لسحرها انحنت الجبال ♣ عندما تعشق الزعيمة ♣

part 25

بدون سابق إنذار سراب تلاحت فحضن آدم لي مستغرب و خايف فنفس الوقت عليها و على حالتها لي عامرة كلها دم

بقى كايدوز يدو على شعرها كايهدأ فيها و هي نسات الألم و نسات كولشي أول مرة تحس بالراحة أول مرة تحس أنها في أمان تمنات تبقى حياتها كلها فحضنو ولكن تجري الرياح بما لا تشتهي السفن

بعدها منو وشد وجهها لي كان بارد بين يديه

آدم :( بصوت مرتعش ) سرراب علاش نضتي من الفراش ( شاف فالأرض و فالدم ) آش هاد الحالة

سراب : مابغيتش نبقى فهاد البلاصة يالاه نمشيوا

آدم : أصلا هادشي لي كنت كاندير ولكن فاش جيت لقيتكي فهاد الحالة

سراب :( بعدات منو ) يسحاب ليا تقلقتي مني كنت كانعيط عليك و ماكاتجاوبنيش

آدم هزها بين يديه و هي كاتفركل

سراب :( كاتشوف فالناس لي كايشوفوا فيهم ) آدم نزلني نزلني راه كولشي كايشوف فينا راه حنا فسبيطار

آدم :( ضحك و باسها فحنكها و ووقف و شاف فالناس ) واش كاتشوفوا يا هاد الناس أنا كانبغيي هااد المررى و بغييت نكممل معااهاا حياااتي

سراب بدات كاتسد ليه ففمو بينما الناس لي عجبهم هاد المنظر الرومانسي و بداوا كايصفقوا و يهنؤوا فيهم نساوا المرض و نساوا بلي كاينين ناس مراض فالمستشفى و كانت هاد اللقطة كفيلة باش ترجع ليهم الأمل فالحياة

عيط على الممرضات و حط سراب فالسرير لي كانت كاتخنزر فيه على هاد الشوهة

الممرضات نفسهم لي كانوا كايهضروا عليهم بقاوا كايحنززوا فيهم

سراب :( قلبات التخنزيرة لعندهم ) ماتgولوش ليا جيتوا باش تبقاوا تحنززوا فينا

هزوا ليها اللبسة دالمستشفى و بداوا كايشوفوا فبعضياتهم

الممرضة : الجرحة تحلات ليك و خاص نعاودو نخيطوها خاصكي تصبري حيت مانقدروش نديروا البنج فالحالة ديالك

سراب : مادازت تا الساعة و تحلات الله يا ودي على أحسن مستشفى فأمريكا

آدم :( حط يدو على شعر سراب ) هادشي حيت نتي كاطيري و ماكاتهتاميش بالصحة ديالكي 

سراب بقات ساهية كاتتفكر أشرف و الطريقة لي كان كايورك بيها على الجرحة 

آدم :( دوز يدو على شعرها ) سراب راني كانهضر معاك

سراب :( انتافضات ) ماعرفتش كيفاش ( شافت فالممرضة ) غير ديروا خدمتكم

وسط هاد الهضرة دخلات الطبيبة لي كانت يالاه جات من دارها باقة مالابساش الطابلية كانت مقادة راسها شافت فسراب و ابتاسمات بلطف و حولات أنظارها لآدم قربات عندو و حطات يدها على كتفو