انا قبل كل شي 🥀 ( روايات ليبية )

حلقة 5🔥

رواية #انا_قبل_كل_شي
( حقيقة ممزوجة بلواقع )
للكاتبة #جوري_زايد
الرواية بلهجة الليبية
حلقة 5🔥
.
❤
بدت عُلا تسأل في اسألتها  وكانت امركزه معاه في كلامه وعيونه وبعد يكمل تبتسم ابتسامه خفيفه وتعطي رايها بالكلام عشان خالد يفهم شخصيتها وطريقة تفكيرها 💙
سألاته عن الدارسه والعمل واهدافه ومستقبله وعن الكتب والفن والصداقه والحياه بصفه عامه ...وكان خالد منجذب لها واجد بتفكيرها وصوتها وحركتها وتصرفاتها وحتي اسألتها اللي ساعداته ع انه يكتشف شخصيتها ،وتعابيرها وايحاءاتها ولغة الجسد اللي كانت توحي بالذكاء والثقه والرقه والانوثه 😍وفي النهايه
عُلا :عطيني فرصه اخيره انفكر وانرد عليك 🙊🙈
خالد بنظرة اعجاب : خوذي راحتك ولو كان ردك بالموافقه حنجي للحاج طول
عُلا :ان شاء الله ربي يسخر الخير
خالد :ان شاء الله
عُلا خذت شيتاتها والبالطو ووقفت :نستأذن منك نوسه اتراجي فيا ف المصلى
خالد :خطرها ع نوسه شن قصة الكلام اللي طالع عليها 😕
عُلا :اي كلام 😳
خالد : انها مش تمام وتحكي مع اي حد عادي ومن هالكلام
عُلا مصدومه :😳تي امتى صار الكلام هظا ؟؟
خالد :كيف انتن مش قاعدات ف الجامعه ؟
عُلا :قصدي اننا لاحظنا تغير نظرات لنوسه لكن ماسمعنا شي💔
خالد :هظا اللي صار ،وانا متأكد ان في حد لاعبلها لعبته
عُلا :حسبي الله ونعم الوكيل 💔المهم نا توا بنعديلها وان شاء الله خير
عُلا في طريقها للمصلى شافت ايمن مع ضحيه جديده له 💔وجت عيونهم ف بعضهم
ايمن يبحت فيها اكويس واعيونه بيطلعن وفي عقله يقول : كنها رايحه متغيره وااااجد تي رايحه جميله وانيقه
عُلا بحتت فيه نظره كلها ثقه ووقوة شخصيه وابتسمت ابتسامه هزوه وكملت طريقها
ــــــ
في المصلى
عُلا :انا جيت 😊
انا :نورتي 😘شن صار معاك؟؟
عُلا :حكينا وقتله يعطيني فرصه انفكر للمرة الاخيره وانرد عليه
انا :انتي تستاهلي الاحسن والافضل في كل شي وان شاء الله ربي يسخرلك اللي فيه الخير😘
عُلا :نجك ليااا 🙈🙊اجمعين يارب 💙
وطلعنا جهة الباركي
عُلا تذكرت كلام خالد عن الكلام اللي طالع عن نوسه
عُلا :اممممممم نوستي
انا :عيونها
عُلا :تعرفي انتي طيبة ونيتك نظيفه واتحبي الناس واتحبي اتساعديهم ومستحيل ربي يزعلك ولا يخذلك ،حيعطيك وينصرك ويفرح قلبك كيف مااتفرحي في الناس❤
انا :تسلمي بسسس كنك شن في؟؟
عُلا وعيونها امدمعه :مافي شي امغير حسيت روحي تعبتك ورايا واجد
انا :كم مرة انقولك معش تحكي هك انا وانتي واحد 😘بس قوليلي شن امزعلك
عُلا بتغير الموضوع :مش زعلانه تعالي نحكيلك
انا :احكي
عُلا: ياحنه شفتلك ايمن مع بنت شكلها صاحبته الجديده وقعد ايبحت فيا عيونه قريب يبلطن😏
عطيته نظرة استحقار وكملت طريقي 😎
