أبسط حقوقي

part4

part4
وسيم:ها شن رايك!
مروى تفكر:مش عارفه هالشي كبير
وسيم ضحك:عارف ونعرف انه قرايتك بنفس حجم طلبي منك عموما فكري براحتك ورديلي خبر يوم الفاتحه
مروى:الفاتحه 😱
وسيم:ايه مفكرة انك لو رفضتي الاتفاق رح نوقف الزواج لالا هالاحتمال بعديه من خيالك نهائي رح نتزوجو يا ميمو
مروى:اووف
وسيم:صوتك يجيب النوم انا بنرقد نكلمك غدوة بهي
مروى:مانبيش نكلمك انا
وسيم:ماناخدش في رايك نعطي فيك علم بس
مروى:ان شالله نموت وترتاحو مني تعبت انا وبدت تبكي
وسيم قعد ساكت فترة:ياسر بلا جو دموع سكري الخرا
مروى سكرت عليه وقعدت تبكي تحس في روحها مخنوقه من كل شي"صعب لما تنجبر على شي انت ماتبيشي بس ماعندكش خيار تاني الا تنفذه" 💔
ثاني يوم الساعه 2 خشو حسناء ومجدي للحوش وقبس معاهم
مصطفى:الحمد لله على سلامتك وقرب منها بس مافيش اي ردة فعل
حسناء:بنتك جاها انهيار عصبي وهدا حالها من لما فاقت
مصطفى مصدوم:كييف ويشوفلها حط يده على راسها بنتي
قبس نزلو دموعها
مجدي واجعه حال اخته ونادم انه ماوقفش معاها قامها بين ايديه وركبها لغرفتها حطها على سريرها ونحالها سبيدرو
مجدي:حبيبتي ارجعي زي قبل ارجوك عارف اني قصرت معاك هلبا واهملتك وماكنتش ليك اخ بس وعد ارجعي كويسه ومش  حانتخلى عليك وبتكملي قرايتك غصب عالكل
قبس مادارتش شي الا دموع بس
مجدي باس على راسها وطلع قابلاته امه
حسناء:شن حالها توا
مجدي:قعدا على حالها ياامي انتي غير قوليلها والله لما ندخلها احسن مدرسه بس ترجع تحكي
حسناء:ان شالله ياوليدي
قبس حاسه روحها في عالم تاني هدوء بس مرتاحه من الكل لا بو يعيط ويضرب ولا خو يهملها ويرفضها
"اكيد تقولو انه قبس مكبرة الموضوع لدرجه انتحرت عاخاطر قرايه فانقلكم ايه هيا عاشت حياتها وحيدة بوها مايخليش فيها تطلع وخوها ولا كانها من عيلته اما امها تحاول تعوضها بس يقعد الفراغ موجود ماعندهاش الا قرايتها والمدرسه المتنفس الوحيد وحلمها اللي تشوف فيه حياة "
بعد اسبوع
قبس تحسنت حالتها لكن ماتطلعش برا دارها تصلي وتقرا في قرآن بس ومجدي مش مسيبها لحظه
ومروى قعدا على نفس الوضع وسيم مش مخليها بكل ديما اتصالات ورسائل حددو موعد العرس وهيا كل مايقرب الوقت تحس روحها مخنوقه اكثر
رن هاتفها فتحت الخط بدون ماتتكلم
وسيم:مرتي الحلوة جايك بعد شويه بناخد رايك في حجات
مروى:به
وسيم:شن صايرلك هاليومين بديتي كل شي بهي
مروى بتعب:خلاص اني استسلمت حتى لو بتقتلوني عادي
رح نتفرج وبس حياتي معادش تهمني
وسيم:تخليتي على قرايتك
مروى:ربي عالم بيا
وسيم:بهي نكدتي عليا ماتفكريش تقعدي هكا لما ناخدك رهو غيري من روحك ها وانزلي هي اني وصلت
لبست مروى وشاح وعبايه وطلعت لقتهم في المربوعه هوا وايهاب خشت
ايهاب:هي خودو راحتكم
وسيم وقف ومد ايده:اهلا
مروى سلمت عليه وسحبت ايدها بسرعه وقعمزت
وسيم فتح هاتفه يوريلها في صور البدلة الصغيرة والصدرة وقفاطين:ها شن رايك
مروى بدون اهتمام:كله زي بعض يفرقش
وسيم تعصب وخنقها:علاش هكا جاي مبسوط ورايق ونحاول نتعامل معاك كويس لازم تفسدي
مروى تحاول تنحي ايده وتبكي
طلقها وقعمز:اسمعيني كويس بنتزوجو ولو ماكنتيش ليا زوجه بكل معنى الكلمه ورحمة بوي لما نخلي عيشتك جحيم اسوء من اللي عايشاته مع خوك انتي مايمشيش معاك الطيب
مروى تشوفله وخلاص
وسيم:زيدي عندك ليوم العرس بس وبعدها يا تتغيري يا تتحملي 😏
مروى:ربي في الوجود وطلعت خشت قابلوها امها وايهاب يضحكو
امنه:شن روح خطيبك
مروى:حسبي الله ونعم الوكيل فيكم وركبت لدارها
عند قبس
طق باب دار
قبس:تفضل
خش مجدي شاد زوز اكياس:شن جوها سنفورتي
قبس ابتسمت:الحمد لله
مجدي:جايبلك مفاجئه
قبس:شنو وريني
عطاها الكيس الاول فتحاته لقاته معبي شكلاته هلبا انواع
مجدي:تفضلي
قبس بفرحه فتحت التاني لقاته زي مدرسه للثانوي عيطت ونقزت في رقبه خوها:الله حبيبي قصدك بنقرا
مجدي:طبعا بتقري مش رح نخاطر بيك مرة تانيه واهو بننزل نعطي علم لبوي انك رح تباشري الاسبوع الجاي
قبس:ربي مايحرمني منك
مجدي باسها علي خدها وشفشفلها شعرها وطلع
قعدت تتفرج عاللبسه وتضحك
نزل مجدي وخش لبوه:بوي نبي نقولك شي
مصطفى:خيرك شن فيه
مجدي:قبس بتبدا تقرا الاسبوع الجاي
مصطفى وقف و ....... يتبع
شن بيصير في مروى مع وسيم!!
هل بتوافق على طلبه او بترفض وبتكون عيشتها معاه جحيم!!
وقبس هل بيوافق بوها على قرايتها او بيرفض زي قبل!
تفاعلو هي غدوة رح نزل حلقتين