Vengansa

16

Romina...
Tur kos tabata asina bon planiá! John i e mama di Ronaiska a sera un pakto for di den komienso. Romina, e mama di Ronaiska ta un mas di esnan ku tabata yená ku rabia den su kurason pues e no tabatin kunes mes ku su yu muhé tabata un dje popchi nan di kuèrdè den e wega peligroso di vengansa aki. No tabata import'é riba ken òf kiko e tin ku pasa, basta e logra baha su rabia ku e tin basta aña ta kana rònt kun'e.

For di edat jong e tabata gusta e tata di John pero esei tabatin bista unikamente pa Tahely su mama. Ni maske kiko Romina a hasi, nunka el a logra konkistá e hòmber di su soño nan. Pa tòg e por logra ta parti di su bida, Romina tabata yuda su ruman muhé sali marduga kuchi kuchi bai serka dje. Su ruman no tabata sa, pero semper e tabata keda pará wak den bentana kon nan dos tabata hasi amor i sasia otro su set seksual. E tabata para wak i imaginá su mes ku ta e ta drumí riba e kama ei.

Despues ku su ruman a sali na estado di John, nan mayor nan a pone un krus ku'n dònder tras di e relashon ei i obligá e mama di Tahely pa entregá John na su tata. E mama di Tahely enberdat a hasi esaki ku un tremendo doló na su kurason. El a entregá e yu na su tata, kasa ku e tata di Tahely i bai biba su bida lew for di su mayornan, John i e amor di su bida.

Pa tòg e keda den bida di e hòmber, Romina tabata bai yud'é den skondí ku e baby resien nasí. Kasi tur dia e tabata inventá algu pa e por sali kas i bai yuda ku e yu. Mas dia nan pasa huntu, mas komfortabel nan tabata sinti nan mes den otro su kompania te dia nan dos a entregá nan mes na otro. For di e dia ei nan a sigui topa otro kasi tur dia pa hasi nan kos. Pa e hòmber, loke nan tabatin tabata djis un transakshon seksual pero pa Romina esaki tabata muchu mas. Tabata loke ku semper el a anhelá. E tabata bon bon na altura ku e hòmber no tabatin niun tipo di sintimentu p'e pero e no tabatin ku nes. 'Mi tin sufisiente amor ta kana rònt kune pa nos tur dos' tabata su palabranan di semper.

Nan relashon seksual tabata kana manera debe ser te ku dia e lastrayona di Tahely a drenta e hòmber su bida. Tahely, e mucha muhé identiko na e amor di su bida. E mes un kolo di kueru, e mes kurpa di kitara i kasi e mes un mirada sèksi. E tabata pará den hanchi mcDonalds ku su telefòn na su orea den loke tabata parse un kombersashon basta emoshonal. Su man tabata zwai bai bin mientras e tabata splika e persona na otro banda di telefòn dos pida kos.

Tabata manera kos un magnet tabata trèk e hib'é na Tahely. Ora el a yega serka dje esaki a saka un karchi for di tas, benta esaki den su man i bis'é; 'si bo tambe ke pasa un ratu dushi kumi, djis yama e number eiriba.' Despues di esaki el a bira su lomba, yanga bai laga e hòmber ku su boka yen di djente.

Su siguiente dia bèrdat e hòmber a bel Tahely i traha un sita pa nan topa anto for di e dia ei Romina a wòrdu remplasá. Di un dia pa otro el a hañ'é atrobe ta para wak dor di bentana kon otro hende ta tuma su lugá. E tabatin ku para eksperensiá kon su subrina a remplas'é i kon nan tabata hunga weganan seksual i sadistiko ku otro. Atrobe e tabatin ku para wak i imaginá su mes ku ta e ta drumi riba e kama ei. Esei tabata uniko kos ku a sobra pa hasi. Ademas lew ayá tòg e tabata disfrutá dje echo ku 'meneer' no tabata na altura ku e tabata bòl e yu di "e amor di su bida" ni tampoko ku kada enkuentro i akto di nan dos tabata wòrdu graba.

Hesus, el a mira hopi kos. Ta asina tambe el a mira kon e porkeria di Tahely a subi sinta riba 'meneer' i hasi manera e tabata ke kun'é. Pa ser honesto, e por a evitá tur e loke ku a pasa par di aña pasá entre Tahely i 'meneer' pero e tabata asina yená di rabia i renkor ku el a para mira kon Tahely a pega e kas na kandela ku 'meneer' den dje. Tabata un satisfakshon inmenso pa mira kon e vlam nan di kandela a guli e kama, 'meneer' i tur sobrá kos bai kun'é. E por a kore bai paden i hasi un akto heroiko pero si 'meneer' no por ta di dje, e no por ta di ningun otro!!!

Enfin, despues di e suseso ei el a bin dal den John i el a kont'é simplemente mitar di e historia. E parti di e historia ku ta di benefisio pa e. Tur loke ku e por a uza pa gas John su rabia, el a uza. Na momentu ku el a konfirmá John ku ta Tahely mes ta e asesino di su tata...Kolon a kima! Su kabes a bira kayente kayente pasobra kon por ta posibel ku e asesino di su tata lo bai heredá mitar di su herensia? HAMAS!

'Meneer' tabata un hende ku tabatin basta plaka i for di na momentu ku el a kai kompletamente stimá riba Tahely su mama, el a laga pone den su testamento ku Tahely su mama lo heredá mitar di su herensia. Na momentu ku nan dos su bida a parti for di otro i el a hañ'é ku kuido di su primogenito,  el a laga kambia su testamento atrobe i pone ku John lo heredá e otro mitar di su fortuna. Loke e no a tene kuenta kun'é ta e aksidente di outo fatal ku Tahely su mama tabata aden paso awor ku e mama di Tahely ni su kasá no ta na bida mas, outomatikamente su mitar di e herensia lo bai pa Tahely.

Tahely, esun ku a asesin'é.