شيخ ابو الاكبر

توتر

فتحت الباب طلعت فطم صبحت عليه وكالت يردوك جوه
-صباحج عسل هسه اجي
دخلت للحمام وطلعت بدلت فتحت عيونها
_صباح الخير ع النعسان
-صباح النور
-يلا بويه كومي صحصحي حته ننزل
-ان شاءالله
نزلت كلها سالتني عليها دخلت يم عمي ابو احمد واخوي علي جهزو الريوك اجت علينه هيه وفطم سلمت بس حيل جانت متوتره لان هوسه وكل الاقارب موجودين بادرت بشي حلو وتصرف مثقف من حجت وي اخوي علي
-خويه علي اني اعتذر لان سببت مشكله الك واليلى
-لاخويه ماكو داعي هيه غلطت بحقج وجان لازم متدماده عله مرت الشيخ.
عمي ابو احمد فتح موضوع علي وزوجته بس انه اعرف اخوي واعرف متحملها كوه عله نفسه بس شنو الحل
-شيخ لازم نحل سالفتهم ذولي امس البنيه اجت للبيت وبنفس الوقت رجعها علي لاهلها
جنت اريد اغير الجو لان الموضوع يضوج وخاصه علي من النوع الكتوم ومايحب احد يحجي ويكبر المشكله هوه لو عليه يخليها عد اهلها مايرجعها
-عمي السالفه متستاهل ان شاء الله محلوله واذا عله علي اترس حضنه ب٣ نسوان مو بس وحده
كلها ضحكت وعلي كام يشاقه وي عمي
-شفت عمي اذا شيخ عد كلمته خليها احسن اني الربحان هههههه
كمت وطلعت وي اخوتي للمصنع لان شغل هواي متراكم بسبب الايام الي انشغلنه بيها رجعنه للبيت الظهر لكيت الكل مجموعين عمي احمد قريب علينه فدائما يمنه سلمت وصحت عله جنه تحضرلي الحمام وتجهز ملابسي بعدها نجمعنه ع الغده عمي عمي عله راس السفره وكل واحد من اخوته كعد يم زوجته والحجيه تاكل على الطبله لان مريضه متكدر تكعد ويانه كنت كاعد يم عمي واكو مكان قليل يمي دخلت عذراء اجت رادت تكعد يمي ودخلت وراها فطم وحنه صاح عمي ابو احمد
-بويه جنه تعالي يم رجلج اكعدي عيب تكعد يم ولد عمك صح لو لا شيخ
-اي صح كلامك عمي
عذراء رادت تحجس وامها صاحتها تكعد يمها اجت جنه كعدت يمي المكان جان قليل ادنيت عله عمي حته هيه ترتاح بكعدتها سمعت صوت فطم كالت
-واني محد يريدني وين اكعد هسه
-هههه تعالي بحضني صار هواي مموكلج بيدي كبرتي وصرتي مره يبنت الغالي تعالي
-اي هذا الحجي جدو دللوني شويه
اجت فطم كعدت يم عمي ابو احمد وكلها ضحكت عله تصرف فطم الطفولي من كعدت يم عمي اتدنيت عله جنه جانت نور كاعده يمها من الجها الثانيه متكدر تتحرك عليها شفتها ممرتاحه بكعدتها جانت اذا تتحرك شويه وتطيح بحضني دنكت عليها وحاجيتها.
-بويه راح تكرسين رجليج هيج اكعدي براحتج لاتتاذين معليج بيه اني مرتاح بويه
رفعت راسها باوعتلي وعدلت كعدتها بحيث جتفها وشويه من ضهرها يطخن بصدري وبس ادير وجها بوجهي يصير جانت عذراء كاعده مقابيلنه يم امها باوعت عليها لكيتها معصبه وعيونها تجدح نار علينه عمي كال بلشو بسم الله. الغده عباره عن سمج شوي ع الحطب ودجاج لان اكو ميحبون السمج اني من عشاق السمج بجميع انواعه شفتها ماتاكل بس خبر وزلاطه دنكت عليها همست باذنها
-بويه ليش ماتاكلين شنو متحبين السمج
دارت عليه ورفعت عينها بعيني اني من يمي فهيت اريد احجي ماكدر هيه كالت
-لا احبه واكله
-اي اذا تحبي ليش متاكلين كضيتيها بس خبز
دنكت راسها وسكتت شافنه عمي وسال شكو كتله ماكو شي عمي هيه جاوبتني وره شويه
-شيخ ماعرف اكل السمج والدتي جانت تسوي الي واني اكله لان بس اكل اغص بالعظم ماعرف اكله..
