بدون سابق إنذار (هشام💑هيام)

الحلقة 19

من بعد الناس كامل روحو  هشام حاول يهدر مع هيام بصح هي ماعطاته حتى فرصة ...
بقى يعيطلها ما ترفدش عليه
مرة زيفطلها ميساج قالها لا يقدر يشوفها خاطر غدوا راه مولي للخدمة... و راه محتاج يهدر معاها
ماردتش عليه
هو راح لخدمته و هي ولات تقرى و فاتو اليامات هاكاك غي روتين.....
كان كل يوم يعيطلها و هي ماترفدش.... حتى وحد نهار بدلت كامل نيميرو تاعها...
كان داير كي يولي للدار أول حاجة يديرها يروح يشوفها ...
من بعد شهرين ولا للدار و قال ليماه إلى كان راها عادا تتواصل مع هيام خاطر حاب يهدر معاها فاجآته بلي هيام راحت لفرنسا عند خالتها تكمل قرايتها يعني منا على عام إلى ولات ...

هو راح هدر مع باها  و طلب يدها و باها وافق عليه و قاله إلا وافقت هيام ماراحش يلقى ما خير منه ليها  و كي تجي رايح يقولها على الموضوع
بقى يستنى فالنهار اللي  تولي فيه هيام  و حس بلي العام طوال عليه ... كيما حاول باش يتواصل معاها ماقدرش كانت دايمن تبلوكيه  " صحا يا لالة غي سناي تولي لا ماوريتكش الهدرة كيش دايرة "

بقى ينسي فروحه عليها بالخدمة و فاتو يامات و. شهورا حتى جا النهار اللي قالوله فيه بلي هيام راها مولية البلاد ...
و هوما يستناو فيها فالمطار كانت المفاجعة ههه
هيام نازلة مالطيارة بجنب واحد يبان فالزين تركي و لا روسي
سلمو عليها و هو باقي واقف معاها ...
بقاو غير يشوفو فيه .. و هو غير يشوف فيهم:" اييه نسيت معرفتكمش بجوناثان"
ليليا:" شكون هاد الشامية لمعسلة يا مامي 🤩"
ايناس:" هيام ماتقوليليش جبتيهولي كادو من فرنسا... نحبك بنت خالتي نحبك"
هيام :" تحبك حبة بعدو عليه داورتو بيه كالدبان ايا بعدو جدكم... "
ايناس عرفينا بيه 🤩🥰
هيام:" بعدو صيدته ليا هادا دور بيه وحدة فيكم نقسمها .. هادا جوناثان و روسي يقرى معايا و جبته نعرفه على بابا رايحين نتزوجو"
ركبو فاللوطو و راحو للدار
جوناثان كان حاب يروح للاوتال  بصح هيام اصرت باش يروح للدار يشوف باها.....
جوناثان:"  honey your country is  beautifull"
ليليا:" سمعتو قالها honey😭😭😭😭"
هيام:" خمسة و خموس يا ربي تبعد العين علينا  عينك حارة تصرالنا حاجة نطيرهالك"
وصلو  دخلو ... دخلت هيام و فجنبها جوناثان🤭
و تصيب هشام مريح مع باها يستناو فيها كان دايرهالها مفاجأة بصح ماشي قد المفاجأة اللي وجدتهاله هي ....
:" هيام بنتي شكون هاذا؟"
:" هادا بابا كان يقرى معايا و جا باش يطلب يدي منك "
هشام هنا و لا وجهه ما يتفسرش
جناثان:" hi phather "
:" واشبيك هبلتي واش راكي تخلطي نتي !؟"
:" راني نهدر مع بابا واش دخلك نت!؟"
دخلت جداتها و ضربت في صدرها:" ها تبهديلتي باغية تدي واحد رومي لا ملة لا دين"
:" لا دخل للاسلام ميمة و الله يعرف يصلي خير منك و ما يأجلش الصلاة كيفك سيرتو كي تكوني فكاش عرس و تخافي تفوتك كاش لقطة"
:" هيام في بالي ناضربتكش في صغرك عليها طوال لسانك"
:" و الله يا بابا لا ناس ملاح شوف البراءة في وجهه 😢 و حابة نعيش في فرنسا  "
:" تقدري تعيشي تم بلا ما تدي هادا راه ماشي من طبايعنا نديو اللي ماشي من ملتنا"
ليليا و ايناس:" واه عمو باينة نا يفهم والو فالدين"
هيام:" عارضولي سورة الفاتحة يا الائمة "
ليليا و ايناس:"😰😰😰😰"
:" بابا ياك  قتلي دي لي تخيريه..  هاني خيرت ... الصراحة مانيش باغية  ندي عربي و الله و نديه  صومالي و لا من ادغال افريقيا..."
هشام كان باغي يروح يعطيها بزوج كفوف واحد ما يشبه لخوه  ...
باها تاع هيام :" مالتالي نساي باش نرضى هاد الزواج"