الوسواس القهري ( روايات ليبية )

حلقة 1🔥

#الوسواس القهري

المقدمة

مش متحشمه ع وجهك مقعمزة بين المتزوجات 😂😂 ياعانس قصدي أسرار
انا.. المفروض انتو الى تتحشمو مقعمزات مع وحدة سنقل طول وعرض وشخصية لاترهلات لاشيب لاكرشة يعني حلم كل راجل وبعدين حتى كانكم تتناقشو ف حاجة عليها القيمه شادينها غير ع اللمات زي المفجوعات
تهاني (بنت خالتي) امتى حانفرحو بيك ياحنة بما انك حلم كل راجل
انا.. والله نراجي ف عصومي يطلقك لأنى الصراحة مانحبش نجي ع ضرة
تهاني .. بدت تشلوح ف يديها يمين ويسار شن قصدك وراجلي اسمه عصام
انا.. نشرب ف العصير ونشوفلها 🙂🙂
يسرى (أخت تهاني) من بياخد وحدة بوها مغولي اكيد بيخافو ع صغارهم
انا.. الحمد لله مغولي ولاسكار ودايخ ديما ف الشوارع
خالتي عيدة.. عيب يبنات تحشمو خلاص
انا.. حاضر ياخالتي ورن تلفوني وناديت ليسرى رقم من هذا
يسرى ..😲 شن يدير رقم قصي راجلي عندك
انا.. 😏😏 قبل لاتقولو عليا عانس شوفو رجالتكم شن يديرو من وراكم وقتها اكيدا حاتحسدوني ع النعمه الى انا فيها
عيدة.. قلت خلاص يابنات هدي لمة جياب مش مكان للعراك
سهيلة.. لقيتها يامفيدة
مفيدة.. شن هيا ياوخيتي
سهيلة.. البنت الى بتوقف علي عند حده
مفيدة.. ان شاء الفرخة الى توا
سهيلة.. ايه هيا شوفيها شخصية وواثقه من نفسها
مفيدة.. هدي قمحية وولدك يحب البيضة الحليب
سهيلة.. تزوج 3 مرات وعلى كيفه لكن المرة هدي انا الى بنزوجه وع كيفي
مفيدة.. بوها مغولي ماسمعتيش
سهيلة .. مش مهم انا عجبتني البنت
عيشة.(خالتي). هالفرخة متع مشاكل وخلاص كل ماتجي لازم دير مشكله حتى ف لمة بنتي مش مريحتني
انا.. طلعت البرا ولقيت بابا يضربو فيه ولاد يسرى وشديتهم عطيتهم طريحة
خاشة بقوووة واندفاع صح انا اسمي اسرار مواليد م95 قمحية جمالي بسيط متوسطة الطول ورشيقة قارية قانون ونخدم ف محل عطور كيف جت والله حتى انا مانعرف بس دافعت مرة ع ثلاته نملات بيقتولهم ولاد تهاني وكانت هدي اول قضية ليا وربحتها امي ماتت ف حادت سيارة وبويا مغولي لكن نحبه ونموت فيه وجوه سمح حاليآ عايشة مع بابا ف حوش جدي كان عندي خويا اكبر مني كان معاق ومات بابا اسمه عيسى
كانت .. حياتي اشبه بحياة الذبان مرات متحركه هلبة ومرات كساد وخلاص والحق لما نكسد نمشي عند بنات خالاتي وندير مشاكل ونروح
سهيلة .. كانت من عيلة غنية ناس عندهم فلوس وسيارت تعالا ياعلي
علي .. نعم ياست الكل وقبل مايقعمز ع صالون الجلد مسحه بمنديل وقعد
سهيلة.. حصلتلك عروسة تهبل والمرة هدي بنزوجك ع ذوقي
علي.. وليش عندي وحدة كنت بنكلمك عليها
سهيلة.. لا حاتاخد الى انا جبتها ليك ولو ماعجباتك طلقها
علي .. تمام
خلونا .. نتعرفو ع البطل بطريقة مختلفة شوي
علي وسيم جدآ ملامحه هادية فعيناه يميلان الى البني الغامق وشعره أسود ناعم وتظهر عليه ملامح الرجولة وبشرته بيضاء وهوا قمة ف الشياكة 😎🔥 بس كان مصاب بمرض الوسواس القهري تزوج 3مرات وطلق عمره 32سنة مدة زواجه كانت ماتفوتش ال3شهور كان ولد واحد و5بنات وزواجه بقصد انه يجيب ولد
