Vengansa

13

Na momentu ku Joël i Tahely a kore yega na e sala di entiero, nan a topa Ronaiska bentá abou na suela ta yora, grita i sapatiá. Un akto bochornoso pa presensiá pero manera nan sa bisa den boka di pueblo; ‘asina e ta ekspresá su doló.' Mientras e tabata hasi tur e badabada ei, e tabata grita; ‘Tahely lo bai sufri mi mama! Bo morto lo no ta envano pero bisami awor, bisami awor kiko mi mester hasi ku John? Bo tabata sa tur e tempu ku John ta ruman di Tahely i bo no a bisami nada mama.Dikon bo a bai sin splika nada? Dikon bo a bai i lagami atras ku yen pregunta sin kontesta mi mama? Dikon?’

Tahely a keda pará den e porta di sala manera kos ku nan a basha un hèmber di awa friw riba dje. E ta sinti kon su pianan a kuminsa ninga i e ta purba wanta su kurpa na Joël. Su kurason tabata bati te den su orea i sodó tabata kore bin abou na su kara. Su wowo a bira suku i e ta sinti kon su rosea ta kuminsa bai lage. Joël ta ten’é duru i pone kai sinta riba un stul ku tabata djis serka ei. Asina el a keda sintá riba e stul pa un par di sekònde paso diripiente manera kos ta un demoño a drent'é, el a bula lanta i ranka bai riba su prima. 'Kon bo ke men ku John ta mi ruman? Kon John por ta mi ruman? Mi mama i mi tata ta UN yu nan tin i esei ta AMI!!!' Ronaiska ta hisa kara wak'e i bisa den un tono sarkastiko; 'Awel ei bo ta kibuká mi prima stimá paso promé ku bo a disidí na hasi bo entrada riba e mundu aki, John tabata tei. Simplemente bo mama no tabata ker e. El a preferá na entregá su yu hòmber na su tata i bai hasi su bida ku bo tata. Nunka John a konosé su mama i pa su mala suerte i pa BO motibu e no tin su tata mas tampoko.'

'Ta kiko ami tin di haber ku e echo ku e NO tin su tata mas Ronaiska? Pakiko duna ami falta di tur kos? Bo ta hasi manera ta ami a mata Kristu!!'

Ronaiska ta lanta for di riba suela, kana bai den direkshon di Tahely i susurá den su orea; 'No, Kristu bo no a mata bèrdat, pero John su tata si!!!!!'