أنــــــا حــــــره

الحلقه 3

#رواية_أنا_حرة

#الحلقة3

ولد عمي حمد دخل البيت غضبان وبيكورك .
ـــــ عمي  ،  يا عمي

ابوي طلع ليه

_ مالك يا ادريس في شنو؟ 
بغضب إنفعل

_  يعني ما عارف في شنو؟ 
بتك يا عمي ، لو انت خليتها تعمل العايزاه انحنا ما بنخليها ، ما ربيتها سمح انحنا نعرف نربيها ( وضرب بيدو علي صدرو مرتين بقوه) وكمان أ...

ابوي قاطعو بحده

_ ادريس شوف نفسك بتتكلم مع منو ،
ترفع صوتك علي وتتهمني باني ما بعرف اربي.

ادريس بغضب بس اقل

_لا ما قصدي كدا بس

بزياده الغضب في وشو وكشرتو من أسلوبو نطق

_   لا قصدك  ،  لمن تدخل بيتي دا (واشر بيدو علي الارض بسبابتو  )

تحترم الفيه وناسوا ما تجي نافش ريشك وفاير فينا تستعرض عضلات صوتك 

ادريس وهو لسا بيعاين لابوي بنظره غصب محاول يكمل 

_ عمي ..

ــــ دي بتي وانت ما عندك دخل فيها

لا انت ولا حتى واحد من اخواني  قرايه وحتقرا إنتهينا .

كمل كلامو بنظره تحدي وقوه وقبل مديه ضهرو ومشى خلاه واقف لسا غضبان
بقي ود عمي  يتكلم بصوت عالي عشان اسمع انا 

-أسرتنا اتشوهت بسبب الزفت ديك وانت بتدافع عنها .

ومشى بعد كل الغضب داك والانفجار

أخواني صحوا بالصوت بس امي رجعتهم تاني وخلتهم ينومو ا وطمنتم انو ما في حاجه .

ما كنت شغاله بكلام اي زول،
اي بزعل شديد وبضايق من الكلام البسمعوا كل يوم ، لا ما كل يوم ،لكن كل لحظه والتانيه

وتاني ارجع عادي لمن القى ابوي واقف معاي وسندي وحفزني وطلع لي قوتي من بين ضعفي ، بالذات لمن اشوفو مهتم بقرايتي.  

كنت زعلت بكلام ولد عمي ادريس، بس زعلي راح لمن ابوي اتكلم مع خالتي واتفق معاها اني بعد اسبوع حامشي للمدينه واقعد معاها .

اليوم التاني طلعت من البيت لمحل قرايتي ،  وأنا قاعده ومندمجه مع الكتاب سمعت صوت بتين بيقرب من مكاني .
ما كنت بشتغل بالموضوع كتير ، لانو محلي بيجمع منو النساوين الحطب بعد مرات ، عشان كدا اتجاهلتهم وركذت علي قرايتي  .

بس إنتبهت للبقولوه بتمعن واهتمام لمن سمعتهم بيتكلموا  عني وهم بيجمعوا الحطب  .

الاولى تقول

_عشنا وشفنا بقوا  البنات يقلوا ادبهم علي اعمامهم والاكبر منهم

التانيه قالت بضحكه صغيره  
_ هه  المشكله ما هنا ،ابوها يأيد فيها ويساعدها ، ما عندهم موضوع  ، لو مني ومنهم امسك رقبتها واكسرها اريح الناس منها