Vengansa

1

Tabata un anochi sukú manera kurason di dos hende ku ta odia otro. Di baina bo por a mira un strea den shelu. Ta parse manera kos ku nan a bai skonde pa e mònster nan di mas feros. Awa tabata kai ku un furia i bos ku welek tabata duna un show musikal ku hopi lus i fanfara. E lus nan di kaya tabata laga e asfalt lombra manera diamante. Banda di e retònde na SDK, direkshon pa Festival Center, un Toyota Tercel ta kore pasa ku un velosidat haltu.

Den e vehikulo tabatin un pareha den un diskushon formal. E muhé a kaba di revelá un sekreto grandi ku e tabata kana rònt kun’é pa trintidos aña kaba. E muhé ta tratando na splika su mes pero dor di e hòmber su gritu nan di rabia tabata kasi imposibel pa bo tende kiko e muhé ker a bisa. E hòmber tabata asina yená ku rabia ku nada ku e muhé bisa no tabata drenta mas. E rabia ku e hòmber tabata sinti na e momentu ei tabata brota bin ariba manera un volkano den pleno erupshon. Apesar di esei, tòg e tabata trata na mantene su dominio propio pero ya ku e ker a hala rosea i konta te dies ó kisas te shen, ya su man a sali kaba.

KLAP!! Un wanta den e muhé su kara, un man den su kabei…KLAP KLAP!! E ta sinti su frenta dal dos bes kontra e  “dashboard”. Sanger ta kore for di su nanishi i su wowo nan tabata move bai bin den su kabes manera un hende ku ta serka di bira di kabes. Su orea nan tabata pita i un doló skѐrpi tabata kue den su pechu kada bes ku e hala rosea.

BUDUP….BUDUP….BUDUP e ta tende kon su kurason ta bati te den su orea. Su man nan tabata sinti manera kos ku un hende ta pará ta pui e ku mil i un angua. Su lenga ta sinti  pisá i su boka ta seku seku manera hende ku tin dos dia sin bebe un poko awa. Su mente tabata kompletamente blòkiá. E no sa si grita, yora òf bula abou for di e outo pa skapá di e pesadía aki. Te na momentu ku e ke disidí kiko pa hasi, ya e hòmber ta pѐrdѐ kòntròl riba e vehikulo. E ta purba hasi yen maniobra pa rekobrá kòntròl riba su outo pero tur esaki tabata sin resultado.

E zonido skѐrpi di e tayer nan ku ta lastra riba e asfalt ta resoná den henter e bario di brievengat. E outo ta keda lastra bai dal su parti patras den un pal’i lus, dal un rònchi i kaba dal frontal den un otro vehikulo. E zonido ku a sali na momentu ku e dos outo nan a dal kontra otro por a laga kualke hende su kurpa bisti. E dos vehikulo nan a keda asina destrosá ku tabata kasi imposibel ku e pasahero nan a keda na bida. Tur esaki pa un sekreto. Un sekreto ku mester a wòrdu revelá for di den komienso. Un sekreto ku por a spar bida di hopi. Un sekreto ku si el a wòrdu revelá na tempu, lo por a evitá hopi dolo di kurason.

Despues di e klap formal ku tabatin entre e dos vehikulo nan, a reina un silensio di por lo menos un minüt. Tabata asina ketu ku bo por a tende un feneta kai. E dos vehikulo nan a keda manera papel machiká, tur doblá den otro. Kompletamente destrosá. Huma blanku tabata rondoná e sitio i poko poko bo tabata mira hende nan ta sali nan kas òf parker nan outo na kantu pa baha wak kiko ta pasando. Den menos ku sinku minüt e sitio tabata rondoná di hende. Tin di nan tabata tratando na yuda, tin di nan tabata djis para wak i otro nan a saka nan telefòn pa graba e suseso horendo aki. Lew ayá bo por a tende e gritu nan di ambulans i polis ta zona. Masha hopi outo di polis ku nan lus blou i kòrá ta hasi maniobra nan peligroso pa por yega e sitio. Ambulans i Brandweer ta djis pegá nan tras. Tabata un kaos total. Mulitut di hende pará djis pa nan wowo kapta maske ta un pida di loke ta pasando, hende ta grita aki, polis ta grita aya i na mes momentu ta trata na mantene òrdu i krea espasio pa e personal di ambulans por haña un chѐns di pasa i hasi nan trabou.

E bombero nan ta purba kòrta e outo nan i kita nan for di otro pa asina nan por wak si tin maske ta un pasahero na bida. Den e promé vehikulo tabatin dos pasahero pero ya niun di dos no tabata duna señal di bida mas. Nan a saka e kurpa nan sin bida i tapa nan kompletu ku un laken blanku. Un di e bombero nan a dal un di e polis nan un gritu pa esaki por buska moda pa notifiká e famia nan ku nan a kaba di pѐrdѐ nan ser nan kerí. E polis, un gai ku basta bon tipo. Un dushi negrito ku su kabei nechi pelá, su kueru koló di chukulati mesklá ku nѐt un lѐk di lechi, ta kana yega serka i ta kuminsá buska den e outo pa wak si e ta haña telefòn di maske ta un dje viktima nan pa asina por tuma kontakto ku famia. Den su huki wowo e ta mira un pakete di kokaina bentá riba e stul patras. E pakete tabata kisas mes òf un tiki mas grandi ku un telefòn di man ke men ta masha fasil mes pa kue bai kun’e sin niun hende mira. Su kurason ta kuminsá bati duru i yen pensamentu straño ta pasa den su kabes. ‘Mѐldu òf no mѐldu? Mi mester di sen. Si mi por bende e kos aki, mi por sali for di mi kos nan i sobrá pa biba un tiki dushi i no pѐrtá pѐrtá manera mi ta biba awor aki. Pero si un hende garami awor aki, mi por bien yama kuerpo polisial ayo pa semper.’ El a drai lomba wak lihé lihé si niun hende no tin bista riba dje i ta kue hink’e den su saku. Na e mes momentu ei e ta sinti un man riba su skouder i e ta sinti kon su alma ta bandoná su kurpa pa un par di sekònde.

‘Joёl, bin akibanda!! Tin un pasahero ketu bai na bida den e otro outo!!’ E no ta haña ni chѐns di sinti’e aliviá paso su kolega ta trѐk e na su man bai kun’e den direkshon di e otro outo. Nѐt nan tabata sakando un mucha muhé for di e vehikulo. Sanger tabata kore for di su orea i su nanishi. E tabata tembla for di su drachi nan di kabei te na su tenchi nan di pia i e tabata delirá. Su wowo nan di baina por a para habrí i e tabata duna e imprenshon ku e no sa unda e ta ni kiko tabata pasando. Poko poko su wowo nan ta sera i e ta pѐrdѐ konosementu....