بقلمي : Jawhara
بسم الله الذي لا يضر مع اسمه شيء في الأرض ولا في السماء وهو السميع العليم
ــــــــــــــــ
لم اعد داريا اين اذهب..
كل يوم احس انك اقرب..
قد تسللتي في مسامات جلدي..
مثلما قطرات الندى تتسرب......
يسكن الشعر في حدائق عينيك ...
فلولا عيناك لاشعر يكتب......
*********
_مااكدر بعد صدكيني مجاي اتحمل..
حجت بقهر وهي ادحك على صديقتها بنظره مليانه
يأس.
شجعتها بقوة ..ملاذ يعمري اعرفج قويه وشجاعه
لاتخلين عصام يخوفج.
حجت بشراسه ..ما اسامحه اني اكرها اناني كول اليهمه شأملك من فلوس وثروة ...وذبت حصرة
وبصوت ناصي ..ميحبني
حظنتها علا وحجت برقه..اووي فدوه للتحب الرومانسية .
ردتلها وهي تمسد على ذراع صديقتها ..سنتين ويا
ماسمعني كلمة حب وحدة كل اليهمة المال الصفقات
وبس ومشاعري ميهتملها ..تدرين اني شكد نادمه
عالزواج منه وما ادري شلون رجعتله بعد ما طلكني.
انتبهن لصوت الجهاز مكبر صوت ينادي لحظور الكادر الطبي فورا.
تنهدت ملاذ..اااه اكيد هاي جرحى وصلوا .
وفعلا جانوا جايبين عددمن الجرحى بسبب انفجار
صار قرب احد المطاعم....انشغل الكادر الطبي بعلاج
الجرحى .
ملاذ تضمد بالجرحى وتسمع انينهم ومر بخاطرها
الالم اليعاني منه الجرحى مقارنه بألمها وحست شكد
مشكلتها تافهة مقارنه بالجاي يمرون بي ذول الناس
الي ما عدهم ذنب ذنبهم تواجدهم بالمكان راح يعتبروا مشؤم بالنسبه الهم.
حست بأحتقارها لعصام مايهتم بس للفلوس
وهي جاي تعيش معاناة الناس المرضى الجرحى اشكال تمر عليها بهاي المستشفى.
.......
جانت الساعه ٧ المسا من دخلت للبيت وكالعاده عصام مموجود.
دخلت للغرفه وراحت طلعت تراكسود ومنشفة ودخلت للحمام وفتحت الدوش وبقت جوا المي البارد حست اعظامها ارتاحت لان جان اليوم كولش
متعب بالمستشفى حست رجعلها نشاطها بعد ما كضتها ركض والجو حار بعد شهر حزيران هنا بالعراق
نار .
طلعت نشفت روحها ولبست ومشطت خلت عطر وراحت للمطبخ تسوي لروحها لكمه لان ميته جوع
فتحت الثلاجه صفنت بالخضراوات عبالها تسوي
زلاطة رجعت سدتها تحس روحها مسحوكة ونفسها
انسدت بعد ماجانت جوعانه.رجعت للغرفه مدت السجادة ولبست حجاب الصلاة وصلت الاوقات الفاتتها بعدها راحت لفراشها لتنام.
تتكىب بالفراش ومن شافت الساعه مالت الموبايل
ب٢ سمعت حركه بالبيت وصوت حجي كمزت من فراشها شعرها الاسود الناعم طاير على وجها بعدته
ورى اذنها ولمته كبايه مشت على كيفها وكفت يم الباب وفتحته بهدوء طلعت بالممر اليودي للصاله
سمعت صوت عصام يحجي وي واحد مدت راسها
فشافت رجال اطول من عصام حنطاوي ولحيته
ثخينه حست بخوف من شافته جان شكله واضح
الصاله منورة خافت منه متدري ليش حسته بهذا شكله وملامحه القاسية شيطان .
