ما ذنبي لاكون فصليه

البارت الثامن

ماذنبي لاكون فصليه
بقلمي elegance-Girl
البارت الثامن

هلاو حبايب شلونكم رجعت وياكم ببارت جديد ان شاء الله ينال اعجابكم واتمنالكم قراءه ممتعه 🌹🌹🌹🌹🌹...

الشيخ فيصل:-اي اشردي خنشوف لشوكت تبقين شارده من الشيخ فيصل (رحت للديوان عدنه كعده ما ادري شلون خلصتها وبالي يم ملاكي بعدين رحت للجامعه عندي اجراءات خلصتها ورجعت للبيت )...

افنان:-مثل كل يوم بعد الريوك كل واحد طلع على شغله بقينه بس احنه بالبيت رحت نضفت المطبخ وخلصت وبديت بتنضيف البيت اجتني خالتي

رباب:-افنان ما خلصتي تنضيف

افنان:-بلي خاله بعد شي قليل

رباب:-خوش جا اليوم اريدج تنضفين غرفتي وخلي الغده ام محمد تسوي

افنان:-اي تدللين (راحت بس اني بقيت بصدمه معقوله هاي رباب لو غيرها منين طالعه الشمس اليوم شو مرزلتني لا وبعد اخذت الطبخ مني هاي معجزه يله بلكي الله صلحها)خلصت كولشي بأيدي ورحت لغرفه خالتي نضفتها وطلعت رحت للمطبخ لكيت ام محمد دتسوي غده حجيت ..خاله محتاجه شي

ام محمد :-لا حبيبتي روحي ارتاحيلج شويه تعبتي انتي

افنان:-ماشي اذا احتاجيتيني بشي صيحي عليه صعدت سبحت وبدلت ونمت ما احس اله وخالتي تصيح يمي

رباب:-كوومي الله يشل حالج مثل ماشاله حالي بجاه الحسن

افنان:-خاله شبيج شنو صار؟

رباب:-ومسويه نفسج فقيره وما تدرين شصاير ولج انتي احقر وحده شفتها بحياتي

هبه:-يمه ليش نظلم البت وندريها ماتسويها

رباب:-انتي اسكتي ولا كلمه محد غيرها يتجرأ ويسوي هالعمله

افنان:-بس فهموني شكو

رباب:-المحبس مالتي مبيوگ اكيد انتي البايگته

افنان:-بصدمه اني ممديت ايدي ع شي هاي مو اخلاقي

رباب:-يا اخلاق هاي الكاعده تحجين عليها يامجرمه مو انتي واهلج الجتلتو (قتلتو) ابني وحرمتوني منه مو بعيده تبوكين محبس اكيد طمعتي بي من نضفتي غرفتي لان فكر

افنان:-(بعصبيه ودموع)لهنا وبس اتحملت كولشي منج ومحجيت بس لان انتي اكبر مني وام الشيخ اني بنت اصل وعز ومو من اخلاقي امد ايدي على شي اني تربيت على الاحترام والقناعه ومو بحاجه لمحبس اجيبلج 10 مثله الحمد لله والشكر احنه واصلين ومثقفين والنه سمعتنه ومقتنعين بالعدنه (جنت احجي وهي ساكته انصدمت لان اول مره ارد بوجها وادافع عن نفسي)