برنو الكحلاء

البارت الرابع

برنو الكحلاء

الكاتبة: نغم الموسوي

——————————-
كون الكاج وافتح لحضنج بيبان واجيج بهيبت مرتب
اريد اكل رطب مليت خلصت العمر اعزب
اريد اتشلبه لاعصانچ وافصل من شعر راسچ غط وهدوم
على صدرچ مدري شنهي ايحبهن المفطوم
بعدني زغير وانت فراش وشيكره الطفل بالنوم
❤️❤️❤️❤️❤️❤️
الكحلاء ١٩٥٩
وبيوم توني غاسله وامشط بشعري واجاني حمزه ابن اخوي طارق وچان عمره ست سنين بس سبحانك يا ربي ما يشبهنا اسمر ومصلبخ وضخم اليشوفه مايصدگ عمره سته  وكل هاي بجهه ووكاحته وعرامته بجهه چان معذرب بس حنين
حمزه همش مني المشط الخشب وركض وهذا المشط من الشغلات العزيزات على قلبي اخذته من صندوق ببيت عماي الله يرحمها بعد ما ماتت جانت بس هي تمشط بيه وما تقبل واحد يلعب بيه ويلزمه

هو طلع يركض وانا طلعت وراه اركض ومن شان الحكه شلت شويه من دشداشتي وطلعت رجليه ومن وصلت بره لكيته واكف كبالي
ومو بس هيچ چنت اركض واتخلف بحمزه
( خايب حميزان انا الك اذا ما خبرت ابوك بسالفه الدجاجات ما اطلع انا هويله بت امي وابوي )
وسمعت صوته يصرخ
( اخ ميل عني عوفني اجتني راح تطگني)
عاينت وشفته لازم حمزه من زيجة ( ياخة الدشداشه)
من طلعت صد عيونه عليه وكام يعاين بنظره خلتني انخبص واتخردل وما انتبهت رجليه طالعات

