برنو الكحلاء

البارت الخامس

برنو الكحلاء

بقلمي نغم الموسوي
🌹🌹🌹🌹🌹🌹
تعال بحضني ذوب وارد احاچيك
بشي اكبر بعد من الصراحة

بكلهن صدكت بس يطلع شلون ؟
خدك والگمر نفس المساحة

عسل شفتك وانا الماضايگ وجيت
على فراش المرض ما شفت راحة

وبما انو شفاء العسل للناس
يعني البوسه من شفتك مباحة

يا الخصرك افق وبوكت الغروب
ونظراتك حضن والشوگ لاحه
............................
هيلة ١٩٥٩
طول الليل وانا افكر بحچي خالتي، واشوف شلون هي عاشت ويه ابوي من خمسطعش سنه ولا يوم سمعناهم تعاركو، هي تحب ابويه وابوي هم يحبها وعشرتها حلوه وحتى اخوتي يحبونها ومن يومها وهي تعاملنا مثل الام وازود.
حسيت كل حچيها لمصلحتي ولازم امشي بيه، بس السوأل المحيرني شلون اطبق حچيها الحياة تتطلب واحد يرسملها خطه ويعرف شلون يتصرف.
( اي هويله ... هاي اول خطوه الچ بحياتچ ويه جاسم اذا لعبتيها صح، يعني انتي سنعه
وبت ابوچ.... خليه شعليه ما راح يصيرله شي اذا ما شافني گبل العرس)
اصفن وارد اقنع بروحي
( اي چا هو ما ماخذ ياهي الچان انا هويله بت سلمان)
وكعدت الصبح وانا نشطه،  صليت ورحت ازهب الريوك لابوي واخوتي ولگيت ابوي ومرت ابوي كاعدين وشاعلين الچوله وعليها ذاك الچاي الريحته تطر الراس.
( صباح الخير )
عاينو علي وهم يشربون الچاي
( صباح العافيه بويه شلونچ يبعد ابوچ وطوايفه)
دنگت بست راسه
( بخير بويه ما دام خشمك يشم الهوى)
ضحكت مرت ابوي وهي تعاين علي بتركيز وتأشرلي اكعد يمها
( تعاي جاي اكعدي حذاي)
( اروح اسيح لابوي سياحات يتريگ بيهن )
( لا يا بعد طوايفي، احنا تريگنا من زمان بس روحي سويلچ سياحة وتريگي )
رديت وانا اجاوبها
( ها چا اذا انتم ماكلين انا ما اشتهي هسه اشرب بس چويه )
عاف استكان الچاي وهو ينشدني
( عليش بويه ما تتريگين!؟ موجعه من شي ؟)
ضحكت ودنكت ومرت ابويه سبقتني وجاوبته
( لا ما الها غير العافيه بس تعرف هذا حال العروس، تفكر بالعرس وبالجهاز)
چانت تحچي وهي تغمزلي
وابو رجع يشرب چاي  وارتاحت معالم وجهه
( لا اذا هيچ معذوره بويه)
وضحكو هو ومرت ابوي، وانا وجهي كام ينطي الوان من المستحى ورجعت مرت ابوي تغمزلي وتأشرلي اكعد يمها
وانا اكعد ابوي يكلي وهو يعدل بغترته وچنه يتحضر لحچي يريد يكوله
وانا من شفته هيچ، تخردلت وظليت منزله راسي وانا اعدل بكعدتي ودشداشتي ، ومرت ابوي چنها عرفتني.
لزمت ركبتي بحركه منها لتهديتي وچنها تكلي انتبهي لابوچ يريد يحاچيچ.
( بويه هويله عمچ انطاني برطيلچ خمسين دينار )
گالها وهو يطلع من جيب دشداشته الفلوس خلاهن على البساط جدامي وخلى فوكاهن بعد فلوس وگلي:
( وهاي عشر دنانير مني ومن اخوتچ واي شي تعتازينه بس اطلبي وانا واخوتچ ما نقصر ان شاء الله )