من سمعت كلامها وهيه تحجي بهدوء ضحكت كلها باوعت عليه الحجيه فرحت
-يمه جسوم ربي يديم هالضحكه عليك
عمي احمد باوع للكل شافهم صافنين علينه ضل يشاقه
-شبيكم صافنين محد حجه وي مرته قبل وضحك يله كملو اكل ههههه
عذراء ضلت تشمر بالكلام علينه حجه عدنان ابن عمي الزغير
-شيخ تره انه ماتحمل بعد زوجوني لاانتحر كلبي رجيج ماتحمل اشوف هيج وانه بلايه مره
الكل ضحك عليه كلها تعرف شقه عدنان دوم يضحك ويشاقه بس جلال مارتاحله ضل يحجي كلام ماحبيته
-عدنان هوه مو كل الي زوج ارتاح جا ولك هيه كل مره مره
عمي احمد يشاقي فطم ومحد منتبه لعذراء رادت تبين الهم ندارتها او بالاصح رادت تبين الي هالشي حجت
-شيخ شلونخ السمج اني حضرته وشويته وتعبت عليه
-طيب عاشت ايدج
الاكبر جان كاعد يم عدنان صاح خله الكل تسمعه
-هاي منو الي تعبت ع السمج بله بويه والله الفضل لعبود ابو الفرن هوه الي شواهن واني وديته بيدي وعمه رقيه نضفته وجهزته تره وهيه بس جابته للسفره وفطم ومرت الشيخ حضرن كلشي..
حست بالفشله. اني
ماهتميت لان جان بتلي يم عصفورتي شلون تاكل اكل صحن كامل وهيه بعدهي بلكمه وحده صحت عله نور تنطيني صحن الدجاج صاحت الحجيه عليه
-يمه هذا دجاج انت ماتاكله
-اي يمه وسكتت
ردت اقرب الدجاج عليها بس ضليت اخذ من السمج واخلي بالصحن حته تاكل عذراء رادت تفتح موضوع وتفشل جنه
-جنه شنو معندج غير هالثوب من اجينه لسه مشفناج غيرتي يمه لو اني منج مالبسه لو يذبحوني شوفي يمه
مردت احجي عمي كاعد ومالي بسوالف النسوان بس شفتها خجلت ودنكت من كلامهن بعدين عمتي رادت تضوجها اكثر ضلت تحجي هيه وعمتي رقيه على حلقتها الذهب
-ام زهراء خيه اريد اغير حلقتي محلوه
-اي اخذي مثل حلقه نور حلوه
-اي صح جنه شو راوينه حلقتج
الحجيه تلافت الموضوع وحجت وياهن
-حلقتها جبيره عله ايدها والشيخ خذاها حته يبدلها
خلصنه غده البنات حضرو الجاي وشالو السفره وبلشن شغل بالمطبخ واحنه كعدنه بالصاله الجبيره اجت جنه قدمت الجاي اجت عذراء كعدت يمي وتحاول تحجيوتفتح موضوع وياي اجه الاكبر وكال عنده موضوع.
-شيخ تسمحلي احجي والقي خطبه
-ههههه اي تفضل
-بما انو باجر عطله وراها اخر يوم امتحان الي وباجر اخر يوم الشباب موجودين بعدها يرحون ليش مانطلع للمزرعه كلنه.
الكل وافق وايد هالفكره بس علي جان اله راي ثاني
-شيخ بس باجر عدنه كعده وي شيخ فلاح
-اي صح زين خلي الشباب يرحون قبلنه نخلص الكعده ونجيهم واني اتصل عله جبار يروح وياهم
-خوش فكره شيخ بس انه بعد عمك ماروح وياكم خلي الشباب يتونسون وانه ابقه هنا لان البنات يبقن وحدهن..