اخذ المشط من حمزه وهده ودفعه يروح للشارع وعيونه ثابته عليه
انا گلبي يرجف مثل السعفه بس حسيت عنده حجي خلاني واكفه ومنتظرته يگوله
شو هذا تغيرت نظرت عيونه وصار عصبي وصاح بيه (نزلي ثوبچ انتي ما تشوفين روحچ بره شو تعاي جاي )
وانا مثل الطفل اليسمع كلام ابوه رحت وانا انزل بثوبي وظليت اعد بثوبي بس حتى الهي نفسي وما ارفع عيوني واشوفنه
وصلت يمه وكتله واني مدنكه السلام عليكم ورفع عيني وصدت عيني بعينه وحسيت شي دخل لجسمي جوه جلدي وخلاني ارعش من جوه وجسمي كله كش وشعر جسمي وكف مثل نظرة عيوني الوكفت وظلت متبسمره كدامه
( سلام الروح للمعشوگ العشگه نخر بعظامي  شلونها هويلتي وعطري )
حسيت روحي انسلبت مني وما كمت اشوف وظليت بس فاكه عيوني واعاين عليه
عيونه تلمع وبيهن شوگ وحنيه وضحكته حسيتها تريد تاكلني وچان يكمل حجيه بعد ما عرف ما مني چاره واحجي
( هذا المشط راح اخذهواشم ريحة شعرچ بيه واصبر بيه روحي لحد ما اخذچ بحضني ارتوي من هاي الشفايف الحارمتني نومة الليل )
كل هذا وانا على حطتي ابو الهول مسيطر عليه واكفه لا حصت ولا نصت واحجي بداخلي
( خايبه هويله هذا يحجي وياچ شمالچ تبسمرتي احجيلچ چامه تظلين هيچ چنچ ابو الهول)
ضحك وبانت ضروسه وچنه قره افكاري وعرف شحجي ويه روحي
( ولچ هيلتي احجي وكوليلي شلون بيه انا شيصبري بعد )
وهو يحجي وبحركه خفيفه منه لزم ايدي وهو يتلفت يمنى ويسرى خاف احد شافه
( هية گلبي شرايج احجي وياهم يخلون العرس گبل رمضان )
جاوبته والكلمات تتكطع واحس حنجرتي يبست
( هااا انا بامرك انت فصل وانا البس)
( يا بعد روحي روحج انتي التامرين بس گليلي انتي تلحكين على الجهاز يا لا )
( انا ما اعرف بس مرت ابوي تكول ما نلحگ گبل رمضان )
انا احجي وياه بس كل تفكيري وعگلي وروحي يم ايده اللازمني منها
هويلتي انا شلون بيه انا عندي هواي حجي وياج ار يوم احجي ويه اهلچ واكعد وياچ ونسولف انا لا شفتچ ولا كعدنا )
( استحي من اعلي شلون انا ما اكدر اسوي شي من وراح الا على گولتك كونك تكوللهم بس وعلي هم استحي منهم ما ادري انت سوي التريده انا العليه ادعي بصلاتي كون لا تعارضونك ويقبلون )
ضحكت عيونه وسألني
( هلتي انتي تصلين )
جاوبته بثقه واني اركز على كل كلمة اكولها
( اي چا شلون انا اصلي واقره قران بعد وما افوت فرض )
اتسعت عيونه وترك ايدي
( شنهي تقرين قران انتي تفكين الخط هويلتي احجي الصگد )
( اي وعلي چا انا اچذب عليك عمتي الله يرحمهاعلمتني كلشي الصوم والصلاة وهواي شغلات وعلمتني اقره واكتب )
( اخ يا هويلتي الفرحة ما سايغتني الله يسعد ايامچ وگلبج مثل ما فرحتيني ) رجع لزم ايدي بس هالمره بثقه اكثر بدون ما يتلفت منا ومنا
بس انا قلبي ماع وماعاد دريت بالدنيا
( هويلتي انا اريدنچ تسلعديني اني ما احتمل بعد عندي حچي وياچ اريد احچي گبل العرس  )
وانا مثل الطالب الينتظر اوامر المعلم ( گلي شلون اگدر اساعدك انت گول وانا تحت امرك )
( انتي يا بعد رويحتي بس گلي لمرت ابو تدبرها من يمها گليلها جويسم طالبهامنچ طلبه وهذا حگي انتي هسه بالشرع مرتي حلالي ما مسوين شي حرام )
(چا خوش اگللها واشوفن شتگول )
( انا هسه اروحن بس شلون بيه گلبي راح يظل يمچ)
جاوبته بسرعه من شفته هم روحه يريد يروح وبدون وعي مني وانا الزم دشداشته حتى اوكفه لان احس من كال رايح چن روحي راحت وياه
( شلون اشوفنك بعد انا )
من شفته ضحك كملت چني اريد ابررله موقفي
( يعني حتى اگللك شگالت مرت ابوي )
عاين على ايدي اللازمه بيها دشداشته وبضحكة مكر
( اااخ يا هيلة قلبي انتي تريدين تسودنيني على كلن انا ادبرها بس انتي لا تنسين تراني طاگ گلبي عليچ )
اندار وراد يروح ورد علين عليه
( ها ومثل ما وصيتچ همي روحچ بالجهاز لا تعطلينا اكثر )
( زين تدلل .....) جاوبته بنبره كلها حزن
تقرب عليه وچنه يشاورني
( راح اعدن يوم يوم شوكت انجمع انا وياچ ببيت واحد )
غزاني الخجل من قربه عليه وكلامه الحلو الخلاني اذوبن ذوب وعلي چني دخت وانتل تيلي
وطبيت للبيت بس ما اعرف شلون طبيت چنت امشي على رجليه لو چنت طايره الجوه رجليه چنها موش كاع چنه گطن وامشي فوكاه 👩‍❤️‍💋‍👨
