Vengansa

17

John...
.....I asina nan dos a sinta konkoktá un plan ku na nan pareser tabata un plan perfekto. John lo aserká su mes na Ronaiska pa asina logra drenta bida di Tahely. El a hañ'é ta maluzá e amistat di años entre e ku Joël pa asina e por tin mas akseso na Tahely i nan a haña nan obligá ta mata Junailys paso esaki tabata hinka su nanishi den kosnan ku no ta kai bou di dje.

No tabata su intenshon pa kosnan bai asina lew pero e no por a laga Junailys bin daña asuntu tampoko! Ta basta tempu i dedikashon a wòrdu hinká den e plan pues....

Tur esaki a pasa un bes mas dor di deskuido di Romina. John i Romina tabata pasa hopi tempu huntu pa nan por rafiná nan plan i manera bo por imaginá boso mes, un di e biaha nan ei nan a drumi ku otro. E prèt ta ku niun di dos no ta sinti nada pa otro. Nan tabatin simplemente un "business relationship" ku un lèk di seksualidat mará na dje. Kada un di nan tabatin nan propio interes mará na esaki. Romina tabata hasi'é simplemente pa baha su set sekual i John tabata hasi esaki paso e sa ku asina ta uniko manera pa tene Romina bou di su kòntròl.

I asina e bala a kuminsá lora. El a logra namorá Ronaiska i drenta bida di Tahely ku e intenshon pa desmaskará su barbaridat nan i lag'é putri tras di trali na bon futuro ayá. Asina ora tur bèrdat sali na kla, e por disfrutá di e herensia ku ta pertenese na dje i na niun hende mas. Ademas e uniko punto di bentaha ku e tin riba Tahely ta ku e no ta na altura ku e ta a punto di heredá un kantidat grandi di plaka.

Pero manera semper, nunka kosnan no ta kana segun plan! Ta asina ku un dia el a kore bai buska Romina na pia di brug i sigui nan kaminda pa Baya beach pa nan por hasi nan kos. E dia ei Junailys tambe tabata den kaya i a mira Romina drenta outo di John. El a haña e kos straño i a disidi na siguinan. John i Romina no a ripará esaki i di golos ku nan tabata pa bula riba otro nan no a ni chèk wak si tin mas hende einan kual ta e kos di mas malu ku nan por a hasi.

Si, e kos di mas malu ku nan por a hasi paso di atras Junailys a sali konfrontá nan ku su telefòn den man grabando kon John tabata ku full su kabes mei mei di Romina su pia. I e infelis a riska na duna nan un ultimatum di tres dia pa bisa Ronaiska e bèrdat òf e mes ta bis'é i konfirmá esaki dor di mustr'é e evidensia di nan akto!

Naturalmente nan no por a bisa Ronaiska kiko realment ta pasando i nan a purba na diferente manera di konvense Junailys pa no habri su ko'i kome i bisa e bèrdat pero lamentabelmente tur esfuerso tabata pornada. Nan no a tene nan mes na e ultimatum i Junailys tabata na kaminda pa Tahely pa e konta e, ya asina nan dos huntu por konta Ronaiska e bèrdat.

Nan no a plania esaki.. Uniko kos ku nan tabata ke, ta pone un paro na Junailys su payasada pero kosnan a sali kompletamente for di man. Komo e mes no por a tuma akshon e momentu ei, el a manda Romina un mensahe pa bai stòp Junailys di hode nan dos su plan i Romina a hasi esaki bèrdat. El a stòp Junailys pa semper...

E no ta lubida nunka mas kon nervioso e tabata ora Ronaiska a bis'é pa ban tuma kos serka su mama. Na e momentu ei e tabata sa bon bon ku Romina lo no tabata na kas pero e mester a keda hunga su ròl. E no por lubidá tampoko kon lihé nan mester a aktua pa fingi e morto di Romina.

Hamas lo e por lubida tampoko kon nan mester a tik un karta di despedida na nòmber di Junailys pa su famia i amistades kere ku el a piki su bulchi bai ku e intenshon di no regresá nunka mas.

Loke mester tabata algu simpel a bòltu bira un wega peligroso i e no por ni rekonose e hende ku e ta mas.....