#طلاقي_ليس_نهايتي20
سامي : انتي كيف تطلعي من البيت من غير ما تكلمي امي 😠 💔
انا : شنو😯كيف يعني انا ما فاهمه
سامي : بطلي استعباط افتكر سمعتيني كويس
انا : كيف يعني اطلع من غير ما اكلمها وبعدين انا طلعت مشيت وين
سامي : عارفك ماشه اهلك بس برضو ما من حقك.تطلعي ساي يعني ما عامله اعتبار لاهلي
انا : سامي انا ما ممكن اعمل كده انا عمي كلمتو قبل جيتي بيوم وخالتي برضو كلمتها
سامي : ايوه هي قالت انك كلمتي ابوي بس هي ما كلمتيها لمن جات لقتك مافي
انا : 😯مستحيل طبعا ما حصل ولا انا بعملا😢
سامي : بتكذبي امي يعني 😡
انا : ما قصدي ي سامي بس.....قاطعني : شوفي ي الاء امي وابوي خط احمر انا بحبك وبعمل المستحيل عشان اسعدك وارضيك بس ما على حساب اهلي مفهوم زي ما هم محترمنك انتي كمان احترميهم على الأقل عشاني انا
انا كنت ساكته وبسمع فيه 😷وفي نفس الوكت مصدومه من كلامو وطريقتو ونبرة صوتو ،، واصل قالي فيها شنو لو كلمتيها انك ماشه او انتظرتيها لحد ما تجي انتي لو معتبراها جد.زي امك ما بتهمشيها كده انتي عارفه هي زعلت منك وكتمت زعلها ده لو ما هاله هي الورتني ولم سالتها نكرت علي وكمان بتدافع عنك بس جد ما اتوقعتها منك وبتمنى تاني ما تتكرريها تمام✋
انا : وبصوت مخنوق جدا ححاضر😢 وانا اسفه اسي بتصل اعتذر منها
سامي : يكون خير ما فعلتي وطوالي قفل الخط ، حسيت براسي ده لافي وتقييييل لدرجه غلبني افتح عيوني واتضايقت ف نفسي حكاية بتاعة نص ساعه انا ف حالة لا وعي ي الله هديت وقدرت استوعب الحاصل ودموعي نزلت مطر ليه خالتي تعمل فيني كده مؤامرة دبرتها مع بت اخوها واضحه جدا بس انا عملت ليها شنو يشهد الله اعتبرتها زي امي واكتر لا وسامي؟ 😢 سامي كيف يصدق انو انا ممكن اعمل كده وكيف يتكلم معاي بالاسلوب ده انا م قادرة اصدق ااخخخ ي راسي ومسكني صداع مبااالغ فيه مشيت غسلت وشي واخدت لي مسكن وجين رقدت ودموعي سايله 😭😭امي كانت فالحوش الورا مفتكراني لسه بتكلم بالتلفون لحد ما اذن العشا صليت وقلت لامي عايزة انوم ماوتصحيني لعشا
امي : اجي انتي صحيتي متين هو من النوم بجيك ضغط 😄ما رديت ليها قفلت الغرفه ورقدت والصداع ماشي زايد من كتر التفكير للساعه 2 انا نوم ما جاني طلعت اتوضيت و صليت ركعتين وقريت قرآن شويه كده حسيت بنفسي هديت وأرتحت ونمت الصباح اول ما فتحت اتزكرت الحاصل بقى لي زي الحلم حلم كدا اصلي ما مصدقه استغفرت وقمت على اشغالي امي لاحظت لي متغيرة قلت ليها من السهر بس نمت وصحيت تاني ما قدرت انوم ما اقتنعت بس مشتني اصلا ما بتضغط علي لانها متعوده لم احب احكيلا بجي احكيلا براي♡ جاتنا خالتو زينب بالفطور انشغلت بالونسه معاها ونسيت شويه
