برنو الكحلاء

تكملة البارت الثالث

برنو الكحلاء
الكاتبة نغم الموسوي
————————————————-
يا الحضنك دفو خليني انامن بيه
وخليني اغفى على دكات گلبك
وخليني اشبك حضانك شباك
وحلم صاعد للنجم اكتب احبك
                   🌹🌹🌹🌹🌹🌹

( عليج العباس شلوني وياج ما ذكرتج بيام عرسنا)
جانت ضحكتي كافية انو تجاوبه ضحكت غزل مسوج بيه الخجل الي يخلي المره تحلى بعين محبوبها
( وعلي غير احس روحي بعد كل هاي السنين واني ما مرتوي منج )
نمت بصفه  خليت ايدي على خصلات شعره واني العب بيه باشارة مني اني مستمعته واني اسمع كلمات الغزل واطلب منه اكثر واكثر
هو يحجي وانا اباوع على عيونه وصدك مثل ما كال ردني لايام عرسي ❤️❤️❤️
  شفت نفس ذيج النضره بعيونه من شافني وكال اريد اخطبنچ وبساعتها حسيت الدنيا ما واسعتني من الفرحة رغم قلبي تشعوط والوم بروحي عليش انا هيج ارتبكت وما عرف احجي وياه شمالني مخبوله وطبيت اركض

ظليت بحيرتي وافكر بردة فعله  وشلون راح يسفر سكوتي وطبتي للبيت من دون ما اجاوبنه شراح يگول عني مسودنه لو ما راضيه لو مثل ما يكولون السكوت علامة الرضا
وارد اجاوب روحي
بس ما كالو الركض وعلامة الرضى شلون بيه انا اظل هيج  الافكار تجيبني وتوديني وعلي انا اذا ظليت بعد اسبوع على هالحاله اموووت بقهري
ياربي شسوي احجي كلشي لخالتي مرت ابوي لو احجي لصاحبي سهيله
                     🌸🌸🌸🌸🌸🌸
مرن يومين وچان الجو حلو وطلعنا بره انا اشر بهدوم ابوي باچر معزوم على فصل بس شنهي انا مخردله فرحانه ومتندمه وفوگ قهري نسوان اخوتي المحارباتنا انا ومرت ابوي
وخاصه اليوم اشوفهن يكعدن ويعاينن علي ويتبسبسن بيناتهن
ساعه يضحكن وساعه يسولفن على كيف وساعه يتشاورن وانا بين هاي وهاي صرت بحيره اكبر
ياربي شافني ذاك اليوم من وكفت وياه سمعن حجيه

وانا دايخة بدوامة تفكيري اثاري مرت ابوي تعاين علينا من بعيد  واجتي وصاحت بيهن
( شنهي السالفة صاير الضحچ بفلس ما تضحچنه وياچن )
جاوبنها وهن يعدلن بكعدتهن ويبتعدن وحده عن الثانيه
( لا عمه ماكو شي السالفه مو يمچن)
ونفضن دشاديشهن وكامن وكلمن راحت لبيتها
وچان خالتي مرت ابوي تصيح عليه
( هيله يمه تعاي جاي حذاي' بجواري')
جايه يمه بس اشر هديمات ابوي
كملت شرهن ورحت يمها
( ها خاله تامريني بشي )
( يمه هويله تعالي اكعدي )
كعدت يمها واني مركزه وياها وعيوني عليها منتظره تحجي
( يمه هويله انا تدرين بيه احبنچ من زمان گبل لا تجين تعيشين يمنا وتدرين ليش احبنچ؟) جاوبتها بحيره واستفسار ليش؟؟؟؟
( يمه انا چنت بنيه وقبل لا انخطب چنت اتمنى تصير عندي خلفه واصيرت ام وبعد سنين طويله من العذاب المريت بيه من كل نسوان السلف بعد ما مات حيان خطيبي )
سكتت وچنها گلبت مواجع مرت بيها گبل 
وبعدين هزت راسه عبالك واحد ينفض الافكار الدخلت براسه وكملت حچيها
( وبعد هاي السنين تزوجت ابوچ الله شاهد ابوچ عشرته حلوه واخوتچ ما حسسوني انا مرت اب )
جرت راسي وخلته بحضنها وكامت تفلي بيه وتحجي
( بس انتي بقيتي عد عمتج ومن چنت اشوفچ بحضنها گلبي ينحمس اتمنى اخذچ بحضني واربيچ بس ابوچ ما قبل وكال عمتچ تعلقت بيه واخاف تزعل اذا اخذناچ منها الله يرحمها ومبرية الذمه )
الدمعه طفرت من عيوني عصب عني
( الله يرحمها شذكرج بهاي السوالف اليوم )
ضحكت وچنها جايبه خبر حلو
( لو عمتج عايشه چان اليوم الدنيا ما واسعتها من الفرح وانا وعلي ابن ابي طالب فرحتي ما تقل عن فرحتها)
سكتت ثواني وگالت
( انا اريد ازفنچ وافرح بيچ )
وانا كمت من حضنها وتربعت بصفها على البساط  الي من حرارة الشمس تأٓكل نصه وفتحت عيوني الي بيهن مية سوأل وسوأل ليش هيج تكول ؟  خاف خطبني واحد ؟ ومنو هذا الواحد ؟ هو جاسم لو غيره ؟ خاف يطلع واحد ثاني واهلي موافقين عليه
كل هاي الاسئله الي نخبصن داخل راسي
بس مرت ابوي فطنه وتلكفها وچنها عرفت كل الاسئله وجابتني عليهن ملهن بجمله وحده
( لا تخافين يمه جاسم ابن عمچ اچا هو وابو البارحة بالليل وخطبوچ منه ومنتظريه رايچ)
قلبي فز مكانه من سمع بأسمه وعيوني كامت تجدح فرح وبدون وعي مني كشرتي صارت شكبرها ومن انتبهت على نفسي دنگت راسي واستحيت
( شوفي يمه هويله انا موش غشيمه من يوم شفنا من چنا نخبز انا وياچ عرفته هواچ )
زاد خجلي وحسيت اريد اطم روحي من المستحى بس معندي غير شبكت خالتي وضميت راشي بصدرها 

