#رواية_أنا_حرة
#الحلقة2
رجعت البيت وانا شايله الجركانات ، خلت وختيتها ، بعدها مشيت نضفت بيت الغنم واستحميت بجزء من المويه الجبتها
طلعت من الحمام منعنشه ومشيت كبيت اكل من القدره في صحن وبديت آكل وجبتي حقت الفطور براي كالعاده .
لمن الضهر أذّن صليت بعدو شلت كتابي (كنت بديت قرايتو) مع كتابين تانيين جوا شنطه سوداء بازرق من القماش ، وأنا في طريقي للمرقه
سمعت امي تقول لي بزهج
_ انتي يا ساره ما زي البنات ليه ؟ اه؟
وقفت اسمع كلامها المكرر نفسو كل يوم، بس بطريقه تانيه ومختلفه شويه عن بعض
ـــــ البنات ديل كلهم ماسكين ليهم شغله زي خياطه او زخرفه ، وإنتي كل يوم تشيلي لي كتاب شكل ،كل مره اقول الليله تمل ، بكره تمل بس انتي مستمره !
سكتت وهي تعاين لي كأنو منتظره مني اوقف قرايه
قلت ليها بترجي
_ امي عليك الله ، انا ما بحب لا خياطه ولا غيرها ، أنا بحب اقرا
وبعدين ديك بيعملوا كدا عشان بيكونوا محتاجين للقروش بس انحنا الحمد لله مستوره.
قالت لي بعد كشرتها زادت وبدت تتكلم بيدها كمان دليل علي انها وصلت لغضب اكبر
_يا بت انتي ما بتسمعي الناس بتقول شنو ؟
قاطعتها وقلت ليها بلا مبالاه
_عارفه ! بيقولوا يا ريت لو كنت ولد كان نفعت ابوي علي الاقل، واني بت ما نافعه وسايبه وقليله ادب ، كلو سامعاه وما هاميني
بعد جملتي دي سكت كأني بجمع قواي الاوشكت تنهار وقلت تاني بقوه اكبر وثقه
-شفتي يا امي ما دام ابوي راضي بي ما علي تاني بالناس وابوي بيحبني زي ما انا كدا بت
قلت جملتي دي واديت امي ضهري ماشه علي الباب عشان اطلع لمحل قرايتي
سمعتها قالت بصوت خافت شبه مسموع بس كان فيه غضب
_ يااخ كلو من مروه جابت الكتب دي وجابت لينا معاها بلاوي
طوالي وقفت لفت راسي علي مكان وجودها وقلت
- امي !!
خالتي دايره مصلحتي وثقافتي ،
ما جبت اي بلاوي بسبب قرايتي الكتب ،بالعكس زدت في عقلي علم اكتر .
القريه وناسها ما متعودين ولا مهتمين بالتعليم وخصوصا للبت ، فما معنى كدا اني لمن اقرا معناها غلطت وشذيت من باقي البنات ، بالعكس مفروض يفخروا بي .
كملت كلامي كدا واديتها ضهري تاني وطلعت من باب البيت بس اضاني كانت بتسمع كلمات ضيقها اليائسه مني ومن اني اتغير
أنت تقرأ
أنــــــا حــــــره
Teen Fictionانتِ حره برأيكِ ، حره بعزمكِ ، حره بتفكيركِ ومنطقكِ ، فلا تجعلي احدا يغرس في رأسكِ معنى الحريه الذي لا ترضيه في نفسكِ للمزيد من الروايات زورو صفحتي بالفيس بوك #روايات_هبه_الله _حسن