خالو زينب : لدن بتسال منك قالت جايه الاسبوع الجاي
امي : ههههه غلبها القعاد؟
خالتو زينب : اصلها جرسه والسده ما بتنفع معاها
انا : احسن خليها تجي لاخواتها الله يوصلها بالسلامه 😊بعد خالتي مشت فتحت الواتس لقيتها خاشه وبقينا ندردش ومرسلا لي صور ملابس لاخواتها وعبايات خليجيه بتسال فيني الاحلى ياتا
انا : ي بت ما تفلسي بابوك تخمي البلد.كلها وتجي
لدن : خليني ي زوله برااه قالي شيلي مستلزماتك بعد انزل بجي بيدي بس 😂
انا : اهااا يرتاح زاتو من ده ما قدري وده ما لوني 😄تاني غيرت الموضوع وقالت لي جيتي كيف ومالك ما ظاهرة فالواتس ؟ اتصلت علي ايمو وبقينا ندردش قالت لي شكلك ما عاجبني انتي كويسه 💙 انا : ههههه اها ي امي التانيه كويسه الحمدلله
لدن : مااا مطمنه ليك 😒المهم قدرت أتخلص منها واليوم كلو منتظرة سامي يضرب لي وما ضرب ولا انا ضربت لامو زي ما وعدتو ، اتصل اقولها شنو بس ؟؟مرة الاسبوع كلو سامي ولا فكر يتصل ولا حتى رساله بالغلط 💔والموضوع كان مأزمني جدا والتاثير ظهر ف وشي امي وابوي وحتى مؤتمن كلهم بقولو لي شكلك ما عاجبنا بقولهم فتور بس من السفر والحوامه وامي اصرت توديني دكتور قالت لي انتي اصلا م نصيحه خليني امشي افحصلك بصعوبه قدرت اقنعها ، لدن جات ومشينا استقبلناها وهاك ي سلام واحضان وأخواتها دايرات يجن بجيتها شجن ومذن شبكنها جبتي لينا شنو وشنو
لدن : ااي انا عارفه المحنه دي ما ساي ي مصلحنجيات😄اخدنا قعده شويه وقلنا نمشي نخليها ترتاح، طول القعده ونحن بنتونس لدن كانت بتديني عين تفحصيه كده انا بس البفهمها وكل ما عيني تجي ف عينها بزوغ منها 😂لم جينا طالعين قالت بعدين تعالي لي دايراك
انا : كدي اخدي راحتك وانجمي بجيك بكرة حمرت لي 😒وطوالي جريت عندي مكوة مشيت عليها خلصتها واتصلت بسامي مكالمتين ما رد زاد لي زعلي زياده وطول الليل انا ببكي ومنتظرة يرجع لي بس ولا على بالو وعشان شنو ده كلو محتارة😭صحيت مصدعه وعيوني وارمه الحمدلله بلقى ابوي واخواني طلعو بدري
امي : 😯سجمي مالك عامله كده الليله لو حبيتي ما بخليك الا نمشي الدكتور
انا : يا امي بس انا ما..... قالت لي ما تبسبسي لي نصبح الواطه دي شويه ونمشي طوالي دايرة تموتي ي بت 😠راجلك يقول هاملنها
انا : ده كلام شنو بس ي امي
امي : ااي بس ياهو كده ، يا الله حنستها وقلت ليها خلاص لبكرة بس الله يخليك حتى قنعت😥بعد الضهر كده لدن جاتني تكورك ي زفته مش قلتي بتجيني بكرة من قبيل منتظراك
انا : مصدعه ي لدونه بجيك بعدين
لدن : اول شي قومي على حيلك، قعدت ليها ف نص السرير اها مالك وبعاين بعيد منها
