برنو الكحلاء

البارت الثامن

برنو الكحلاء

بقلمي نغم الموسوي

🌹🌹🌹🌹🌹🌹🌹

بكيت وهل بكاء القلب يجدي؟
فراق أحبّتي وحنين وجدي!
فما معنى الحياه إذا فترقنا؟
وهل يجدي النحيب فلست أدري
فلا التذكار يرحمني فأنسى
ولا الأشواق تتركني لنومي
فراق أحبّتي كم هزّ وجدي
وحتى لقائهم سأظل أبكي.

*********************
صرخصتي دوت وعلنت استسلامي
ما كدرت اكعده من نومته
ولا كدرت استوعب اني خسرته
جانت هاي اخر ليله انام بحضنه
وما حسيت غير الولد يتصارخون ويوكعون على ابوهم
هذا الي يشمه وهذا الي يبوس برجليه
وواحد يصيح ابوي ما ماتت خلونا ناخذه للمضمد وكلها تصرخ وتنحب
صوت صياحهم وعاني من حلم عشته انا وياه
ما جنت اريد اصدگ هو راح وراحت روحي وياه
جنت ادفع بيهم وصريخي تعده حدود البيت
حسيت صوتي طب لكل بيت بالسلف
واني اصيحن بيهم
(لا تاخذونه مني
ولك يمه محمدددد
يمه كريم)
وچنت اجر الولد منه واحد واحد ونمت فوكاه
(لا تاخذونه مني
ولكم والله هسه يگعد)
واهزه بكل قوتي واني فوكاه
( جاسم اكعد ولك جاسم يردون يفرگونا اكعد لا تعوفني جاسسسسسسسم)
جنت احسن روحي تنتزع من بين ضلوعي
احس صريخهم يخليني افقد الامل بكعدته
چانت روحي تنازع وانا اوخرهم منه
اباوع على الولد
حالهم ما يقل عن حالي
هذا الشاگ دشداشته وهذا اليبچي ويصيح يابويه
بس انا حرت شصيح وشگول وشأصرخ
اكله يبو بيتي وخيمته انت ابويه وانت اخوي وانت امي وانت كل دنياي هو ابني هو رجلي واهو ابوي واخوي هو كلشي ..........
ومن بعيد اجاني صوت
صوت يصيح يا يمه يبعد روحي روحك
عمتي الماعنتها رجليها وطاحت بعتبت الباب وهي تصرخ يايمه ياشمعت بيتي يايمه
واجت تزحف وتدگ على راسها
وصلت يمه وخلت راسه بحضنها ونزلت راسها تشمه من صدره
ساعتها ما شفت واحد بس انا وهي وجاسم بنصنا
ساعه نسولف وياه وساعه نشمه وساعه نوكع فوكاه وساعه تعاتبني واعاتبها مصيبتي ومصيبتها وحده
جاسم جان مو بس ابن الها
جاسم عزيزها واول فرحها
وجاسم جان يدوس على الدنيا كلها لخاطر رضاها وضحكتها بوجهه
اباوع على حالها وحالي
واحس روحي بحلم
حلم خله كل اعضاي تتراجف

وطبو الزلم يردون يشيلونه
بها اللحظة الرادوني اوخر منه
حسيتهم اخذو سنيني وضحكتي وفرح گلبي وونسته

جسمي رجف واعظامي تخلخلت والضعف سرى لگلبي والخوف حاوطني ما اريد اشوف الدنيا الهو مابيها
نمت فوكها انا وعمتي الي حتى حسها راح وما طلع جانت بس دموعا تتجارى

حاولنا مانخليهم يشيلونه
بس الموت اقوى مني ومنها وكسر بينا اثيننا
واخذوه وطلعو
اخذو الحنيه والطيبه من هذا البيت
اخذو فخري وهيبتي وشمس عمري الماظنيت يجي يوم ونفترك من وكت
اااااااخ يالموت تسعجلت هواي
السلف كل انكسر بروحته وعمري خلصت سنينه الحلوه
                    *******************
طول ايام الفاتحة واني وعمتي ماكمنا من مكان سجادته الجان عليها
وعمتي راح صوتها وصارت ما توعى على روحها ومن تكعد تخلصها بچي
وبيوم السابع وانا نايمه على سجادته وشفته....
اي شفته كاعد نفس الكعده ودشداشته البيضه وصدرها مفتوح وشامر الشطفه على چتافه وسبحته بيده وبصفه بت زغيره كاعده يمه على سجاده حمره وكبالهم زرع وهو يضحك على سوالفها وهي تلعب بالمحبس مالته وشال عينه عليه وانا چنت كبالهم مچيمه التنور ومتحزمه اريد اخبز بس عيني عليهم وگلي
( ها يهيلتي تغارين من برنو )
وجرها وكعدها بحضنه ورد عاين عليه وگلي
( لا تخافين انتي الگلب وهي اللبة مال گلبي) ....
وضحك حيل وصاحني وگوم البت من حضنه وخله ايدها بإديه وگاللها
( روحي بويه برنو روحي ويه امچ عاونيها )
فزيت من نومتي وما حسيت غير ميت الراس طگ وفجأة اجاني الطلوگ
ركضت النسوان لام صبري الچانت عدنا وما فارگتنا من اول يوم وهي يم عمتي...
عمتي الوضعها من سئ لاسوء واجتني بكل سرعتها التكدر عليها ومن شافتني صاحت عليهن
( خايبات هلا اركضن المره راح تجيب .... اريدن ماي حار ووحده تجي تعاوني اني تعبانه )
گعدت مرت ابوي يمي بس هي هم ما تكدر مريضه وچبيره وطبت وياي هاشميه بت خالتي ......
ومر الوكت اني اشوف الموت بعيوني
وما چان بيه حيل للطلوگ والدفع
وچنت اصرخ بعالي صوتي واصيحن بس باسمه .....
ذبت فوطتها ام صبري والعرگ يصب وهي تصيح بيه
(ولج يمه عينيني وادفعي راح تموتين الفرخ )
واسمع مرت ابوي تقره ايات يم راسي
وهاشميه لازمتني وتمسح بوجهي وهي تگلي
( خيه فدوه اغديلج عيني روحج وعيني الفرخ راح يموت مايصير وعلي ابو الحسن جاسم يزعل عليج )
من گالت هيچ حاولت ادفع كل قوتي وحسيت روحي طلعت والدنيا صارت سوده بعيني وبعد ما حسيت بشي  بس حسيت روحي هايمه بالفضا
كعدت لكيتهن مغرگاتني مي وملتمات عليه ويصرخن ومن بين صريخهن سمعت صوت طفل انداريت واشوف ام صبري مخليته بحضنها وهي تگلي ....
( الحمد لله على سلامتچ يمه جبتي بت وشحلاتها صح ما تشبهچ بس تخبل )