انا انغني بصوت واطي : عرفت تغير من نفسها لدرجة اني لما شفتها ف الاول ماعرفتهااااش 🎵عملت كل حاجه بحبها نفذت كل كلمة قلتها ياريتني كنت ماسبتهااااش💔*ماهو ده اللي عايزه اتوصلني ليه حبها اندم عليه واتعب من بعدهااا 💔انا نفسي اسألها بس ليه ماحصلش معايا ليه واتغيرت لي اناااا😞
عُلا :نوسه تشعر بانها تامر حسني 😂😂كنك 😳
انا :صقع عليك وعليه 💁‍♀الاغنيه هذي اتعبر عن حالة ايمن لما شافك 😉
عُلا : 😂😂😂بس نا مادرتش شي يبيه درت اللي نبيه #انا 🙊🙈
انا :مو انتي ركزي ع اخر مقطع حتفهمي 😌👌
وقعدنا انراجوا ف ٱباءنا يجوا وفتحت نت لقيت مسج من محمد 💔
انا :😳
عُلا :كنك
انا :محمد 💔
عُلا :كنه ؟؟
انا :شوفي 😔
لقيته دازلي سكرين شوت لتعليقات شاب ع بوستات انزل فيهن في قروب الجامعه ومن طريقة التعليق واضح للي يشوفهن ان في شي بيننا ومحمد كاتب ربي يحفظه لك وامغير كنيتي ع ماسنجر من *كيساكي *لـ *نوسه*
عُلا :هظا كنه 😳
انا :مش عارفه 😞
ورديت عليه :كنك شن في؟؟
محمد كان فاتح ورد عليا طول :وتسألي كني؟؟شوفي السكرين حتفهمي
انا :تعليقات ع بوست نزلته ف قروب الجامعه 😕
محمد : من هظا ؟
انا :مانعرفاش
محمد :وكيف ايعلقلك هكي؟
انا :قتلك مانعرفاااااش
والله مانعرفه 💔
محمد :اوكي باه 👍
انا :شكرا ع الثقه سلام ✋
وصكرت نت
عُلا :من اللي امعلقلك  ؟
انا :مانعرفاش 😒
عُلا :باهي انتي ماتعرفيشي كيف يعلقلك هكي؟
انا :عُلا 😒😒
عُلا :يا قلبي قصدي ان ممكن حد عارف بان محمد يبيك و عارف انه يشوف في بوستاتك ف القروب والتعليقات فعلق هك عشان محمد يخونك ويفوتك ولا مااتجيش؟؟ 😕
انا :بشريه توقعي منهم كل شي
وروحنا
ــــــــ
في حوشنا
خشيت ركبت للدار طول
غيرت دبشي وتوضيت وصليت وكنت مضايقه بكل قعدت نستغفر لين تريحت غفيت اشوي ونضت ولما   فتحت نت وصلني مسج
محمد : الموضوع مش موضوع ثقه يانوسه انتي عارفه اني واثق فيك وحتى لو حطيتك بين1000شاب عارف مستحيل واحد فيهم يهز شعره منك بس انا شاب و #انغار يعني تبيني انشوف تعليقاته  ونسكت 😞؟؟
انا قريت كلامه ومارديتش صكرت نت ونزلت درت *مشروب النعناع وحليته بعسل مع قطرات من زيت حبة البركة * المشروب هظا معروف ف تصفيه وتقوية الذاكره 😍
خذيت المق و ركبت نبي نقرا عشان الامتحانات قربت
ـــــــــ
عند عُلا
صلت عُلا استخاره في موضوع خالد ودعت ربي يسخرلها الخير ويرزقها بالزوج اللي يحبها ويخاف ربي فيها ومااتهون عليه في شي ويساعدها ف تحقيق اهدافها واتكون شخصيته كيف ماتتمنى ودعت لنوسه ربي ينصرها عاللي تكلم عنها بالباطل وشوه سمعتها💔 وبعد كملت قعدت اتفكر بين انها تحكي لنوسه او تسكت وليش صار هكي اصلا مع ان نوسه طيبة واتحب الخير للكل ؟؟ومن ورا الكلام اللي اتقال🤔
