#رواية_أنا_حرة
الحلقه 1
اذن الصبح والرجال طلعوا للجامع للصلاه ، أقاموا الصلاه وصلوا ...
من بين المصلين ديل كان في راجل من سلّم قام على حيلو وسريع سريع لبس شبطو وبسرعه لبيتو .
مجرد ما وصل قال بلهفه:
ــــــ اها ولدت ولا لسا؟
وقبل ما ترد عليه المره السألها، سمعوا صرخه طفل .
إبتهج والابتسامه رفضت تمشي من وشو وفضل يعاين للغرفه الفيها اضاءه خفيفه يا دوب تضوي جنب الزول ..
كل الماشي والجاي يبارك ليه ..انتشر الخبر بسرعه القريه عباره عن اسره واحده الكل يعرف بالاخبار من تجي وما في حاجه تتدسى.
جات مره وقالت
_مبروك يا ماهر المولوده ، حتسميها منو ؟
قال ليها ببسمة
_ الله يبارك فيك ،اخترت ليها اسم (ساره ) لانها جابت السرور لقلبي .
_الله يخليها ليكم ويرزقكم اكتر واكتر .
_ شكرا ليك .
دخل الغرفه وشاف المولوده لاول مره ، حمد الله وشكرو ورفع قبضه يد الطفله وفضل يعاين لعيونها المغمصه بفرح .
أذن واقام في اضانها كما العاده وحمد السلامه لمرتو وطلع يقسم كرامه اول مولوده ليه.
المولوده دي كانت أنا ..
نشأت وإتربيت في قريه صغيره بعيده عن المدينه ، ناسها طيبين كأنهم بيت واحد ، لو عندك مناسبه معينه تلقى اهل القريه كلهم بساعدوك فيها لدرجه ما تلقى حاجه تعملها غير تقعد تتفرج فيهم .
كانوا ناس بسيطين على قدر حالهم ، حتى بيوتهم بسيطه مبنيه بطين، والسقف قش ، افخم بيت فيها بيكون مبني من طوب احمر .
البيوت كلها كانت فاتحه في بعض ، من يفتحوا الباب الفاصل بين البيوت من الصبح يبقي كأنو بيت واحد وما يقفل الا وقت النوم .
الشغل عندهم هو الزراعه وتربيه حيوانات .
من الصباح وبعد صلاه الفجر مباشره يمشي الرجال للارض والزاعه وبعضهم يرعوا .
اما النساوين مهماتهم يحلبوا البقر والغنم ويجمعوا البيض من اقفاصها ويطحنوا الدقيق ويعجنوه ويعملوه عيش ، وغيرها من الطبخ والغسيل والنضافه .
ولمن يكون موعد الحصاد يمشوا مع رجالهم عشان يحصدوا ، يدخروا لنفسهم ويبيعوا الباقي في المدينه .
كبرت انا بين اطفال القريه وزي الكبار نصحى من الصبح وكل الشفع يتلموا ويلعبوا ، حتي ما بيكون في مكان محدد للاكل محل ما نلقى نفسنا قاعد بناكل ، معروف اي بيت يعمل اكل وفير الماشي والجاي ياكل منو.
ما كان في كهربه عشان كدا من يجي المغرب كل الشفع بينوموا ، أما الكبار فكان بيولعوا فانوس للاضاءه.
أنت تقرأ
أنــــــا حــــــره
Fiksi Remajaانتِ حره برأيكِ ، حره بعزمكِ ، حره بتفكيركِ ومنطقكِ ، فلا تجعلي احدا يغرس في رأسكِ معنى الحريه الذي لا ترضيه في نفسكِ للمزيد من الروايات زورو صفحتي بالفيس بوك #روايات_هبه_الله _حسن
