برنو الكحلاء

بارت ١

ياريحة اهلنا ويازمان الفات
وياطيبة ومحنه وگلب وافي

الكحلاء شهر الخامس سنه ١٩٧٠
- يمه عبيس صيح اخوتك وتعالو تغدو جدك ما يقبل ياكل الا تجون
ولك يمه ماتسمعني وين راح كريم بس هو يسمعني بس هو ابني صدك
- ها هيله خيه شمالج تحلطمين
- ياااااا هله هله بسورها ونورها هله باخيتي وعضيتي شني الجلب العضج چتلنا شني وين هالغيبه لا تمرين لا تسألين
- شني چا بس انتي متزوجة وعندج فريخات انا صح عندي بس هالوحيد بس خيه والحسين الله مايرجعه يساوي عشر ولد
- يمه هاشميه اسكتي اسكتي لا تحجين على يوسف شو هو اسم على مسمى جمال وادب واخلاق واني اتمنى واحد من السته العندي يصير مثل يوسف
-خيه هسه انتي نسيتيني انا عليمن جايه انا جايه اعزمجن على جاي العباس اليوم
- دخيل ابو فاضل جا خوش العصر نجي  وراح اگل لعمتي،  والبنات عازمتهن يالا ؟
-اي چا شلون كلچن معزومات وهلا بيجن
- بس هاشميه ما كلتيلي جاي العباس عليش ناذرته
- اععععععع يمه چا خيه انا ما كتلج
- لا والله ما كلتيلي
- يمه خيه اعذريني انا مدودهه كفيلچ اخو زينب من اسبح ما الحگ اضفر كفشتي
خيه چا انا غير طلعت حبله  ادعيلي خيه خايفه هم اطرح مثل الراحو قبله وهاي المره وعلي هذا كويضم ياخذ علي مره چا هم حگه الرجال يريد خلفه خوما يظل على هالوحيد
- يا صلوات على محمد خيه وعلي گلبي يگلي تجيبين توم ويسعد گلبچ بيهم
- ييييمه خيه الله يسمع حسچ واذا صدك صارت الج مني شيلة اوصيلچ عليها من البصره بريسم اصلي
- يا خيه هويشميه لاتكولين هيچ انتي اخيتي مو بس بت خالتي
- يوم الالچ خيه ويفرح قلبچ وتجيبين بت تعوضچ بتچ الراحت فدوه لخوتها
- لا يمه غدي بعد لعبت روحي من الخلفه وانا وجاسم بعد ما نريد راضين بقسمه ربچ الله يحفظ وليداتنا
خيه انا تعبانه اركض وره الولد الما من وراهم بس الهم والتعب الي مريحني منهم بس محمد صحيح  عازل نفسه انا خايفه علي بس مرتاحه منه واخوه كريم الله يحفظه تكولين رجال چبير وما اهم بيه بس ذولاك لا والله لاعبين بيه لعب خلوني اكره كل الخلفه
- انا اروح خيه هيله تأخريت
- الله وياچ وانا هم اصيح الفروخ وين راحو
                .......................................
اني هيله ماخذه جاسم ابن عمي وعدنا ست ولد واخر شي جبت بت وچان فرحتنا بيها ماتنوصف بس الله ما كتابله لگمه بهاي الدنيا عمرها تلاث اشهر وصخنت وماتت وهاي صارنا ثلاث سنين وبعد مانريد خلفه
كاعدين ببيت چبير اني ورجلي وعمي وعمتي واحمويني  اثنين حسن متزوج نوريه بت عمنا وعدهم تلاث بنات مثل الورد وحماي حسين متزوج سنيه هم بت عمنا وعدهم اثنين ولد واثنين بنات
وعندي اثنين حموات سهام متزوجه يمنا ابن عمنا وسعاد متزوجه بالبصره
وانا مثل ما گلت عندي ست ولد چبيرهم محمد وبعدين كريم وعيسى ورزاق وسلام وعلي
               .........................................
- هويله عمه وين رحتي عمج خلص صلاته وناطرجن والولد اچو چوعانين چا شوكت تزهبن الغده
- جايه عمه جايه يدلل عمي
جنت يم  الباب اجتي هاشميه بت خالتي چا غير طلعت حبله وناذره جاي العباس وعازمتنا انا وياج والبنات
- چا خوش هم ياله تكفن غداچن ونروح
                   ............................
اجى جاسم واخوته والولد من الشغل بالزرع عدنا مزرعه وحلال حماي حسن يرعى الحلال وجاسم رجلي واخوه حسين يرحون للزرع وكريم وولد عمه ناصر وراضي يروحون وياهم ويتقاسمون ناس تروح للزرع وناس تروح ويه حسن للرعي
