انا قبل كل شي 🥀 ( روايات ليبية )

حلقة 7🔥

رواية #انا_قبل_كل_شي
( حقيقة ممزوجة بلواقع )
للكاتبة #جوري_زايد
الرواية بلهجة الليبية
حلقة 7🔥

❤
قبل الامتحانات بأسبوعين
ماما خشت ع بابا اتوعي فيه :حاج ياحاج نوض صلي المغرب أذن
بابا صبى يبي يتوضى وفجأه😳
ماما : ياناعلييي ياحاج دونك ياعبد الله باتك 💔
انا طلعت نجري لدار بابا لقيته داهش بكل وعالقه معاه حكه :كنه 😳
ماما :وعيته يصلي المغرب صلى وطاح ع السرير يكح وداهش 💔
نزل عبدالله يجرى ومعاه مروه منفجعين
عبدالله :كنكم شن في؟
ماما :باتك تاعب بكل
مروه :ياناعلييي ياعمي بعيد السو عليك 😭
عبد الله :لازم انشيله للمستشفى اشوي انولع السياره تسخن
ونزل عبدالله يجري يسخن السياره
انا :حبيبي قولي شن اتحس 😔
بابا يشيرلي ع صدره ومش قادر  يتكلم 💔
ماما :تي بسرعه يا عبدالله
عبدالله وقّف بابا سنده ونزل بيه
ماما : بشويه 😞
عبدالله :وحده وحده ياباتي بشوية
انا واقفه وانبحت في بابا وبابا كان ايبحت فيا اكوووويس
انا نبكي:مش عارفه ليش حاسة  انها المرة الاخيرة اللي حنشوفه فيها حاسة انه مش حيردلي ياماما 💔
ماما : بعيد السو كنك تتفاولي علي بوك
مروه :استهدي بالله يانوسه كنك انتي عمي ديما يتعب من صدره ويتعافى مش اول مرة هذي😔
ـــــــ
في الطريق عبدو يكمل ف احمد صاحبه
عبدو  :ها يا احمد وين قاعد
احمد :في المستشفى ،كنك ان شاء الله خير
عبدالله :عندي الوالد مريض من صدره شوفلي دكتور علي ما وصلت حالته ماتتحملش
احمد : تم هي انراجي فيك
ــــــــ
في حوشنا
مروه اترن ع عبد الله ميردش: ميردش يااعميمه 💔
ماما :تي كنه العيل ما يرد زعمه عمك شن صار فيه؟
انا في داري ندعي ربي يشفيلي بابا ويرده ليا واترن عُلا
انا : عُلا
عُلا :عيوني كيف حالك ؟
انا : الحمد لله ع كل حال 💔
عُلا :كنه صوتك ؟شن في؟؟
انا :بابا تعب بكل وشاله عبدو للمستشفى 💔
عُلا :لاباس عليه ربي يشفيه ويطول بعمره
ادعيله وربك يستجيب
انا :ندعيله والله بس حاسة انه مش حيردلي يالولي😭
عُلا :شنو الكلام هظا 😳وين نوسه اللي نعرفها ؟وين تفائلك وظنك بالله الخير؟
انا :تنهدت وسكتت💔😞
ـــــــ
في المستشفى
الدكتور :الحاج صدره تعبان واجد لازم انديرله دخول
عبدالله :تمام
الدكتور :حنديروله بخار توا لصدره عشان يهدا وبعدين نبوا تحاليل
احمد :تمام شوف موضوعك
ـــــــــ
عند محمد
محمد فاتح فيس ويبرم ف صفحتي لقى بوستات واضح منها ان في شي امزعلني وامضايقني :اووف زعمه كنها شن صاير معاها؟؟ لو راسلتها مش حترد 😓مافيش قدامي غير اني انراسل عُلا
محمد لقى عُلا اون لاين :السلام عليكم عُلا كيف حالك
عُلا :وعليك السلام ،تمام وانت؟
محمد :الحمد لله بخير ،قوليلي نوسه كنها شن امضايقها؟
عُلا: امممم باتها مريض😞
محمد :كنه؟
عُلا :ف البداية برد عادي و بعدها تعب عليهم داهش صدره 💔
محمد :اهااا، وهو توا وين قاعد
عُلا :في المستشفى حالته تعبانه بكل
محمد :اي مستشفى ؟
عُلا :مركز بنغازي الطبي
محمد :يعني عندنا ف المستشفى
عُلا :اهااا
محمد : في اي قسم هو توا
عُلا :نعرفش
محمد : تمام بكرا حنشوفه
امنورة ياعُلا ياريت اتوصلي سلامي لنوسه وقوليلها لاباس ع الوالد
عُلا :نوسه نفسيتها صفر يا محمد 😞💔احكي معاها ممكن تسندها اشويه
