Vengansa

11

Ronaiska ta keda pará den e port'i kura ta wak kon e kandela ta guli e kas di su prima stimá. Manera un nubia di tristesa e huma pretu i diki a tapa henter e area. Poko poko Naiska tabata buska un kaminda pa e wanta su kurpa na dje. Su pianan no tabatin forsa mas i e tabata tembla manera bara bèrdè. Su mente tabata kompletamente blokiá. E no por pensa, kual naturalmente ta pone ku e no por a aktua tampoko. Ronaiska ta kuminsá yora na un manera inkontrolabel. Henter su kurpa ta sakudi i for di su boka gritunan di inmenso tristesa ta sali. E ta kai sinta riba suela paso ya su pianan no por wanta su kurpa mas.

E no ta ni kaba si sinta nadrechi ku e ta tende un gritu asina horendo, ku ta pone delaster un kabei na su kurpa lanta para. E ta bula lanta, sali kore bai den direkshon di e gritu i e ta mira kon su prima ta purba sali for di bentana. Manera e mira e prima e ta kuminsa grita; 'Tahely, unda mi mama ta? Unda mi mama ta Tahely?!!' Su prima ta wak'é ku un mirada di tantu tristesa komo spantu. Mesora Ronaiska a bin komprondé ku ya su mama no ta na bida mas. Naiska ta sinti kon un rabia ta drenta su kurpa. E ta yega serka Tahely i kue tene na su garganta i primi. Mientras e ta wak e stret den su wowonan e ta bis'é; 'for di bo nasementu bo ta trese desgrasia den e famia aki. Bo no tin niun idea di kuantu danjo bo a i ta kousando ketu bai pero mi ta hurabo, MI TA HURABO TAHELY pa bida di mi mama ku desde di awe, e uniko dia ku lo bo ta trankil lo ta seis meter bo di tera!'