بقلمي : Jawhara
ياعاقد الحاجبين..
عالجبين اللجين..
ان كنت تقصد قتلي..
قتلتني مرتيني...........
********
اليوم الاجتماع طول لان العميد احمد عبدالله جان عنده تعليمات مهمه وجها للضباط ..سأل كل واحد منهم عن رأيه وافكاره ورى ما خلص الاجتماع دحك
على النقيب نشوان سأله بأهتمام ولهفة..شوكت اسمع
الاخبار الزينه .
نقيب نشوان نفخ صدره ..ان شاء الله قريب سيدي.
نقيب ماهر علق من يمه..نقيب نشوان افكاره خارقة
ابتسملهم العميد..والله افكاره دومها مريحتنه.
طلعوا الكل من غرفة الاجتماع يتهامسون بامور تخص شغلهم.
وقبل ميدخل نشوان لغرفة المكتب ساله ماهر اليعتبره اقرب صديق وعلاقته حيل قويه بي..
_شنو رايك تجي وياي عالعشا .
ردله وهو يفتح الباب ويدخل راح كعد وره مكتبه..
_تسلم يابه والله ميت جوع.
_يلا لعد امشي الاجتماع وخلص وهسه وكت نزولي
نشوان اعتذر ..مااكدر صدكني عندي شغله مهمه
وانت تعرف لازم اروح
تنهد ماهر ..خسارة جنت مخطط للعشا وصيت البيت
يجهزونه وكلت اليوم اخسرك بالبليارد امشي يمعود.
نشوان اشرله بيده ..لا تسويلي واهس روح لمرتك وجهالك وخليني اني رجال وحداني لا ونيس ولا جليس.
تقرب ماهر وحط ايديه عالميز ..هااا ومنو السبب
لاتكول ادري بيك راح تبري نفسك على اني ويني وين الزواج ومن هاي سوالفك تمشيها علينا.
تنهد نشوان ونظرة عيونه تغيرت ..كل السالفة مالكيت البنية الاريدهاوتناسبني.
_هههههه والله خالتي ام نشوان رايها غير شكل
للعلم اتصلت عليه البارحه تريدني اقنعك تتزوج
بنت خالتك .
طكك عيونه متفاجىء ..صدك تحجي
ردله ماهر ..اي والله .
_ولاتبطل سوالفها الف مره كلتلها بنت اختج متوالمني طفله طفله انت تدري عمرها ١٥ سنه.
ضحك ماهر يدري بصاحبه ميحب طاري بت خالته
ودومه يتهرب .
_ايا مسكين يا نشوان واني اكول ليش تنزل كل شهر
لديالى اثاري تتهرب من العائله.
نشوان ردله والحيرة بعيونه من سوالف امه..حجيك
صحيح انت لو تشوف امي شلون مخليه واهسها
بالزواج خطيه بقت ورا همام لما زوجته قبل سنه.
وشكد تحاول وياي بس تدريني من ادك عناد ابوي
مااعرفه.
ماهر عدل وكفته ..يابه شنو السالفه موزين تريدك
تستقر ترى الزواح حلو ..غمزله بعينه وضحك
نشوان شمر عليه القلم جان يلزمه ويعلكه بجيب البدله العسكريه ..اي غرد براسي.
_والله شبيك ويصيرلك جم جاهل يكبرون جدام عينك.
نشوان مسح على وجهه وهز راسه..اييييه هذا اذا امهم واعية ومثقفه مو زعطوطه بعدها بالرحله
ماهر ودعه وطلع ...وبقى نشوان بالمكتب رجع راسه
وسند ظهره عالكرسي ......
نشوان عمره بالثلاثين شاب طموح ويتمتع بقوة اراده اصله من ديالى يعيش ويه امه واخو همام
اصغر منه بسنتين ...
امه معلمه متقاعده واخو يشتغل محامي ساكنين
بعقوبه بيتهم ملكهم بيت جبير ومرتب تعبت امه
هواي يلا بنته يحب امه ويحترمها لان تعبت بتربيتهم نذرت حياتها الهم ابوهم جان ضابط بالامن توفى بحادث سيارة عمر نشوان بوكتها اربع سنين
وكدرت امه تواصل حياتها وتربيهم احسن تربيه
اطمنت على همام من تزوج زميله وياه محاميه
تشتغل بنفس المكتب مال محاماه وكاعدين وياهم بالبيت ..نشوان اغلب وقته مكضي بغداد عنده شقه
مأجرها ومستقر يرتاح بيها من ياخذ اجازة زمنيه
وبوكت الاجازات ينزل لبعقوبة ..امه اضوج من هاي تصرفاته تريده ميبعد لان اغلب وقته ابغداد
لهالسبب جاي تصغط عايه يتزوج رحاب بنت اخته
هالوحده لأهلها .
نشوان مرعوب من هاي السالفه شيسوي بيها طفله
كولشي متعرف بالحياة وهم ميريد يزعل امه يحبها
حيل وميريد يكسر خاطرها فمبتعد واهم شي شغله
خاصة هالفترة هاي يريد يركز بي.
أنت تقرأ
الرجل الأخر
Literatura Femininaالنقيب نشوان عادل سليمان ..من مدينه الجمال ورائحه زهرة قداح البرتقال ديالى 🌼جريء ولديه روح المقاتل الشجاع .. لايتوانى عن فعل اي شيء في سبيل تحقيق هدفه كرجل امن اتخذ على عاتقه حماية وطنه.تفرض عليه امرأة فاتنه راقية هل يقبل بها وهو كل ما يهمه نداء ال...