محمد :تمام حنشوفها،سلام
ــــــ
في حوشنا
عبدو فتح الباب خاش يلقانا كلنا قدامه
انا :وين بابا 💔
عبد الله : داروله دخول 💔
ماما : لا حول ولا قوة الا بالله
عبد الله : مروه جيبيلي الجاكه وتلقي فلوس ع المكتب جيبيهن
ماما :شن عنده باتك
عبد الله :مازال داروله بخار و يبوا يديروا تحاليل قبل 💔
ياامي وتيلي بطانيه ودبش لباتي علي ماصليت بنعديله وحنكلم عبد الرحمن ايجي يبات معاكم
ماما :حاظر
عبد الله يرن ع عبد الرحمن : ايوه ،وين ياغالي
عبد الرحمن :في الحوش
عبد الله :باه جيب هلك وتعال بات في الحوش انا بايت مع باتي ف المستشفى
عبد الرحمن انفجع : كنه باتي 😳
عبد الله : تاعب من صدره
عبد الرحمن امعصب :تي كنكم ماقلتولي الزح انا اخر من يعلم يوميا انجي انشوف فيه ع اساس برد عادي
عبد الله :حتى نحنا نحسابوه هك ومن حاجه ساعه تعب وشلته للمستشفى سقد روحك ومااتطولش انا طالع للمستشفى توا
عبد الرحمن :جايك ف المستشفى
عبد الله :توا ليل مااتخليش الحوش فاضي بكرا الصبح تعال
عبدالرحمن :باهي باه
عبد الله :هي سلام
ياامي وين اللي قتلك عليه
امي :اهو وتيتهن لك
انا :رد بالك من بابا 💔
عبد الله :تو يجي عبد الرحمن يبات معاكم وفكوني من الرن وسكنان كل اشويه انا حنكلمكم
ماما :في حفظ الله
انا خذيت فوني لقيت مكالمات فائته من عُلا عاودت كلمتها
انا : لقيتك رانه
عُلا :اهااا ،كيف حالك توا 😔
انا :الحمد لله
عُلا :بنقولك حكى معايا محمد وسألني عليك قتله باتك ف مستشفى وقالي  حيمر عليه بكرا ويبي يحكي معاك
انا :مانبيش نحكي مع حد💔
عُلا : عطيه فرصة
انا :ان شاء الله خير
عُلا :خلاص افتحي وشوفيه
انا :حاظر
عُلا :ردي بالك من روحك
انا :ان شاء الله
عُلا :في امان الله
وصكرت من عُلا وفتحت نت لقيت مسج من محمد
محمد :طمنيني عنك كيف حالك
انا: بخير الحمد لله
محمد :كيف حال الوالد؟
انا  :تعبان يا محمد 💔
محمد :لاباس عليه حيتعافى ويردلك متخافيش
انا :ان شاء الله
محمد :بكرا حنمر عليه وانشوفه
انا :بارك الله فيك
محمد : خلاص توا ارقدي وتريحي ماترهقيش نفسك تصبحي ع خير
ــــــَـ
عند عُلا
عُلا ايكلم فيها خالد
عُلا :بنقولك حكى معايا محمد يسأل ع نوسه راه قلت انقولك عشان يكون عندك علم
خالد : واثق فيك ياعيوني 😘
عُلا :ربي يخليك ليا 🙈
خالد :حبيبي اوقفي مع صاحبتك ومااتسيبيهاش
عُلا :اكيد يابيب بدون مااتوصي نوسه اختى ❤ربي يشفيلها باتها ويرده لها بصحته ❤
خالد :ان شاء الله
ــــــــــ
في الفجر
وعيت صليت الفجر ودعيت ربي يشفيلي بابا ويرده ليا وقعدت نقرأ قرٱن للشروق و صليت الضحى ورنيت ع عبد الله
انا : عبدو صباح الخير
عبدالله :صباح النور
انا :كيف حال بابا اليوم ؟💔
عبد الله ارتبك :أكككويس
انا :احسن من امس😞؟
عبد الله :ان شاء الله
انا :باه انت جنبه ؟
عبدو :اهااا بس راقد هو توا
انا :امممبه لما يوعي رن عليا بنكلمه ❤
عبدالله :ان شاء الله
وفي الصبح
انا :يا ماما كلمت عبدو وقاليوركب عبد الله ايدوش ويرتاح
مروه :كيف حال عمي توا
عبد الله :عمك مازال ف العنايه💔
مروه :😳😳شنوووو
عبد الله :مش تنزلي اتقوليها لهم اسكتي كأنك مش عارفه شي
مروه عيونها دمعن : حاظر 😞
عندنا لوطا
انا :يا ماما جاية بعدين عُلا وامها
ماما :باه يتفضلوا ....
