راسلت بت عمتي زهيران وبقينه دك سوالف لحد ما كالت ولج ننو تعرفين فاطمه الزهراء موجوده وياكم بمدرستكم كتلها بس لا فاطمه الزهراء محمد كالت.. اي هي انقلت لمدرستكم تعرفيها
كلت.. اي اعرفها هي ويانه بالشعبه.. انتي منين تعرفيها؟ زهراء.. ولج هي نفسها صديقتي فاطمه الي احجيلج عليها كلت.. خرررب هي نفسها ولج اعرف كل سوالفها ومصايبها اله اخبلها باجر زهراء.. شنو حتسوين كلت.. احرك اعصابها بعدين اكلج شنو حسوي
باليوم الي وراه حجيت لصديقتي مريم وكتلها على كلشي براسي ووافقتني وبالفرصه صحت فاطمه كتلها انتي فاطمه الزهراء محمد؟ كالت. ااي اني شكو وتبتسم وتحسها كلها حماس وطاقه كتلها عندي موضوع وياج بلعت ريكها كال شنو شكو دخلت ام الكيمياء
كتلها بالفرصه كالت كولي بسرعه فضولي حيذبحني بس ما اهتميت ورحت كعدت مكاني وهي تحوص تريد تعرف شكو
بالفرصه اجتني تريد تعرف كتلها مو مال بالشعبه نحجي لان موضوع خاص ومهم امشي نطلع طلعنه من الشعبه ورحنه لبعيد ومريم وياي كتلها فاطمه اني اعرف كولشي عنج
كالت.. مين تعرفين كتلها.. انتي بيتكم بمنطقه ال### وشارعكم معروف بأسم شارع ام حسين هاا وقبل اسبوع اجه يمكم ناس جديدين كالت.. ولج شمدريج
ما رديت على جوابهه كملت كلامي واني احجي باسلوب استفزازي وبرود وكل هدوء كلت.. وعندج صديقه اسمها زهراء كالت.. اي هاي تصير اخت اختي 😂😂😂 اخت اختي شوف السحكه العملاقه خطيه توترت البت وكامت تفلت عود قصدها صديقه اختي 😂😂😂
ركزت بعيونها وكلت اكو ولد يلعبون طوبه بشارعكم يوميه وسكتت وكملت.. وتحديدا واحد اسمه زيد.... وواحد اسمه منتظر... وواحد اسمه محمد لطمت على وجهه كالت.. انتي منين تعرفيني انتي من نفس منطقتنه؟؟ كتلها.. لا اني من ال## بلعت ريكها خايفه
وكملت كلامي بنفس اسلوبي الاستفزازي كلت.. منتظر.. من جان بالثالث يعني العام جان يجي عليج ياخذ دفترج وانتي همين تاخذين دفتره و كتابه لان نفس المرحله فتحت عيونها وكالت.. يااا شمدريج بس بس تره شسمه منتظر يصير صديقه لاخويه ويجي لبيتنه علمود يلعبون سوه بالبلي
مبينه متوتره بس ما عفتها وكملت وذبيت عليها القنبله من كلت.. ومره من المرات من اخذ كتابج ورجعه جان كاتب رقمه بي وطالب منج تخابري 😏
كامت تلطم على وجهه ولونها انخطف وترجف من هول المعلومات الي عندي
كالت وهي ترجف.. تره شسمه اني وديت الرقم لامي ووو وكتلها عليه يعني ما خابرته كتلها.. اييي ادري كالت..انتي منو ومنيني تعرفين كل هذا
والي ما تعرفوه انو فاطمه الخبله نشرت بين صديقاتها انو ننو ام السحوره كولشي تعرف ونبهتهن مني لان اني سحاره😂😂😂😂😂
ومشت عليه ام السحوره لان صدك اعرف هواي معلومات عن الطالبات بدون ما هن يعرفني اني قليله كلام بس هن هواي يسولفن واني اذا اسمع معلومه اخزنها بعقلي استفاد منها في وقت لاحق مثل المعلومات الي اعرفهن عن فاطمه
وكل ما يسئلني البنات منين تعرفين هل شي اكلهن اني ام السحوره كولشي اعرف
اكو بنات صديقاتي ثنين اسمائهن زهراء وفاطمه (الهم كثر من الزهرائات والفاطمات😂) ذني عدهن سايق اسمه مصطفى يموتن منه يتخبلن حتى من ذكر اسمه فاني بالعناد يوميه من نطلع للبيوت وونتظر السواق اني ابقى بس احجي عن مصطفى واكول صفاوي صوفي وادلع بي وهن يتخبلن
ومن يجي اكلهن اجه صفاوي يله روحن 😂😂 فـ فاطمه كالتلي تره هو مزوج ومرته حامل كتلها شمها مرته كالت ما تعرف بقت سالفه اسم مرته براسي
بقيت افكر وافكر لحد ما وصلت لطالبه اسمها طيبه هاي بيتها قريب على بيت مصطفى السايق سئلتها عن اسم مرته كالت متعرف طلبت منها انو تسئل عن اسم مرته منا منا تحاول وهي بنيه من النوع الي تندفع بسرعه يعني شنو ادكوليلها ادكول تم
وبقيت وراها لحد ما جابت اسم مرته ✌ ورحت لزهراء وفاطمه وكتلهن عرفت اسمها تعجبن مني وسئلن شلون كتلهن اني ام السحوره ميعصب عليه شي 😂
يوووو كووومه مواقف الي بهذا الموضوع مره تقى هاي دووم اني وياها عرك عبالك روسيه 💪😋 هي تصيحلي ام السحوره واني اسميها دكتوره بس اني احبها وهي تحبني
فمره كالت عليه انو اني عجوز😒 وهي اكبر مني ب7 اشهر 😶
فاني كتلها لو اني عجوز يعني انتي هسه ميته وصايره عظام وداسوي بعظامج سحوره😜😜
وعلي قصف معدل حتى هي ما ردت دارت وجهه وراحت من القصفه التوب في منتصف الجبهه😂
المهم كافي سحوره اقصد كافي سوالف صار البارت طويل😂 والمصيبه اكو ناس يصدكون اني اسوي سحوره هو هذا الي يكتلك من تحجي كدام ناس عقلياتهم متخلفه وما يعرفون شنو شي اسمه شقه اني من اعرف معلومه واحجيها اكول لان اني ام السحوره فاعرف كلشي بس هل شي مو يعني اني صدك سحاره 😅
المهم لا تنسون التصويت
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