انا.. روحت من المحل وحدفت العباية والله ربي يعطيني صبر البنت الى تروح وتحول عبياتها وتعلقها ف الدولاب انا من اول مانفتح الباب نحولها وف ثواني نحولها لكرة سلة ونحدفها
بعد مرور اسبوع كامل من الملل والكوساد
عمتى(ام الخير) المفروض سموها ام اربعه واربعين اليوم جو خطبوك ونحنا عطيناك
انا.. شيك والا كاش
ام الخير .. بالك تراجي فينا ناخدو رايك انا نخبر فيك بس
انا.. اهم شي بابا تشرطوه معايا ف العقد
ام الخير.. بالك تحسابينا بنشدوهولك
انا.. خوك هذا
ام الخير .. العرس بعد شهر كلمي خوالك يشرولك حاجاتك
انا.. 😔😒 حسبي الله ونعمة الوكيل فيك يا الدبة ياقارة أفريقيا
مشيت لخوالي بس قالولي شني بنعطوك وبنعطو فوق منك خليهم هما الى يجيبو
انا .. عيلة زبالة ان شاء الله تنحرقو ياعيلة بني اسرائيل الى يسمع يقول الواحد ديما يتزوج نمشيله بالدبش الى عندي وخلاص وبعدها هوا يشريلي
فات الشهر وجاء موعد العرس
سهيلة.. كانت كويسة معايا وعطتني فلوس وقاتلي اشري شن ناقصك وانا الحق ماقصرت شريت لروحي ولبابي
كان العرس بسيط وبنات العيلة لما سمعو ان علي راجلي عنده فلوس نحسدو ونغرو
غطوني ورفعوني لحوش العريس وطلعو
انا.. العيشة مع راجل غريب صعبه اللهم تبتنا عند السؤال
علي.. فتح الباب السلام عليكم
انا.. الصراحه حاولت نرقق صوتي بس للأسف طلعت مني وكأني واحد من التريس وشاد بوابة وحاط كلاشن جنبي وطاسة قهوة ودخان
علي .. قرب مني ورفع الطرحه بالمنديل وقعد يشوفلي قمحاوية مش من نوعي المفضل لكن مش بطالة
انا.. لا مستحيل الشي الى نشوف فيه بجد مش مصدقة هذا حلم ولاعلم حد يقرصني ولايبوسني
علي.. يصلح ف قميصة وزاد نفخ صدره
انا .. راجل ابيض يععععععع يعععععع🤢🤢 بعد بعد بنرجع تعرف شن يعني راجل ابيض يعني ف الصقع تولي احمر يععععع ياريتني درت المقابلة الشرعية 😭😭😭 كان حلمي رجل اسمر حافظة مية قصيدة ع الرجل الأسمر ف النهاية تطلع ابيض ااععععع
علي.. تعرفي تسكتي احمدي ربك الى رضيت بيك انا نحب المراءه البيضة
انا.. البيضة هدي اقليها لأمك بعدين اهل الفن تغزلو بسمر سمراء تكحلت فغار منها القمر وبيضاء تكحلت طلعت زي دب البندا
علي .. انا تكثير الدوة مانحباش غيري دبشك ودوشي سبعة مرات
انا.. بندوش ولابنطلع جن شن سبع مرات والله ماني مدوشة قبل مانجيك درت حمام عادي وحمام ساونا وحمام بخاري وحمام مريم وحمام المدرسة توا شهر معاش بندوش
علي .. يععععععع شهر وبدا يتباوع ع اساس بيرجع
انا.. نشوفله خيرك راهو مزال مادرنا شي
علي .. طلع شيشة صغيرة متع مطهر ودارها ع يده وبدا يشم
انا.. شنو هذا
علي .. مضاد للجراثيم
انا.. معاك.. الجرثومة الهاربة من ديتول الذي يقضى ع،99%من الجراثيم
علي.. لا لا مستحيل نقدر نتحملك وطلع
انا.. توا هذا نهدده بصرصور يكتبلي الفيلا بإسمي
يتبع
نبدأ 🔥
#الواسوس القهري 1