لدن : رفعت لي راسي ختي عينك ف عيني
انا : لدنننن
لدن : الاء انا عاجناك وخابزاك فبطلي حركات وقولي لي مالك امك مشت بيتنا و قالت لي شوفيها مالا وشفقانه عليك 💔
انا : يخوانا مافي شي والله
لدن : اول شي ما تكذبي ✋ثانيا انتي قايله انا جيت بدري ليه ؟ لي فترة حاساك م تمام فالله يخليك ي صحبتي ما تهوفيني عليك انا عارفاك.كتومه وفضلويه زياده عن اللزوم بس مافي شي يستاهل زعلك والبتعملي ف نفسك ده ، فضلت ساكته ما ردبت عليها قالت لي مزعلاك.نسيبتك ؟ حماتك ؟ قلت ليها ليه هم بالزات الممكن يكونو مزعلني م تظني فيهم ساي ،، قالت طيب سامي ؟ انا م قدرت اتحمل وطوالي بكيت 😭 حضنتني عليها : بس بس احكي لي الحصل شنو انا ما مقتنعه انو سامي يزعلك ، وريتها الحاصل من الأول وزعلت جدا وهاجت وانتي تسكتي ليهم ليه سامي زاتو تقعدي عند حدو ويعرف هو متزوج منو الحي كلو بشهد باحترامك وتعاملك مع الاصغر منك قبل الاكبر اثناء حديثنا سامي اتصل ما رديت قالت لي انا م غالبني ارد بدلك واشاكلو ليك بس ما عايزة اتدخل بيناتكم واضخم المشكله ولازم تعملي حذر للتعامل معاه شكلو ود امو وبسمع كلامها من غير ما يرجعلك جد صغر ف نظري ومشت بيتهم ، سامي رجع اتصل سلم علي عادي وعاتبتو يعني لو ما اتصلت ليك امس ما كان هتتصل 😢سامي انت مالك ابدا ما دا سامي الانا حبيتو اهون عليك تعمل فيني كده
سامي : معليش حقك علي فالبدايه كنت زعلان منك لزعل امي وتاني انشغلت اليومين دي مضغوط الولد الشغال معاي مافي ، اتخطيت الجزء الاول من كلامو وسالتو عن حالو وقالي صوتك م عاجبني انتي كويسه
انا : هكون كويسه كيف وانت مخاصمني اسبوع بحالو
سامي : والله كنت مشغول قلت ليك ، اتونسنا حبه وبدينا نرجع لطبيعتنا شويه بس يبدو انو الفجوة الحصلت بينا ما هتنسد بل ماشه اوسع 💔العصر مشيت للدن مبسوطه وريتو انو اتصالحنا وكده 😊قالت لي الحمدلله ان شاءالله تاني ما يحصل خلاف بينكم بس نسيبتك ما هتريحك ي الاء وربنا يكفيك شرها 💙شغلتني بفتح الشنط والهدايا الجابتها لينا وشاكلتها ليه تعبانه قدر ده وطنشتني تماما 😂 ف الأيام التلت سامي كان بتصل لكن ما بشكل يومي لو اتصل يومين ورا بعض اليوم التالت بغيب حتى كلامو المعسول داك قللو شديد وطوالي ف حالة انا مشغول والحكاية دي مؤثرة فيني شديد 💘انتهت الاجازة ونزلنا السنه التالته وكنا مضغوطيييين لدرجه وانشغلت انا زاتي ،وفي يوم لدن جاتني فرحانه انو وأخيراً وائل اعترف ليها بحبو ونازل في اجازتها بتاعة السمستر يعمل خطوبه عشان يصادف ابوها وكانت متوترة وبترجف ما تشوفو طولة اللسان ده ساي😄فرحت ليها شديد تستاهل كل خير