                   ............................
رحت بوجهي لمرت ابوي الچانت كاعده تخيط بچرچف لوله (مخده على شكل اسطانه ) ستان سمائي
كعدت يمها وبعيوني الحجي لاريد اكولنه وهي تعرفني
( ها هويله عندچ حچي گولي يمه شرايده)
حچيت بس چني خجلانه واما اعرف منين ابدي الحچي
( خاله انا طالبتچ طلبه وعليچ اخو زينب لا ترديني )
( اعاااااما عاش الي يردچ احچي يمه كل الي بخاطرچ ما يردچ الا لسانچ بس ماطول حلفتيني باخو زينب شغلتچ چبيره ياهويله )
( اي والله خاله ) جاوبتها وانا اعدل بكعدتي ومتررده وارتب الحچي گبل لا اگوله
( خاله جاسم يسلم عليچ)
بعدني ما مكمله حچايتي وهو صات بيه
( شنهي يا جاسم ولج بس لا يكول جاسم ابن عمچ ولچ هويله وين وشلون شفتيه )
بلعت ريكي ( اذا من هسه انتي معصبه چا انا ما راح احچي شي )
ونزلت دموعي
( چا انا ماعندي غيرچ احچيله لا ام ولا اخت وعمتي الله يرحمها ماتت وعافتني ونسوان اخوتي وانتي تعرفيهن اكثر مني لا يحبني ولا يودني )
وبچيت حيل
( چا انا وين انطي وجهي )
عافت اللوله من ايدها ونبتت الابره بيها وهي تگلي
احچي يمه احچي فتيتي چبدي بعون الله اگدر اساعدكم كولي شردتي تحچين )
باوعتلها وانا امسح دموعي وعيوني ملاهم الامل بالفرج
( جاسم طلب مني احچي وياچ تساعدينا يريد يگعد وياي وبعلم ابوي واخوتي ويكول هذا الشي بالشرع مو حرام انا هسه مرته )
ضحكت وكالتلي بالاول ( گليلي وين شفتيه )
( والله خاله طلعت اركض وره حمزه اخذ مشطي وشفت جاسم واكف ولازم حمزه وهو الحچي وياي انا ما حچيت )
حسيتها ارتاحت ومعالم وجها بان عليها الرضا وحچت
( شوفي بمه هويله راح احچي حچي واريدنچ تسمعينه وتفهمينه وكون خوش مره تمشين بحچيي )
ركزت وياها وبان تركيزي بكعدتي العدلتها وعيوني الفتحتهن
وهي كملت حچيها
( يمه هويله المره من عدنا لازمن تطيع رجلها مثل ما امرنا ربنا وتسمع كلامه بما برضي الله بس بنفس الوكت لا تذب روحها عليه ذب حتى تظل عزيزه وغاليه بعينه )
سكتت شويه وهي تباوعلي تريد تعرف اذا اني مركزه وياها وفهمت حچيها
(لا تمنعين رجلچ منچ حرام جهنم بس هم لا تذبين روحچ عليه)
تباوعلي وهي تسألني
( فهمتيني يمه  بنبتي بني ادم بلايه كرامه يخسر كلشي ويصير ما يسوى شي لازم تصيرين گويه وگادره تصيرين ام بيت وقليده ببيتج مو بس مره للفراش دايما اسمعي رجلج وانطيه رايچ بكلشي )
چانت تحجي شويه وتسكت شويه چنها تنطيني مجال افكر بالكلام الگالته وترجع تكمل وانتي جنت مستمعه وافكر بكل كلمه تكولها واحاول افهمها وصراحه عجبني حچيها وبيني وبين نفسي قررت اسوي كل الي گلته من اتزوج
باوعتلي وهي تبتسم وكملت كلامها
(يمه خلي رجلچ يذب همه يمچ وهو يحس عنده مره فاهمه مره تشيل همه وتكونربير اسراره مره مو كلمه تجيبها وكلمه توديها من هسه خلي يشوفج گويه  خلي علامج التعلمتي مو قرايه وكتابه لا يمه العلام حكمه وكلام موزون واهم شي تعرفين شلون تعززين نفسچ عد رجلچ واهله وتحفظين  كرامتج وكرامته رجلچ واول شي تسوينه تعرفين شوكت تحجين وشوكت تسكتين ) 
سكتت وچنها تنتظر مني رد
( يعني انتي هسه هذا رايچ اخلي ينتظر ويحچي الي يريد يحچي وره العرس من اصير ببيته )
( اروحن فدوه لعگلچ يمه خليه يتحلطم وينتظرج وما راح يفوتكم شي انتي بعد شهر وچم يوم وتصيرين ببيته ساعته خلي يگول الي يگوله )
( صار يمه حچيج حلو وكله حفظته )
ضحكت وعيونها دمعن وگالتلي
( اول مره تگليلي يمه من ارحن فدوه لحسج)
شبكتها وبستها براسها وظليت طول الليل افكر بحچيها

              ..............................
البارت ١٣٥٨ كلمة
السلام عليكم حبايبي مشتاقتلكم
اعتذر على تأخير الحياة ومشاغلها واعتقد اني دا اسوي خطأ انو اكتب بمسوده وبعدين انقل المسوده للوات باد فهذا ديسوي الكتابه في اثنين راح احاول اكتب مباشرةً بالوات باد واخزنه يختصر الوقت وشغله ثانيه اني لحد الان ممتعوده على مواعيد ثابته للكتابه اتمنى تعدروني وتساعدوني بتعليقاتكم  ولا تنسون التصويت
اتمنالكم قراءة ممتعه
ها البارت هذا مكفه لختام سنة 1959 باجر انزل بارت صغير نختم بيه هاي السنه ونزوج جاسم وهيله ونعزمكم  هههههههه  احبكم ❤️❤️❤️