Car Wash Boys Series 11: Wesley Cagaoan

CHAPTER EIGHT

DAHAN-DAHAN minulat ni Bern ang kanyang mga mata. Paglingon niya sa paligid, saka pa lang niya na-realize na naroon pala siya sa kuwarto niya. Ang natatandaan niya ay paakyat na siya nang mawalan siya ng malay. Hanggang sa mga sandaling iyon ay mabigat pa rin ang pakiramdam niya. Muling nangilid ang luha sa mga mata ni Bern nang maalala ang masamang balitang hinatid ni Alex. Kung totoo man iyon, hindi niya matatanggap na wala na ang Mommy niya.

Nang maalala ang Death Certificate na pinakita sa kanya, bigla siyang napabalikwas ng bangon. Napalingon siya nang biglang bumukas ang pinto, pumasok doon si Wesley na may dalang tray na may laman na pagkain.

"You're Awake," bungad nito sa kanya.

"Wesley, anong oras na?" sa halip ay tanong niya.

Nilapag nito ang tray sa ibabaw ng mesa. "It's seven in the evening." Sagot nito.

"What happened?" tanong ulit niya.

"Nawalan ka ng malay kanina. Pagkatapos mong makita 'yung death certificate, nag-collapse ka." Sagot nito.

Napabuntong-hininga siya saka muling napaupo sa ibabaw ng kama. "I want to see it again." Aniya.

Napatitig ito sa kanya, pagkatapos ay naupo ito sa tabi niya. He held her hand and smiled at her.

"Magpahinga ka muna." Anito.

Umiling siya. "No, I want to see it again. Wesley, Is it true? My Mom is dead? Anong gagawin ko?" naiiyak na naman na tanong niya.

Humugot ito nang malalim na hininga saka siya niyakap nito. "You have nothing to fear, Bern. Nandito lang ako." Sabi pa nito. 

Gumanti siya ng yakap dito. Higit sa lahat ng pagkakataon, ngayon niya mas kailangan ng presensiya nito. Sa balikat nito niya binuhos lahat ng luha.

"Ayokong maniwala na namatay si Mommy. Hindi ako naniniwala na namatay siya dahil sa Lung Cancer. Kahit matagal na kaming hindi nagkita, kilala ko pa rin siya. Maingat siya sa katawan." Sabi pa niya. Bahagya siyang nilayo nito, saka pinunasan ng mga daliri nito ang luha niya sa pisngi.

"Can you do me a favor?" sa halip ay tanong nito.

"Ano 'yon?" kunot-noo din niyang tanong.

"I want you to stop crying. Hindi ako sigurado kung nasabi ko na ito sa'yo, pero ayokong nakikita kang umiiyak. I'd rather see you smile, than sheding your tears like this. You know why? Because it breaks my heart. If I could only just stay beside you every minute. Ginawa ko na. Masiguro ko lang na nasa maayos na kalagayan ka." Puno ng emosyon na wika nito.

Sa pagkakataon na ito, hindi na siya nagdalawang isip na yumakap dito. "Then don't leave me. Do as you please." Sagot niya.

Naramdaman niya ang mahigpit na ganting yakap nito. "Ayokong bigyan ka ng maling pag-asa, pero may duda kami ni Miguel sa Death Certificate na binigay ni Alex." Sabi nito.

Mabilis siyang napahiwalay dito. "Ha? Anong ibig mong sabihin?" tanong agad niya.

"Wala pa kaming definite conclusion, pero kami na ang nagdesisyon kanina na ipa-verify 'yon. Baka kasi fraud lang 'yon. Huwag kang mag-alala, itutuloy ni Miguel ang pag-iimbestiga sa Mommy mo. Nakausap na rin namin ang Mommy ni Jared, binigay na nito ang mga alam nitong address na pwedeng puntahan ng Mommy mo. Since magkapatid sila, siguro naman malaki ang chance na may makitang lead sa kinaroroonan ng Mommy mo. Kung hindi fake ang death certificate, at least malaman natin kung saan siya nakalibing." Paliwanag nito.