بس تشهك وتبجي عمي ارتجه وكالي
-راح انام منايم صار يومين من نوصل كعدني
-تامر عمي ارتاح ومن نوصل اكلك
من سمعت هيج خلت ايدها على حلكه وخنكت صوتها باوعت عليها وضلت مستمره بالبجي لحد ماداخت ونامت صار المغرب حيل طبكت السياره ونزلت يم مطعم بالطريق السريع جبت جكتير ورجعت لكيت عمي نزل
-ها صارت الصلا اني عبالي نوصل قبل موعد الصلا
-شلون نوصل قبلها عمي واحنه تاخرنه ياله تحركنه ان شاء الله الساعه ٩ نوصل
راح عمي يصلي باوعت عليها لسه نايمه ميين منايمه صارلها هواي وصلنه للبيت نزل عمي ونزلها طبينه البيتنه صحت فطم بنتي انطيتها غراضها وكتلها
-دخليها جوه ترتاح وكولي لللحجيه وصلنه
-صار شيخ
دخلنه للديوان والدنيه اجت باركتلي وكالو نسوي هوسه كتلهم كلشي متسوون هوه عشه وبس لتسوون شي عدنه ميت
جنت كلش تعبان بس ناس كلساع تجي صارت ساعخ ١١فرغ الديوان بقه بس الاقارب شويه وراحو دخلت لكيت الكل نايم صعدت لفوك سبحت وبدلت ملابسي ونزلت للمطبخ جنت كلش جوعان شفت جنطتها الي دخلتها مشموره جوه الدرج دخلت للمطبخ داسوي اكل اجتي بنتي فطم حاجتني
-لسه كاعده بويه
-لا بس سمعت صوتك كلت اشوف محتاج شي
-اي والله جوعان كلش
-هسه اسويلك اكل
-بابا فطم اريد اسالج
-اي بويه كول
-بويه ليش اغراض البنيه جوه الدرج وماكو حس الها وينها
دنكت فطم وماردت
-احجي شنو صار والبنيه وين
جنت احجي بعصبيه لان حسيت اكو شي وفاطمه متحجي
-راح احجي بويه من كتلي دخليها شافتها الحجيه وسلمت عليها ونزلت ليلى تركض
-ليلى هنا شجابها مو علي خلاها عد اهلها وابو محمد كال تبقه حته تخلص مصيبه اخوها محمد
-مو هيه اجت علمود البنيه كالت الفصليه حصتي ومحد يحجي لو شنو اسوي
-هاي تخبلت احجي شنو صار وين البنيه
_جنه نحجي وياها ونزلت تركض من الدرج سحلتها بالكاع وضربتها وجانت عمه ندى واكفه وياها ماخلتنه ندافع عن البنيه وكضتها كضيان بالدك وسحلتها للمخزن وحبستها وكالت محد يدخللها شي هاي حصتي جتالت اخوي
من سمعت هالحجي احس كمت ماشوف بعيوني بس سواد ودمي يغلي لو ليلى كدامي اذبحها وادفع فصلها ركضت للمخزن وفطم بعدها تحجي حته منتبهت الروحي حافي فتحت المخزن جان اظلم وبارد كلش ماشوف شي بس اسمع صوت اتقربت على الصوتاجت فطم وبيدها ضوه شفتها لافه رجليها والعبايه مغطيتها وصوت يطلع منها يخوف ماجاي تكدر تجر النفس صحت عليها اريدها تكوم ضلت تصرخ وترجف الله لايوفقج ليلى شمسويه بالبنيه تقربت عليها اريد اشيلها شهكت بصوت شكت كلبي شك شلتها ودخلت للبيت صحت بصوت عالي على فطم يمكن البيت كله كعد من صوتي
-جيبي بخاخ موجود بجنطتها شوفي
صعدت بيها لغرفتي اجت فطم بيدها البخاخ اخذت نفس وضلت تون شفتها متاذيه كلش
-فطم ساعديها تغير ملابسها وصيحي نور تساعدج وشوفيها حته اخذها للمستشفى
-ان شاء الله شيخ
شويه وصعدت اشوفها لكيتها نايمه
-شيخ مقبلت تروح مستشفى بس بدلت ونامت بس حيل متاذيه من الكتله مقبلت اسويلها اكل كاكلت شي من اجت لسه
-خليج يمها اليوم اني راح انزل جوه خاف تحتاج شي واذا تازم وضعها كعديني اخذها غصب للمشفى
-حاضر شيخ
نزلت نمت بالاستقبال كعدت متاخر على صوت الوالده
-يمه جسوم اخوك راح للمصنع قبلك كوم صرنه الضهر وانت نايم
-صباح الخير يمه
-ياصباح شوف الساعه ١٠ وانت نايم
-خلي يجهزولي اكل راح ابدل واطلع
صعدت للغرفه اريد ابدل شفت فطم كاعده يم البنيه يسولفن
-هاي انتي تحجين عبالي خرسه
-شتودين تعرفين مني حته احجي وليش احجي بليله ويوم صرت فصليه اتمنه هذا كله حلم كابوس حته اكعد لو ماحرام اكتل روحي واخلص
من سمعت كلامها صحت على فطم
-جيبيلي ملابسي اريد اطلع
ماعرف ليش ماردتها تشوفني بدلت واخذت جكايري وجهازي وطلعت اتصلت بجبار وجعفر حته نطلع سوه
.
.
.
ادري تاخرت هواي حته نزلت بارت جديد بس جنت ماريد اكملها لان ماكو تفاعل اذا تحبون استمر كولولي حته يوميه انزل بارت 😜😜