برنو الكحلاء

البارت السابع

برنو الكحلاء

بقلمي نغم الموسوي

🌹🌹🌹🌹🌹🌹

شجاني وما حضنتك كبل متروح * * عفتني وغيبتك صارت طويله

شجاني وما كتلك الله وياك * بقيت انتظر ليله بأثر ليله

رحت بس من خلصت الدموع * وشلت الروح بيدك فرد شيله

ونسيت اﻷبتسامه وفرحة العيد * ﻷن ضحكاتي بغيابك صارت قليله

بعد هم عيني تفرح يوم ملكاك * لو جمعتنه صارت مستحيله

ظلت روحي تسأل من غبت لليوم * * تكول يمرنه ابونه لو احنه نجيله ؟

==============
الكحلاء الشهر ١٢ السنه ١٩٧٠

وبعد ايام وما وره صلاة المغرب والولد كلهم گاعدين يتعشون ويه عمي وچانت الدنيا بارده شهر اثنعش وشاعلين الچوله
ومانحس بس نسمع صياح الولد يتعاركون
وطلعت اركض وناسيه روحي ووجع ضهري....
عمتي جانت واكفه وترجف من الخوف وعمامتها واكعه وايديها وحده على چتف جاسم والثانيه على چتف حسن وهي تتوسل بيهم
( يمه جاسم فدوه لگلبك هد اخوك يمه ..... حسن يمه استهدو بالرحمن ولكم يمه ابوكم كاعد )
واندارت على عمي وهي تصيح عليه .....
(ابو جاسم ! ما تحچي شي الويلاد يتذابحون وانت جويعد وما هامك ... يمه اللحكولي وليداتي تذابحوا)
حسين چان هو والولد يفكون بيهم وعلاوي كاعد يم جده شابگه ويبچي ......
والتفت اشوف سنيه شابگه بناتها وبنات حسن ويبچن ...
وعلى جهه نوريه الوحيده المت علينا الوادم بعياطها.....
(يا خايبين هلا الحگونا.... راح يموت الزلمه چي طالب بگه يممممممماي)
والتفتت عليه وهي تصرخ
( ها تتفرجين ام المصايب تريدين الورث الچ والولدچ... حرضتيه يكتل اخوه ...)
صريخها وعاني على روحي والناس التمت علينا وانا اباوع شفت عمي كاعد ولا تحرك ركضت عليه وحاچيته
( عمي... عمي تسمعني حاچيني عمي ..)
وبده صوتي يعلى وكمت اصرخ ....
( عمي..... بيك شي عمي حاچيني ...)
دفعت منه علي الشابگه ويبچي
( خايب علي يمه وخر من جدك .....)
وچانت هاي اللحظه ما تمنيناها وخرت علي منه ....
وما حسيت عمي طاح على الجهه الثانيه واني صرخت
(يممممممممممممممممممه عمي مات.........)
وعيني جانت على عمتي وعلى جاسم بس ما شفت غيرهم
اندارت عمتي وهي ساكته چن لا صارت عركه ولا شي ولا چنها التوها تصرخ وكعدت يمه وهي تحچي بهداوه
( ياا ابو جويسم شني تريد تغشمر الولد ..... الولد تفاككو شوفهم .... )
خلت راسه بحضنها والدموع تتجاره بس تحجي على كيف وتمسح على ضهره
( كوم ابو جويسم لا تغدر بيه .....ذوله ولدك يمك ابو جويسم لا تعوفهم وتعوفني )
وبعها اندارت علينا وعيونها تمليها الحيره وصرخت صرخة معلنه استلامها واعلانها لوفاة عمي ....
(يممممممممممممه يارفيج دربي ....)
وصارت الفاتحة والكل حزن عمي چان چبيرهم ....
بس الزرف گلبي عمتي وجاسم
عمتي ما تحاچي الولد وزعلانه عليهم
وجاسم يا روحي روحه وجهه اصفر وكوه ساند طوله ولا ياكل ولا يشرب وحاله يصعب على الكافر
وبعد اسبوع خلصت الفاتحه
ياله طب جاسم للبيت
چان كاعد ودشداشته وصخة ولحيته طويله
ولاف الشطفه على وجهه
والي قلقني جاسم طول الاسبوع ما باچي وكاتم بگلبه
انا چنت كوه اجر النفس ولابسه دشداشه سوده عريضه وشيله سوده ....
رحت يمه وكعدت يم ضهره وشبگته من ظهره....
وبهاي اللحظه طاحت دموعه ودموعي سوه وبقى ساكت ما يحچي بس الدموع تجري والعيون حمر
چنه منتظر يكعد بحضني ويبچي
تمدد وانا اچيت وخليت راسه بحضني
( ابچي يا بعد روحي روحك عمي يستاهل ينبچي عليه ....)
( يهيله گلبي مغيم ومقهور ابوي مات وما راضي عليه وامي ما تحاچيني ......)
( لا تگول هيچ عمتي چم يوم وتهدى هي ما تحچي ويه الكل ....)
اندار عليه وگلي.....
( انتي هيچ تگولين وانتي تعرفين هي زعلانه علينا ....)
جاوبته واني احضنه واحچي قريب اذنه بصوت ناصي
( اي وشني يعني عمتي حگها تغتاض عليكم بس تظلون ولدها وچم يوم وترضى بس انتم لا تعوفونها ....)
شبگبي وگالي
( شلون اعوفنها يهوليتي چنت ما تعرفيني ....)
(يا بعد روحي شد روحك .. ولا تنكسر عمي رباكم لهيچ يوم تكونون زلم من بعده ولم اخوتك وحل المشلكه ولا تخلي اخوك مغتاض الفلوس ما تعوض اخ ولا اب ...)
كملت حجيي وانا انزل منه الشطفه ومن راسه و وجهه
( ان جان ابوك راح ومغتاض منكم بحلك للمشكله راح تخلي يرضى عليك وهو بگبره وهيچ حتى امك ترضى عليك ..)
كلمت حچيي وانا ابوس بركبته وبعد لحظات ارتخى جسمه وهدئت اعصابه.....