أنــــــا حــــــره

الحلقه 7

#رواية_أنا_حرة

الحلقة 7

قصي لمّ الورق ومشي اتجاه المنصه وانحنا الخوف قاتلنا .

الاستاذ خاطب  قصي بحدة

_ شايفك بتململ من بدايه المحاضره ، قلت اشوف نهايتك ، وفي  الاخير جابت ليها كلام  و شنو الورق دا  ، أديني ليه

مد يدو  ، قصي من كان بيلعلع بلع لسانو وبقي مسكين يحنن ،  لو ما الخوف كان ضحكنا فيه

اتكلم  بهداوه ولا المطيع داك

_معليش يا استاذ اعذرني

الاستاذ  بعد ما زفر ورجع عاين ليه بكشره

_أنحنا بنلعب هنا يا ولد جيب الورق دا قلت ليك

_ يا استاذ اقول ليك الصراحه،  الصراحه .

وقتها خلاص افتكرنا حيقول بالجد  ويفضحنا  ، أستكان  المحاضر وسكت عشان يسمع باستسلام 

_إتفضل سامعك

_بصراحه انا بحب واحده  وكنت بحاول أألف كلام حلو اقدمو ليها في شكل رساله.

القاعه كلها انفجرت بالضحك وانحنا معاهم  ، الاستاذ عاين للقاعه كلها بنظره غاضبه  فسكتنا ، واصل نهرتو في قصي

-ومحاضرتي ان شاء الله منتدى غرام واحاسيس

قالها بسخريه وهو لسا مادي يدو ، مٌصر  يشيل منو الورق بهنا قصي  يصر ما يديه في الاخير قال ليه الاستاذ

_لو عايز  ترجع محلك وتحضر محاضراتي من هنا ولقدام ، تقرا  الكلام  الفي الورق دا هسي دي وقدام القاعه كلها عقاب ليك

ختمو بضيق يتخللو كشره ، قصي ولا الفالح دا ركب المنصه مبتسم  وعدل المايك وبدا يقول

_ احم احم  ، تست تيست

الاستاذ غضب وانفعال

_يا ولدنا خارجنا خلينا نكمل المحاضره

قصي ابتسم ليه وللقاعه ، كل العيون كانت عليه وللداير يقولو ،  وأنحنا متحمسين قصي عايز يقول شنو  ،
بدا يألف كلام من راسو

صراحه دمعنا من الضحك حتى الاستاذ حاول ما يضحك بس غلبو وحاول يداري ضحكو بتصنعو انو منشغل في الورق الجنبو ،الكان بيقلب فيه وخالف رجل فوق التانيه

في الاخير إتكلم المحاضر بعد خلص قصي  بنظره بارده

_ارجع محلك وما تعمل شوشره اثناء المحاضره، دا انزار ليك ، لو اتعادت تاني بشيل بطاقتك

قصي بابتسامه وفرح

_ اكيد

وهو راجع كدا الاستاذ قال ليه بضحكه

_بس لعلمك ما تجاسف تاني تألف لحبيتك شعر

ضحكت القاعه وضحكنا معاهم.