تفاجأت من سمعت عصام يرزله والرجال ساكت ودنك راسه وزوجها يهين بي عدها احساس اكو شي
لان وجودهم بهذا الوكت غلط.
عصام يكله ابقى الليله هنا بات والصبح اطلع.
رجعت بسرعة للغرفة تمشي على اصابيعها
فتح عصام الباب ودخل ..ملاذ حاولت تنام جانت مغمضة عيونها سمعت حركته بالغرفه ينزع ملابسه
دقايق ودحس روحه بالفراش لينام مثلما تعود .
جانت موقته الموبايل كعدت توضت وصلت الفجر
دائما تفوتها صلاة الفجر لان تنام تعبانه دخلت للمطبخ تسوي ريوك وراها دوام سوت بيض تكلاه
وطلعت جبن ومربى من الثلاجه حطتهم عالميز بالمطبخ صبت جاي وكعدت تخوط بالكوب حست
اكو من يراقبها رفعت راسها وشافته صدك من شبهته
شيطان بالقران يخوف مو شكل هو جان الوسامه واضحة بوجهه بس شعره ولحيته التارسه وجها نظراته وعيونه يخزر من يدحك تخلي غامض ويرعب
..جانت ناسيه هو موجود وماخذة راحتها شعرها رافعته فوك راسها والخصل الناعمه نازله على وجها
ولابسة تراك نص ردن فانيلته .شعرت برهبة وهي تشوفه واكف بنص باب المطبخ وهدوئه يخوف
عافت الكوب وسألته بنترة..نعم تريد شي.
مو من الافضل تنتظر مديرك .
كعدت تراقبه بقلق جان تسمع صوت الخشن الرجولي
يعتذر..اسف جنت عطشان وجيت اشرب.
كامت وطلعت من الثلاجه بطل مي بارد وناوشته
..تفضل.
اخذها فتح القبغ وشرب وعينه عليها من كعدت
ملاذ حست روحها بالانكماش وهو يطالعها بهاي النظرة وي روحها كرهت نظرته شكد جريء لخاطر الله.
سمعت صوت عصام ومن رفعت راسها مشافته للرجال دخل المطبخ وصبح عليها جان يكللها..وياي
منير يشتغل عندي صارله فترة كولش خدوم وهواي يساعدني .حضريله ريوك
دحكت عليه بنظره كولها برود ..ماشاء الله شنو هالاهتمام بعامل بسيط ترى هذا مو طبعك.
كعد كبالها واخذ صمونه وقسمها يريد يتريك وردلها
بضوجه..ماكو داعي تستهزئين ادري شمااسوي ميعجبج .
كامت ملاذ وطلعت من المطبخ جان يصيح عصام
.. منير ..منير تعال تريك
دخل منير وبقى صافن ..نتر بي عصام ..شبيك جنك
حايط واكف تعال تريك
كعد كباله وكاموا يتريكون وراها بشوي دخلت ملاذ
مكمله لبس وشايله جنطتها تريد تروح للمستشفى
حجت بنترة..رايحه واميرة بالتسعة تجي تنظف البيت .
مشت رافعة راسها بدون متهتم بيهم ونظراتهم محاوطتها كل واحد جانت عنده نظره خاصة الها.
******
حبايبي دوسوا النجمه من تظهر وصوتولي
لان قصة روابط جان تصويتكم كولش قليل
ان شاء الله البارت ينزل يومية اذا كدرت او بالاسبوع مرتين .....🌹🌹🌹🌹
أنت تقرأ
الرجل الأخر
ChickLitالنقيب نشوان عادل سليمان ..من مدينه الجمال ورائحه زهرة قداح البرتقال ديالى 🌼جريء ولديه روح المقاتل الشجاع .. لايتوانى عن فعل اي شيء في سبيل تحقيق هدفه كرجل امن اتخذ على عاتقه حماية وطنه.تفرض عليه امرأة فاتنه راقية هل يقبل بها وهو كل ما يهمه نداء ال...
