قمع المشاعر

البارت10

قمع المشاعر.... البارت العاشر..
للكاتبة زهراء ( روزايه)

قبس.. طبيت للمكتب واردد ايات بگلبي ما اريد اضعف ولا اريد يتهموني بشي ويكولون هااا موندري بتربيتج ..

كلت السلام عليكم !! رد السلام بهدوء وهو كاعد كال ورا المكتب كال تعالي قبس تعالي...

اشرلي اكعد ع الكرسي الي كدامه جانت الحاسبه مفتوحه بس ماشفت شطالع بيهه لان مو كدامي..

بشار.. قبل كلشي اعتذر احتمال سمعتج كلام موحلو ..
قبس .. انت....
.. لاتقاطعيني خليني اكمل...

بشار .. اسمعي قبس ما اعرف اي شي عنج اسنين ادور عليج وماخليت مكان مارحتلهه واخر شي لكيتج يم ساجده وماكو داعي اكلج هي شنو!!! يعني ياقبس البيئه الي عشتي بيته تخلي القريب عليج غصب عنه يتهمج..

والله العظيم ما تفرقين عن شجن بشي حالج حال اخواتي ومن خوفي عليج احاسبج واحجي لان انتي عرضي وهذا الشي لا اني ولاغيري يتقبله ...

اني حالي من حالج جديد على هاي الشركه وعرفت الموظفين القدماء وفلاح من ضمنهم والمشكله الي بعمره يمدحون بي ماكو واحد دنيء مثله راح يجي ويكول اي صدك هو هيج وخلي ابالج حتلو شايفين بعينهم انتي بريئه راح يتهموج لان مجتمعنه قذر الى حد الانسان يخاف من نفسه...

اني دا احجي وما اعرف الي معبه براسج شنو واكيد نفس الغل والحقد بس تذكرين قبل شكم سنه شكتلج لاادفنين نفسج تحت انقاض الانتقام لان انتي اول وحده خسرانه راجعي نفسج وشوفي الي قدمنا الج احنه شنو والي خلاج تنهزمين من بيت جدج لبيت ساجده شنو؟؟ كبرتي ياقبس راجعي نفسج وانقذي نفسج..

ما اقبل ولا راح اقبل بيوم احد يتجاوز ع عرضي ولو بنظره دافعتي عن نفسج وهذا حقج بس شوفي كل اثنين يحجون بيج وصارو هم الشرفاء شلون ياقبس اروح اهد عليهم وكل واحد اطرده من وضيفته ...

الانسان لازم يكون حذر ولازم تنتبهين ع كلشي الكلمه والتصرف واللبس يابويه مجتمعنه متخلف يتهمج وانتي بريئه وتروح سمعتج وموبس انتي لا كل بنات عمج يتاثرن...

الي اريده من عندج طلب اخوي ياقبس رجاءا غيري لبسج وتحجبي موعلمودي ولا علمود شكم شخص لنفسج حرام هالشي احنه دينه فرض الحجاب ولازم تلتزمين بي وبعد شغله ثانيه انتبهي ع تصرفاتج وحاولي تبطلين هالطبع الهجومي واذا وكعتي بمشكله كدامج اني وشوفي منو ماياخذ حقج..

قبس.. الصراحه انعكد الساني وماكدرت اجمع حرف واحد حته ارد علي ماكدرت احجي كدام هذا الانسان الي لاول مره اسمع هيج كلمات واول مره انتبه على نفسي واني شكد مجرمه بحق ذاتي خجلت من نفسي ولا ارادي سحبت قميصي واتنمى لوطويل شبر واحد دنكت واني احجي ويه نفسي احجي ياقبس جاوبي احجي...

ماحجيت ولاطلعت من عندي اي كلمه وهو كال اخذي راحتج وهذا الموضوع سدي نهائيا ...

كمت من يمه واني منصيه راسي بس كتله شكرا لتفهمك وطلعت من طلعت يله اخذت نفس وكانو جنت حابسه نفسي بقاروره ومحجوب عني كلشي ...