ـــــــــ
عند مروان
مروان يحكي مع صاحبته فون
ايناس :خطرها كنه معاذ يومتها شفته معاك وامعصب
مروان : تعارك مع ربيع عشان نوسه
ايناس :كنها نوسه؟
مروان :ربيع يحكي ف الكلام اللي انقال عنها وقال انها حكت معاه وقالت انها معجبه بيه ومعاذ عصب وتعاركوا
ايناس تضحك :😂😂😂😂ينعنجد الكذب توا ربيع مالقا مايكذب غير علي نوسه 😏 يا بيب نوسه معروفه مش اي حد يلفت انتباهها ولا اي حد يعجبها ولاترفع عينها في اي حد يابال لو كان ربيع اللي يتغزل ف البنات 24ساعه 😒
مروان :تي سنكوح ماعنده سيره غير ان البنات ميتات علي وجه
ايناس :وبعدين الكلام اللي انقال عليها صدقني مافيش منه امغير هك في ناس راس مالها تشويه السمعهمروان :انا توا في معاذ
ايناس :تي كنه 😳
مروان :امكبد ع نوسه والله ماني عارف شن نبي اندير معاه
ايناس :اهااااا فهمت هظا ليش تعارك مع ربيع😁
مروان : اكتشفت ان جلدتك غليظه😒ومشكله هذي 😓
ايناس :😂😂😂خزو
اسمع حنحكي مع نوسه وانشوف رد فعلها 😉
مروان :امممممم انتي اتشوفي هكي؟؟
ايناس :يس ،لو تقبلت الموضوع اتقوله ولو ماتقبلت يطلعها من راسه
مروان :مفكره يالعطيبه 😁
ايناس :شفتني كيف 🙊🙈
مروان :خلاص ادويلها وجسي نبضها
ايناس :تم يااعيوني 🙈
ـــــــ
بعد اربع ايام
عُلا :نوسه يا نوسه يا حتة سكره 😍
انا :عيون نوسه
عُلا :بنقولك🙊🙈
انا :شنو؟؟
عُلا : بصراحه انا معجب بيك ونبي نرتبط بيك😍
انا : معلش انا مش للعلاقات تبيني تعال لهلي 🙊😂😂😂
عُلا :😂😂😂😂😂 عطك عصيده
انا :بالسمن ولا بالزبده 😜
عُلا :😂كنك رايحه سامطه انتي
انا :تعلمتها منك الله غالب 😌
عُلا :ناعليا نا 😍باهي اللي حصلتي مني فايده😂😂هئحم  خلاص اشوية عقل لو سمحتي 😌بنقولك🙈🙊
انا:قولي انطقي هالجوهره
عُلا :فكرت في موضوع خالد 🙈
انا : بااااااهي😏
عُلا :ولقيت فيه الشخصيه المطلوبه 🙈
انا :تمام ؟؟
عُلا :واتخذت قراري بعد الاستخاره اكثر من مره 🙈
انا :اهااا😍
عُلا :حنوافق عليه 🙊🙈
انا :وأخيييييييييرا بنديروا فرح 👏👏ياخيه ربي يتمملك ع خير 😘
عُلا :تسلميلي 😘
وكلمت عُلا خالد وحددوا يوم عشان يجيب اهله يخطبوا❤
ــــــ
يوم الخطبه في الصبح
عُلا : الو صباحوو نوستي
انا :يسعدلي صباحك
عُلا :نوستي تقدري اتجيني محتاجتك معايا اليوم
انا :انشوف بابا وماما وانقولك
عُلا :حاولي 😍
انا :حاااظر،اشوي انشوفهم وانرد عليك
عُلا :تم
انا جيت لبابا وماما وقلتلهم ان عُلا تبيني معاها وطبعا لانها المقربه مني وعارفينها اكويس سمحولي انعدي وشايلني بابا ❤
ـــــــ
عند عُلا
جهزنا كل شي تمام وبدت عُلا اتجهز في روحها
عُلا :امممممم نختار اي فستان !! احمر؟
انا :🤔انننلا
عُلا :ازرق ملكي؟؟
انا :اننننلا
عُلا: 😒😒
انا :اهوه 😍
عُلا :وريني ؟!