اما ابني محمد هذا عازل نفسه عمره هسه عشر سنين هذا يحب العلام والدراسه ويقرى كتب ما ادري منين يجيبهن مو كتب المدرسه ويتفلفس علينا الناس بسلفنا يادوب كم واحد يفك الخط ويصلون ويصومون ويعرفون الحلال والحرام غيرها  لا والله الناس مخليتها على الله
دخلت الولد وجبت الغده تمن وروبه وسمچة شويتها وره ما خبزت بتنور الطين وريحتها ترد الروح وكعدو كلهم ويه عمي الي ما ياكل الا كلهم يلتمون
كفينا الغده وروحنا اني وعمتي ونسوان الولد نوريه الي اخذت بناتها وياها وسنيه هم اخذت بناتها وياها.
رحنا لكينا كل نسوان السلف حاضرات واغلبهن من عمامنا وسهام حماتي هم جانت موجوده
سهام بت عمي واخت زوجي جانت وكحة ولسانها طويل بس بالحق ولو صوتها العالي ولسانها مضيع حقها متعوف اي كلمه اذا متردها. هي بحلي بس تزوجت متأخره عدها ولد تلاث سنوات وبنيه سنه ونص وماصار عدها بعد وهي ذابحه روحها لان زوجها ابن عمها هم جبير عمره ٣٨ سنه
وحده من نسوان عمامنا ام نوريه لسانها يذب سم وخبيثه تكرهنا ما ادري ليش كلما تشوف سهام تريد تضوجها تسألها على الحباله وهاي سهام ماتتحمل جان تردها
سهام: شني عمه خاله كوبج وياي الحبلت والماحبلت انتي شلچ غرض بيه
جاوبتها نوريه
نوريه: شني سهام شمالج محموقه على امي جنج ناطرتلها على الزله
صارن يتصايحو وصارت هوسه وكمنا نفاككهن شو هاي نوريه عافت سسهام وچلبت بيه وجرت ثوبي الجديد جان يخبل اسود وبيه ورده چبيره حمره وبيها لمع جابلياه جاسم من البصره من راح لعمامه واخته سعاد وكلها تعجبت بيه يسمونه كويتي
وجرت شيلتي بس انا من جرت شيلتي حسيت الدنيا افترت بيه وصارت غشاوه على عيوني واذاني بيها طنه وما وعيت الا وانا مغرگه مي وكلهن ملتمات عليه ومن الموجودات مريه جبيره اسمها ام صبري هاي الطبيبه مال السلف مثل ما جانو يسموها هي جده وكل فروخ السلف نولدو على ايدها جانت كصيره وسمينه وجها دائري والتجاعيد ماليه وجها عبالك كل خط بيهن يحجي شلون تتعب من تتنقل من بيت لبيت حتى تزور  نسوان السلف هاي الحبله وهاي الي تريد تجيب وهاي المريضه الي تقره عليها وتنطيها من جنطتها القماش الي مرافقتها على طول وبيها كل المستلزمات الي تحتاجهن ولابسه محبس جبير حيل وخرزته زرگه وشيله سوده لونها الي صاير على حمار يبين انو هي قديمه وصار سنين ممبدلتها وام صبري اصلا مو هي مشتريتها اكيد وحده من نسوان السلف هدتها الها وفوگ شيلتها لابسه ما نسميها عمامه وهي وصله سوده تلفها النسوان الكبار فوگ الشيله على شكل عمامه وتكون جبيره حتى اني مرات اگول شلون متحملتها وتتحرك طبيعي وهاي العمامه شكبرها فوگ راسها ومشكله بيها چلاب ذهب وين ما تكعد تسولف قصته الي هواي مرات نتوقع هي قصه وهميه انو هي قبل دز عليها تاجر معروف بالولايه وجيبت مرته الي هي الزوجه الرابعه وهو ما عنده خلفه وجانت بطن مرته كلش جبيره ومن جيبتها ولد وبعدين باوعت كالتله اكو بعد فرخ وطلع هم ولد وبعدين باوعت وشاف بعد واحد وطلعته وصا عنده تلاث ولد ومن فرحته حمل ام صبري اشكال والوان من مونه ولحم وبط وشيله وعبايه ودشداشه وهذا الچلاب هاي هي ام صبري طبيبة السلف.
المهم من كعدت سألتني كم سوأل وحسب خبرتها كالتلي ابشري جده انتي حامل 😨
                 """""""""""""""""""""""
البارت ١٠١١ كلمه ادري زغير بس هو بارت يعرفكم بس على ابطال القصه واتمنى انو يعجبكم ومنتظره رأيكم بما انو هاي اول قصه اليه واتقبل كل التعليقات بس كون متحتوي على كلام بذيئ او جارح وتعليقاتكم هي الي راح تخليني استمر بتكملت القصه او لا وشكرا