نزلت راسي والبسمه ارتسمت على شفافي
( مشكور بويه ما تقصرون اهم شي حسك بالدنيا)
وحسيت بعد ما اكدر ابقى كاعد استحيت من ابوي وكلتلهم بصوت ناصي
( اترخص انا اكوم اسويلي ريوگ)  وهاي چانت حجه حتى اكوم من يمهم
والوي يصيح وراي
( بويه هذن فليساتچ يم مرت ابوچ هي راح تتكفل جهازچ)
ما جاوبته وكمت امشي سريع
وما حسيت غير مرت ابوي تصيحني
( يمه هويله همي روحچ بس تطلع الشمس نروح انا وياچ بلكت نخلص جهازچ گبل رمضان )
استعجلت بسوألي وما فكرت انا شگاعد اگولن وانا اندار واعاين عليهم
( يعني العرس گبل رمضان ؟ )
ابوي تبسم ونزل راسه وسوه روحه يخوط بالچاي ومرت ابوي خزرتني.
ساعتها عرفت غلطتي وركضت بسرعه وانا اصبن عرگ من الخجل وانا افكر انا شسويت شلون بعد اباوع بوجه ابويه.
بعدها طلعت بره وانا احسن روحي غير وحده، وانا اباوع على السما وچنها اليوم اصفى من كل يوم... والنجوم كثرانات ...والهوى عذيبي يدخل للريه يفتحها...واحس نفسي حتى نسمة الهوى التمر على خشمي احبنها 
( اي يا هويله هيچ العشگ فر راسچ؟ ما ظل شي وتعرسين يا هيله )
صفنت وروحي راحت يمه واحجي ويه روحي
( هسه هو شگاعد يسوي ؟ هم يفكر بيه؟ وهم امر على باله ويتخيلني عروسته؟ )
وخدودي حمرن خجلت من الافكار البراسي.....
                *******************
جاسم ١٩٥٩
ما اعرف شلون مر الليل على الوادم بس عليه الليل مر قاسي. ليلي كله اتگلب وما عندي ببالي غيرها....
ساعة اتخيل ضحكتها وصفت سنونها.. وساعه عيونها البيهن سحر الدنيا كلها .... وساعه رجليها التبرگ چنهن ليلو، صورتها وهي واكفه ورافعه دشداشتها ما تفارگ بالي .. كلشي بيها سحرني وسودني ....
( اخخخ يا زمن هذا انا جويسم هيچ يصير بيه، چنت اضحك على العشاگ واگولن كله چذب بس ثاري العشگ چتال يجويسم )
طر الفجر وانا اتگلب بفراشي . كمت صليت  وخدتني رجليه بره اشمن هوى.
شفت امي كاعد وصاحتني
( صباح الخير والعافيه يمه جويسم )
( هله يمه صباح الخير ) بستها من راسها وسألتها
( چا وين ابوي ؟ يصلي؟)
( يخلص صلاته ويجي ، ما تجي تشربلك چويه؟  وهذا السياح توني مسويته)
جاوبتها وانا الف بالشطفه على راسي
( عاشت ايدچ يمه ! بس ما مشتهي خليني اطلع شوي وارد )
عافت الاستكاين البيدها الچانت تغسل بيهن وهي تگلي
( اععععع يمه شخيرك يوجعك شي )
( لا يا يمه شني سالفتچ ما يوجعني شي بس اريد اشمن شوية هوى )
( روح يمه الله ومحمد وعلي وياك.  الهوى اليوم عذيبي عود من ترد تريگ)
تحچي وهي تلزم الكاعد بيدها تريد تكوم
( خليني اروح اكعد اخوتك شمالهم ما يكعدون ووراكم شغل )
طلعت بره وانا اسمع صوتها تصيح
( حسين يمه اكعدو طر الفجر وانتم  نايمين )