-بنات لاتعبون نفسكم ماناخذ شي ويانه كلشي هناك وهمه راح يصيدون ويشون
ترخصت منهم لان جنت تعبان رحت لغرفتي انام كعدت عالصوت ناعم ديكعدني
-شيخ شيخ اكعد
فتحت عيوني شفت جنه
-ها بويه
-شيخ الحجيه كالت اكعدك صار المغرب وكالت كوليله اكو ولد اسمه جبار منتضرك
-ماشي بويه حضري ملابسي
-حضرتهن شيخ
فتحت جهازي لكيت جبار متصل عليه كمت بدلت بسرعه رحت للبنات على المطبخ خاف محتاجات شي اجيبه وياي وطلعت بعدها لجبار شكله مو طبيعي
-شبيك جبار صاير شي
-ها اي لا شيخ ماكو شي
-شنو هاي حزوره ها اي لا
-قاسم اريدك بسالفه لان الموضوع بعد ماكدر اخلي اكثر من هيج وبعدها لو نبقه اخوان واصدقاء لو بعد ماتباوع بوجهي
-اي غير تحجي صار شكد اريد افهمالبيك شنو
-راح اكلك البيه لان باجر اذا اروح واشوف جلال اسوي جريمه
-شبي جلال مسوي شي وانه ماعرف الولد صارله يومين هنا كلي
-اي سوه شي صارله سنتين ورجع هسه يريد يعيده
-جبار جاي تحجي بالالغاز غير تحجي وتفضني
-شيخ جاي مخنوك احس جمره هنا بصدري
-سلامتك بعد اخوك لاتحجي هيج كوم نطلع نفتر بالبستان ونحجي طلعنه اني وجبار بسيارته فترينه ورحنه للبستانقريب ع النهر نزلنه
-يلا هاي هنا محد موجود واريد افهم شبيك اذا انت اقرب صاحب الي ماوكف وياه لعد وكفاتي ويالغربه كلها متنحسب
-ياخوي مو ادري اذا احجي ماراح تباوع ابوجهي بعد
-اي ليش غير تحجي ولاتحكم عليه براسك
-شيخ انه عاشك
-صدك تحجي وانه اخوك تضم عليه
-خلني اكمل لو اسكت ومافتح حلكي للموت
-احجي كمل
-صار سنتين اريدها وساكت وماحاجي لاي احد جعفر عرف بالصدفه كنه نسبح بالشط وشاف اسمها على زندي حلفته ميحجي شيخ والله من يوم الشفتها وحالي تخربط جانت زغيره تلعب وي البنات وكبرت بعد ماشفتها بسمن تداوم..
-افا جبار هاي شنو جاي تبجي بك انت زلمه
-ياشيخ تعبت انهديت كل هالعمر ماخليت واحد يدنالها من اسمع خطابه جوها افور دمي يغلي
-شنو تزوجت
-لا ماخليت احد ياخذها كل مايجوها ادور وراهم وماخليها تروح
-يعني تعرف اهلها
-اي شيخ.
-زين هيه شنو رايها
-ماتعرف شي يمكن حته متدري انه موجود لامحاجيها ولاسامع صوتها اشوفها بس من ترجع للدوام
-ليش مخطبتها لحد الان
-هواي اسباب
-اي شنو هالاسباب يجوز بس انت مخلي هالاسباب
-لا مو انه الواقع مخلي هاي الاسباب
-نكدر نحل كلشي بس ميصير تحله وحدك بله شنو هالاسباب المسويه معضله
-قبل سنتين ردت احجي وياها اوي اهلها بس اجه ابن عمها وكف بدربي وماجنت اعرف شنو رايها ومستحيل يعوفون ابن العم ويقبلون بيه
-انت خوش ولد معقوله تفكر بهاي الطريقه
-هيه بنت شيوخ مستحيل يقبلون واليوم سمعت جلال يحجي وي جعفر يكله مارجع لاهلي اله اخذها وياي اذا شفته يشيخ ادفنه
-شدخل جلال بالموضوع
-ابو الاكبر اني الي احبها جلال خطبها قبل سنتين وهسه راجع ياخذها اسمها هنا بزندي اني احب ندى اختك ياشيخ والله شاهد ماخنتك ولا طعنتك وماشفت اشرف منها ادري مصدوم بيه بس مو بيدي ياخوي.
- جنت حاس بهالشي وجنت متاكد راح تحجي بيها بس ماجنت اعرفك هيج جبان كل هالسنين ساكت وين الكه زوج لاختي مثلك زلمه ومعدل وابن اصل
-شنو قصدك شيخ
-بس ماكدر انطيك كلمه لازم نشوف راي البنيه
-تحجي صدك شيخ
-شيل جلال من راسك لان هيه رافضته وانه ماطيقه لان ماشتيل طبعنه
-يعني مازعلان مني شيخ
-ضايج منك لان ضميت عليه
حضني وفرح حيل وبجه عله جتفي حسيت اختي بايد امينه لان جبار خوش ولد ويصونها ويخاف الله ضلينه سوه وبعدها رجعت للبيت شفت الوضع مو طبيعي وشفت اختي كاعده وتبجي