خلت ايدها على ضهري وهي تضحك
( وعلي ضحچتيني يا هويله چا انتي عدالج انا ما حاسه بيج انا عرفت وحفظت كل تفاصيچ)
بغض النظر عن كل الفرح الي دخل گلبي شكرت ربي وحمدته على نعمة مرت الاب هاي مو كل النسوان مثلها يعني بسنه وحده خلتني احبها واحترمها رغم هي تصيحلي يمه بس انا قلبي ما ينطين اناديها كله خاله
                ———————————
والله ثاني يوم اجوي الخطابه وخطبنا وقرو فاتحتنا وعقدلنا سيد جيبر بسلفنا اسمه ابو عباس كلها تهابه وتحترمه اولا احتراما لسبه لجده رسول الله وعاقد لكل الشباب والكل يحترمه ويعزه
ثانيا هو رجل هيبه طويل وضخم حيل واسمر حيل
واخيراً صرت مرته على سنة الله ورسوله مثل مايكولون وسمت الشباب تهوس والنسوان تهلهل وباركنلي وبنت السلف يعايننلي بنص عين وانا چنت لابسه دشداشه حنره بيها ورده خضره زغيره وهي بالصل دشداتي كل عيد البسها وحددو العرس بعد رمضان ثالت يوم العيد
حسيت الوقت هواي لحد ما يخلص رمضان هو رمضان بعدله اسبوعين بس مرت ابويه تكول اي يا دوب نلحگ نجهزها
النقد مال العروس بذاك الوكت الغريب  خمسين لو ستين دينار واذا اقارب وابن عم يصير النقد من العشريه للتلاثين بس انا عمي شال خمسين وانطاهن لابوي
           🌸🌸🌸🌸🌸🌸🌸🌸🌸
وبيوم توني غاسله وگوه امشط بشعري واجاني ابن طارق وچان كلش وكح واخذ المشط ومني وطلع يركض وانا اركض وره وعلى مود الحكه شلت شويه من دشداشتي وطلعت رجليه وبين ما وصلت بره ولكيته واكف كبالي .....يتبع
              ———————————-
حبايبي التكمله ٨٥٧ كلمه
يعني البارت الثلث وتكملته اكثر من ٢٣٠٠ كلمه
ملاحظه البنيه الي طلبت نشيل الاقواس ونخلي بدالهن رموز بعد اسم المتحدث هي ما انتقدت شي وحتى لو چانت تنتقد ماكو مشكله اني اريد واحد ينتقد كتابتي حتى اقوي من نفسي
وارجع واكول مشكوره حبي على هالمقترح واني نزلته حتى نشوف اذا الاغلبية يردون نشيل الاقواس نشيلها
واذا لا اعتذر منج قراة ممتعه
تحياتي نغم الموسوي