اخترتلها فستان قصير للركبه لونه سماوي وفيه ورد ازرق ووردي ربع كم ومن فوق فيه حرير سماوي هاااادي💙 وفيه فيونكه من لاورا ومن تحت فيه نفشه حلوه مع شوز ابيض فيه فيونكه سماويه 🌸واكسسوارات خفيفه *عقد واسواره ودنانين ناعمات وهاديات بكل وساعه لونها وردي هااااااادي وللشعر فيونكه ورديه اما الميك اب درته لها خفيييييف عشان ملامحها الحلوه اتبان😍وعطر Si 💓 كل شي جا عليها خيااااال بكل 😍كل شي يوحي بجمالها وجمال شخصيتها و روحها وانوثتها ورقتها❤

عُلا وفقت قدام المرايا وتذكرت روحها قبل كيف كانت وكيف تغيرت في كل شي :سبحان الله قبل 3شهور كنت انسانه واليوم انا انسانه ثانيه بكل😎
وكان همي ان ايمن ايحبني واليوم ربي سخرلي شاب من خيرة الشباب عجبته وحبني وهو اللي اختارني شريكته 🙈
قعد عندي اهداف وطموحات نبي انحققها مش عايشه ع الهامش كيف قبل 💔 الحمد لله ع كل شي ❤
انا : لانك غيرتي نفسك ربك غير كل شي عشانك ولانك حبيتي نفسك وقدرتيها لقيتي من يحبك ويقدرك 😍
عُلا :لولاك كنت مازلت كيف ما انا 💔
انا :لولا ربي و قرارك ف التغيير اما انا سبب بس سخره ربي لك
عُلا :ربي يحفظك ليااا 😘
انا :و يحفظك ليا 🌸
ونحنا نحكو خشت ام لولي اتكلمها تطلع للعرب
عُلا :متوتره يانوسه 💔
انا :لالا مافيش داعي للتوتر كل شي حيمشي تمام خليك واثقه من نفسك ومتأكده انك حتعجبيهم 😘
عُلا :نجك لياااا 🙊🙈هيا طالعه كسدي ع النت علي ماجيتك
انا :ههههههههههه باه
وطلعت عُلا لعربها وكانت جميله بكل 😍ضيفتهم وقعدت معاهم
ظهرها واكتافها كانت مفروده ورجليها في نفس الاتجاه ،حركتها ولغة العيون ولغة الجسد وابتسامتها وصوتها كانت كلها اتعبر عن شخصيتها وقمه ف الكياته 🌸
وعجبت ام خالد بكل سواء ف شكلها و شخصيتها واسلوبها
وفي الوقت نفسه انا كنت ف دار عُلا امكسده ع نت
لقيت طلب اضافه من ايناس وقبلته لانها من دفعتنا وبعد القبول
ايناس : خيرات نوسه كيف حالك 😊
انا :تمام الحمد لله وانتي؟؟
ايناس :يستاهل الحمد
تمام بخير
انا :دوم ان شاء الله
ايناس :تسلميلي
انا :الله يسلمك 😊
ايناس :نوسه بنقولك
انا :نعم
ايناس :........
#يتبع
رأيكم