اشوية ويخش عبد الرحمن
ماما :كنكم روحتوا وسيبتوا بوكم بروحه
عبد الرحمن سكت اشوية : باتي ف العنايه ياامي وممنوع المرافق يقعد 💔
ماما :😳مش قلتوا اكويس
عبد الرحمن :حالته ادهورت وخششوه للعنايه
انا نسمع فيه وقلبي واجعني ومازلت متمسكه بالدعاء وعندي امل
وخش عبد الرحمن رقد
و بعد ساعه ونص انا برمت ع الحوش و ينزل عبد الله يجري
عبد الله :جيبيلي الكتيب بنصور منه اوراق
انا :حاظر
ماما :شن تبي في الكتيب ؟
عبدالله :بنصور اوراق ياامي
نونا اختي : اي اوراق وانت عندك كتيب بروحك؟
عبدالله :شهادة ميلاد امي وباتي
وخذا الكتيب وطلع 💔
انا ركبت نجري لـ مروه
انا :ميرو عبد الله شن يبي ف الكتيب؟
مروه :والله ماقالي يانوسه رن تليفونه نزل يجري
انا :سألتك بالله تحكي
مروه :مش عارفه يانوسه بلكي بيصور اوراق
انا :يستر الله
ونزلت ونسمع ماما تحكي
ماما :تعرفوا حلمت بأمي الله يرحمها جتني وخذت مني دولاب قديم
يستر الله ف بوكم وخذة الميت مش اكويسه
انا :😳😳
بعد ربع ساعه يرن فون عبد الرحمن
انا : يا فايزه فون ماني يرن من امبدري راه
فايزه :راقد توا خلي اللي يرن يرن اكيد واحد من اصحابه
الفون علق معش وقف
فايزه خذت الفون : ماني يا ماني نوض عبد الله يرن عليك
انا واقفه انبحت وانشوف في عبد الرحمن خذا الفون :.....كيف 😳هيا هيا جايك
انا :بنموت بس نعرف شن قاله ومانبيش نعرف اللي انا حاسه بيه 💔
وناض بسرعه صلى وجا طالع
ماما :كنك مستعجل شن في؟
عبد الرحمن: شي طالع مشوار هنا وجاي
طلع ماني وجت عُلا وامها
عُلا حضنتني :عيوني رايفتلك 💔
انا :انا اكثر
خشينا لدار الصالون
عُلا :كنك رايحه ضاعفه ؟
ماما :ماتاكلش
عُلا :ليييش😳
انا :عنديش نيه في شي💔
عُلا :نوستي ماينفعش هكي كل شي يصير ربي كاتبه ومانقدروا انغيروا منه شي كولي عشان صحتك
ونا قاعده مع عُلا وامها وماما
خش عبد الرحمن :
عبدالرحمن  :يا نونا كلمي امي
ماما طلعت والبنات وصبايا الخوت وراها  وانا جيت بنطلع مسكنتي عُلا من يدي وهزت براسها لالا
ماما  :كنك ؟
عبد الرحمن باسها ع يدها وراسها :عظم الله اجرك ف الوالد عطاك عمره 💔😞
والحوش يشيل كله بكا
انا واقفه مستكه انشوف فيهم يبكوا ماما خواتي صبايا خوتي لكن مانسمعش في اي صوت الا صوت نونا قالت :انا لله وانا اليه راجعون 💔
انا ادموعي نزلت بدون اي رد فعل اخرى و انحاول انردد الجملة اللي سمعتها من نونا 😳
عُلا تبكي وتمسحلي ف دموعي :  لأ لأ ياروحي خليكي قويه كيف ماعرفتك خليكي قويه💔
انا حسيت روحي صقعت  و كرعيا معش شالني 😞
عُلا : حي عليااااااا نوسه😭😭💔
#يتبع 💔