أنــــــا حــــــره

الحلقه 10

#رواية_أنا_حرة

#الحلقة 10

انا قاعده كدا قلبي البكى حنيت راسي لتحت محاوله أوقف دموعي وامنعهم من النزول ، مسحتهم بطرف يدي ،ورفعت راسي

فجأه اشوف شلتي جو جنبي ، فتحت عيوني المبلولات بالدموع علي اخرهم وخشمي شبه مفتوح.

انا بعاين ليهم وهم يقعدوا جنبي ، مريم ومياده خلوني في نصهم وقصي مع عامر مواجهني

فضلت اعاين باستغراب لكل واحد في وشو وقبل ما اتم الفي راسي من تفكير

سمعت قصي بعد زفر قال 

_اي المفروض ما نجي ،  وهسي حتسألي( ليه جيتوا وقعدتوا  معاي بعد ما خليتكم  ؟ )كان بيقلد صوتي ...

تاني واصل 

_شفتي درامات المسلسلات دي حصلت لاسف أتاري ممكن تحصل يا جماعه  .

قبل عاين للبقيه واي واحد يديه نظره ملل لكلامو الكتير

واصل كلامو  لي

_خلتك صحبتك الكعبه ووقت عرفتي اننا احسن منها خجلتي وندمتي ، بديتي عايزه تعملي اي حاجه عشان تصلحي غلطك  ، وأنحنا كابطال العمل الدرامي الحاصل هسي دا ، حنكون طيبين القلب فنصفح عنك كدا ونرجع احسن من اول

كمل كلامو وهو مبتسم ، خلف رجل فوق التانيه ساند ضهرو براحه فارد يدو بارياحيه علي كتف عامر وختم كلامو بسؤال

_صح كلامي ولا كيف ؟

عامر نزل ليه يدو بضيق من كتفو وتمتم

_ ثرثار ..!!

ما قدرت اقاوم بسمتي الظهرت لثواني  قبل ما مياده تتكلم

_ياخ  إنت ما بتفتر من لوك لوك لوك

مريم نبهتنا

_ علي فكره لو ناسين اذكركم عندكم امتحان بعد ربع ساعه تقريبا وانتوا بجاي تحشوا لينا راسنا بالثرثره والكلام الفاضي ، براي ما ناقصه ماده زفت .

عامر بجديه إتكلم

_ ساره ، انحنا بالجد كنا وما زلنا مقدرين ظرفك ، بس ما قدرنا نوصل ليك النصيحه بشكل كويس .

كنت خجلانه منهم بعد كلامي الجافي معاهم ، إتخليت عنهم من غير سبب ، قلت باستياء وزعل من نفسي   

_ما كدا يا جماعه لكن بالجد انا كنت ما فاهمه ، كنت في عايشه في تضارب بين الصح والغلط ، لمن اتوزنت عرفت نفسي مشيت غلط  .
قبلت علي قصي وقلت ليه بابتسامه وسط دموعي

_خليت ملهمه براي يا قصي لمن عرفت انها غلط  وبعدت ، يعني ما انتظرتها تغلط معاي وتهيني

مياده بجديه اتدخلت

_انتوا عارفين النصايح دي  ما هسي لمن تخلص الامتحانات اي واحد يجي ينصح علي كيفو