رادت تنطينياها ما رضيت وما قبلت اشوفنها حسيت جيتها فگرت هذا البيت
من بعد جاسم ما رايده شي من الدنيا
گمت اصرخ والطم على صدري
(ما اريدنها ولااريد شوفتها وخروها مني.... لا تحلمن يجي يوم اخليها على صدري وارضعها..... ما اريدنهاااااااا)
شبگتني هاشميه
( خيه عليچ العباس كافي لا تصارخين مايصير انتي نفسه )
ومرت ابويه اندارت على البنات الواكفات هاي التتفرج وهاي التبچي وهاي الي تگول مايصير چا شلون تموت الفرخة
وهاي التگول لان بت لو وليد چا رضعته
واني محد حس بگلبي والنار التسعر بيه
وصاحت بيهن مرت ابوي رادت گلاص مي
وجابلها المي وكعدت تقرالي عليه ايات وام صبري جابت البت وهي تگلي
(چا انتي شعدالج من تسوين هيج راح يرد ؟...الله يرحمه بس لو انتي صدك فاهمه وقاريه القران چان عرفتي هو يسمعچ ويزعل منچ ....هاي مداراتچ لبته الچان يتمناها؟...)
صاحت عليه مرت ابوي وشربتني مي الي قرت عليه وبالگوه قنعوني ارضعها
كومتني هاشميه وعدلت كعدتي وانا روحي مخلوبه ولا چني هيله القويه الچنت اجيب منا واكوم منا
وخلوها بحضني وبس صدتلها عيني وريحتها وصلتني وهي تباوعلي بعيونها الكبار التارسات وجها الزغير واني دموعي صبن وسمارها اليشبه سمار ابوها وحلگها الزغير وباوعت طالع شويه من شعرها من وره العصبه الزغيره ( وهي حجاب صغير ابيض اللون يربط بيه رأس الطفل حديث الولاده)  المعصباتها بيها
چان شعرها اسود وثخين وسرح مثل ابوها بس رغم كل هذا ما چنت متقبلتها ولا رايدتها ....
رضعتها ومن خلصت گلتلهن اخذنها ما اريد اشوفنها .....
اخذتها مني هاشميه
( انطينياها خيه )
وشالتها وهي تصلي على النبي
( اللهم صل على محمد وال محمد يمه شحلاتها )
وبعدين اندارت عليه وهي تسألني وانا چنت اريد ارجع انام احس جسمي متعوب وچنهم محملين عليه
( خيه هويله ما گلتي انتم مختارين اسم  لو انا اسميها ؟)
سوألها چان مثل خنجر ودچته بنص گلبي ....واخذتني افكاري ويييين .... رحت لذاك اليوم الجاسم يسولف وياها وهي ببطني ويصيحلها برنو گلبي رجف وعيوني صبن دمعهن الصار سلوتي من بعده ....انتبهت وانا اسمع ام صبري
(شني يهويشميه طلعت السنون گبل العيون خافن تطلعين انتي المجيبتها وانا ما اعرف ؟.... انا اسميها....)
غمضت عيني واني اتخيله يصيحلها برنو
وكلتلهن
(برنو ....... )
كلهن سكتن وفتحت عيوني وعاينت عليهن وهن صادات عيونهن عليه
( هو سماها برنو ..)

             💔💔💔💔💔💔
البارت ١٠٥٠ كلمه
السلام عليكم حبايبي مثل ما وعدتكم وره رمضان نرجع ننزل وهذا بارت زغير ومن عنده دخلت شخصيه البطله برنو للقصه...
اتمنى لكم قراءة ممتعه واتمنى يعجبكم البارت انتظر تعليقاتكم ومثل كل مره اكول حتى لو كانت سلبيه راح اعتبرها انتقادات بناءة بس المهم ما بيها الفاظ جارحه او معيبه....
احبكم
يتبع.........