لدونتي ووائل كمان مافي منو 💙وفعلاً جا اليوم المنتظر وامورها اتسهلت الحمدلله وائل جاب اعمامو وخالو سعد طلبوها ، سامي كان جا ف اجازتي بتاعة السمستر وعملنا ليهم احلا خطوبه 😍وطلعو حلوين ولاقين على بعض جدا😘رجعنا بيتنا وطيلة فترة قعادي خالتي تطعني طوالي بخطوبة لدن وم كانت رضيانه ابدا مرة سمعتها بتتكلم مع خالتو حياة وبتقولها اولادنا الاتنين يطلعو من يدنا يسيبو بت خالم وبنات اهلهن ويمشو للغربه ؟ وكانت زعلانه شديد بس خالتو حياة نظرتها مختلفه عنها تماما دايما بتقول دي حياتم وهم اولى باختيار شركاءهم والحاجات البتسعدهم لانهم م صغار وعارفين مصلحتم كويس💛 💛 خالتي معاملتها لي كانت ككععبه وكم مرة حصل نقاش بينا انا وسامي وهي كانت السبب بطريقة غير مباشرة واستخدمت حيل كتيرة ونجحت فيها ، فالفترة دي سامي اتغير شديد كان بعاملني عادي كانو بقضي واجبو ناحيتي وبس ف لحظه نسى كل الحب الكان بينا 💘واصبحت علاقتنا بارده وجافه شديد وبدأ الملل يدب فيها اشتقت لسامي القديم لضحكتو وتشغيلاتو ورومنسيتو وحنيتو الزايده لا وكمان جاني بحجه جديده قالي لم تاجزي نهاية السنه دي هنمشي نقابل دكتور ونشوف موضوع الحمل ده ، طبعا خالتي داخله ومارقه مافي على لسانا غير اني اتاخرت فالحمل ما اهتميت ليها بس سامي الكان بقولي انا زاتو ما عايز اطفال غيرك في حياتي انتي كل شي بالنسبه لي انا مكتفي بيك انتي وبس💙 وين راح كلامو ده ؟ المهم قلت ليه يحصل خير ان شاءالله ، عدا يومين وسافر وانا رجعت اهلي ورجعنا لدرش الجامعه ومشغوله بالتغيير الحصل بينا ده 💔، الكان مخفف علي الزحمه الجواي دي فرحة لدن بوائل وهي بتحكي عنو بتمنى ليها من كل قلبي حياة افضل من الانا شايفاها دي ويفضلو يحبو بعض كده بنفس الطريقه 💜في عز ضغطة الامتحانات ساميه اتصلت علي وقالت انها مسافرة بعد يومين لراجلا رسل ليها زيارة انا وامي شلنا شوية حجات ومشينا ليها عصريه كده خالتي ما قصرت ف استقبالها لينا كعادتها غ ير سلمت ومشت قالت بستاذنكم عندي مشوار اخدنا قعدتنا مع ساميه وودعناها وطلعنا ،، عدا السمستر السادس بسلامتو وحصلت لي فيه حاجات كتيرة ف غنى اني احكي عنها 💘اظن السمعتو كفاكم وزياده✋😢والاجازة كانت شهرين سامي جا مخصوص عشان الفحص زي ما وعدني وانا قاعده معاهم فقدت ساميه شديد كانت مرفقاني شويه ومرت علي مواقف عمري ما اتوقعت اني اتخت فيها وحصل الما كنت متوقعاه ولا خطر ببالي يوم 💔💔
ﺑﻴﻦ ﺻﺒﺎﺡِ ﻭﻣﺴﺎﺀٍ ﻳﺘﻐﻴَّﺮ ﺍﻟﺰﻣﺎﻥ ..
ﻭﺑﻴﻦ ﺯﻭﺍﺝٍ ﻭﻃﻼﻕٍ ﻣﺴﺎﻓﺎﺕ ﻣﻦ ﺍﻷﻟﻢ ﻭﺍﻟﺤﺮﻣﺎﻥ ..
ﻭﺑﻴﻦ ﺣﺎﺿﺮٍ ﻭﻣﺎﺽ ﺭﻗﺪﺕ ﻗﻠﻮﺏٌ ﻭﺗﺎﻫﺖ ﺧﻄﻰ
ﻭﺑﻴﻦ ﺃﻧﻴﻦ ﻭﺿﺤﻚ ﺃُﻃﻔﺄﺕ ﺳﺮﺝٌ ﻭﺗﻐﺮﺑﺖ ﺃﺭﻭﺍﺡ !👋👋👋
