رواية #انا_قبل_كل_شي
( حقيقة ممزوجة بلواقع )
للكاتبة #جوري_زايد
الرواية بلهجة الليبية
حلقة 9🔥
❤
مرن الشهرين والحمد لله كملنا سنة الامتياز و تخرجنا ونجحنا ف الدور الثاني للمعهد وتخرجنا بنسبة عاليه من المعهد😍
عُلا : و اخييييييييرا تريحنا 😍
انا :الحمد لله 💙
عُلا :من اليوم حنبدأ نهتم بنفسي اكثر وانطور منها في كل شي وحنبدأ نشتغل ع اهداف جديده💓
انا :اكويس بكل ...كيف حتديري؟ 🤔
عُلا :اولا حنقسم وقتي بين علاقتي بربي ونفسي وعيلتي وخلودي🙊🙈
حنخصص كل يوم نص ساعه نتعلم فيه شي جديد كيف ماقلتيلي قبل 😚 طبخ وميك اب ورقص شرقي واشغال يدويه ولغات وبنشترك في دورة تصميم ازياء 😍خاطري فيها من زمان 💓وتي روحك بنقعد فاشن ديزاينر 😎
انا نضحك وبصوت واطي:😂😂😂هابا شافت روحها من توا هذي
عُلا :شن قلتييي 😏
انا :😂😂😂شي🤭قلت ناعليا منك اتهبلي😍
عُلا :شكرا شكرا عارفه روحي 😌✋قوليلي انتي توا شن حتديري ؟؟
انا تنهدت وبصوت هادي :حددت هدفي من فترة وحنبدا تشتغل عليه ونثبت صحته وان شاء الله ربي يقدرني💙
عُلا :الشلل قصدك ؟
انا :يب
عُلا :امممممم ليش واثقه انتي انه له علاج وانك تقدري اتعالجيه؟
انا : واثقه بربي مش بنفسي ،عارفته هدف كبير وصعب وممكن ننجح فيه او ممكن لا وحيشوفوه مجنون لكن مش حنتخلى عنه اكيد في علاج يا عُلا من حقهم يمشوا ويتحركوا كيفنا
عُلا : في كل مرة نكتشف انك اروع من قبل 😍ربي يوفقك ويقدرك ع تحقيق هدفك 😘
انا :اجمعين يارب 🌸
ـــــــ
عند محمد
امه : باه انت لعند امتى بتقعد هكي ؟حوشك وواتي ليش ماتبيش تجوز
محمد :عشان مانبيش نجوز 😂 ياامي الزواج سريبه سريب ونا اتشوفي فيا ماعنديش وقت
امه :ريتوا العيل😒بالك رئيس ليبيا ونا ماعنديش علم ؟يااوليدي الشباب كلهم يشتغلوا ويقروا ويجوزوا عادي انت اللي حاصل ف روحك 😒
محمد :الموضوع هظا امطلعه من راسي توا
امه :باه لعند امتى ؟
محمد :لعند ما ربي يسخره
امه :باه شن رايك نخطبلك بنت قريبتنا والله البنت ماشاء الله عليها سماحه واخلاق وشطاره 😍
محمد :امي تشعر بانها ام زكي 😂 والله ياامي سماحتها واخلاقها وشطارتها لروحها انا شن نبي انديرلها ؟؟
امه شلطاته ع ظهره: 😒تي انت كنك هكي حاصل ف روحك بالك مسحور ياليد ؟
محمد : 😂😂لالا مااتخافيش الجنون حيقولوا هظا حاصل ف روحه فكونا منه🤭
سلوى : بالك امكبد يا ماما ومايبيش يقول 😏😍
محمد : 😂😂😂اشقي بقرايتك انتي واسكتي
سلوى :ماهو ها شن بنديرولك مافيش الا هك😌
محمد : عقلك عدا بعيد ياحنه 😒
سلوى :صدقتك ياباتي 🤭
*سلوى هي اخت محمد الصغيره طالبة اعداد *
محمد :انا طالع للصيدليه تبوا شي ؟
سلوى :توبو ولا كرينتو😂😂😂😂😜
محمد : 😂😂😂 سوط سوداني
سلوى : سوط ولا صورة 😂😂🤭
محمد يضحك وعزق فيها المخده : 😂😂😂تي اقري علي حالك
سلوى :نقرا ولا نكتب 😂😁
محمد :تي 😂
سلوى :خلاص والله اخر مره 😂😂🤭
امه :نبيك اتفكر في الموضوع
محمد :اي موضوع🤔؟
امه :البنت اللي حكيتلك عليها
محمد :كنها 😕؟؟
امه :محممممممد😒
محمد :قتلك ما نبيش نجوز انا ،هي سلام
وطلع وبينه وبين نفسه
مازلت انحبها هي ومش قادر انفكر في غيرها مانقدرش نظلم بنت الناس معايا 💔
ـــــــــ
وبعد ست شهور
انا درت ماسك لشعري وحمام مغربي منزلي😍 ودوشت ودلعت روحي وجهزت كتابي اللي حنقراه وخذيت مانيكيري الدمي ونزلت لقيت مروه مع ماما🌸
مروه :يااعميمه اتسلم عليك امي واجد امبدري كلمتني
ماما :سلمك وسلمها
انا :خييير عليكم 😘😘
ماما :مرحبتين
انا قعدت جنب ماما وبديت انحط مانيكير 😍
مروه :اممممم اعميمه بنقولك حاجه عارفه مش وقتها توا بس يعني عشان لقدام
ماما :شنو؟
مروه : امي يااعميمه عاجبتها نوسه واجد وقالت بعد مايصكر عمي الله يرحمه العام بتجي تخطبها لاسامه خويا ❤وقالتلي انقولك وناخذوا رايها
ماما : والله انا توا ما عندي ماانقول فيكم بس انتي عارفه عمك الله يرحمه ماصكرش سنه
مروه : تمام ياعمتي حتى نحن قلنا بعد سنه انشوفوا الموضوع
انا :😳نوسه هذي من؟
ماما :في عندي نوسه غيرك؟
انا :انتوا كنكم اتفصلوا واتلبسوا بجوكم؟
ماما : وكنه أسامه شن ناقصه
انا :مادخنيش بيه انا زواج ماانفكرش فيه
مروه :يانوستي كلما يجيك حد ترفضي لعند امتى هكي
ماما :والله ماني عارفه بتموتني ناقصه عمر البنت هذي 😒
انا :لا مااتخافيش مافي حد يموت ناقص عمر😁 والموضوع هظا صكروه لاني مش اموافقه لا توا ولا بعد سنه عندي حاجات اهم بواجد
ماما :شفتيها !!؟
مروه : ربي يسخرلها اللي فيه الخير ❤
انا رقالي لميت حاجتي وجيت راكبه
مروه :وين ماشيه؟
انا :لـ كوكب زحل
ماما : حينقرض لو عديتيله 😒
انا :عادي انعدي لعطارد 😁كواكب ربي خلقها عرم
أنت تقرأ
انا قبل كل شي 🥀 ( روايات ليبية )
Romanceللكاتبة : #جوري_زايد تدور الاحدات حول قصة عاشتها احدي الفتيات الليبيات لسعي وراء حلمها و عدم اليأس و اكيد مع مناقشة العديد من الاحدات و المشاكل التي وقعت فيها ؟
