بدون سابق إنذار (هشام💑هيام)

الحلقة5

يسوق و شاد التيليفون و يبان منارفي  ...
: شكون هاديك الطورو لي زدمت عليكم قبيل و نتا باقي ساكت كالولية و هي تبهدل فيكم
: خاطر و كان نزيد نهدر راها ماتسكتش سييت مرة نهدر لمت عليا أمة محمد ... و كان مازدتش نتا معاها كانت رايحة تفيبري شوية و تسكت بصح نتا درت الزيت على النار
: و كان ماجاتش بنت نقسمها بين زوج ... بنات كيدايرين لا حشمة لا زدمة  ...خت ايناس؟
: لا بنت عمها و جايا نافخة روحها تقول غي هي بنت فوق لرض راها مكرها لايناس حياتها خاطر يعايروها عمومها و باها بيها فالدار و يقولولها كوني كيفها
:🤣🤣🤣🤣 كيما هاديك الطورو ايناس ضريفة و حسها ماينسمعش ... و هاديك محيرقة و طرطقت... يا لطيف  فسدتلي نهاري الله لا يعاود يلاقيني بيها

# ههههه يااك حتى نتا راك تدعي و تتمنى بصح .... 🤔🤔🤔
...........

نوليو لايناس لي لمت قشها و صوالحها باش تروح للاقامة وين تقرى
لمت صوالحها و جات خارجة و باها كان يسنى فيها برى ... تفكرت مها كي كانت تجي رايحة تقرى لليسي و تبوسها و تقولها الله يسهل و تدعيلها طاحت دمعة سخونة على خدها مسحتها و راحت 

وصلت للاقامة سلمت على باباها  ووصاها باش تنتبه على روحها و تبعد على المشاكل
"يا المشاكل هو ما يجيو عندي ماشي حتى نروحلهم يبغيوني و يعزوني🤪"
دخلت تلاقات صحاباتها قعدو يحكيو  عاود راحت قرات واش عندها الغدا (نحضر الدروس نضل نخبش يا جدكم🤣)
رقدت و ناضت داك النهار ناشطة كيما موالف صحبتها اللي معاها فلاشومبغ تنخلع فيها
شهرة :تحسب راها رايحة لكاش عرس بالفرحة هاد البنت ماشي رايحة تقرى و تشوف كمامر هادوك لي  بروف المعوجيين
: سكتي و نوضي وجدي روحك شوفي حالتك تحسب كي ديك اللي دايينها دير جلسة صلح مع راجلها لي باغي يطلقها 🤜
شهرة: و انا نقدلك راني نايضة

راحت قرات صباح و عشية ماكان عندها والو قرت تروح للعيادة الخاصة تاع مرت عمها لي قريبة للجامعة ... هي موالفة تبغي تروح تتعلم منها و تعاونها  باش كي تكمل قرايتها تولي تخدم معاها

راحت لقات عندها المرضى بزاف بقات تعاون فهادوك الطبة لي تم و تمشي فالكبار فلاج و ضحك فالصغار باش تلهيهم حتى شافت  واحد داخل و رافد بنت مجروحة من يدها تبان كانت باغية تنتحر
جرات ليه بلا ما تشوف فيه و هو تاني ماحوسش ينتبهلها مكترة الخلعة لي كانت فيه