برنو الكحلاء

البارت العاشر

برنو الكحلاء

بقلمي : نغم الموسوي

🌹🌹🌹🌹🌹🌹🌹🌹
مشه واطبول شماتي يدفان
وعلي جمرات دلالي يدفان
شخله البين
اخذ كل زين
كسر ظهري
ومرد ضلعين
بقيت وحيد
ماكو عضيد
اجر حسرات
اصب دمعات
اكولن ما يرد هيهات
شجاك وتدفن الغالي يدفان
دفنته وسالت دموعك بديه

*****************

كاعده ببيتي واخيط بچرچف لللوله (وساده اسطوانيه الشكل محشوه بالريش ) وبرنو تلعب يمي ...
تذكرته من چنت اسوي چرچف جديد چان هو اول واحد ينام عليه
ذكرى تجر ذكرى وهيله صارت ايامها بس ذكريات .....
اي ايامي وكفت من يوم ما راح چنه الزمن معاند وياي ماناوي يمشي
وطالت صفنتي ومن وعيت على روحي شفت برنو طالعه تزحف
وشفت نوريه كاعده بره وظهرها عليه ويسولفن هي وسنيه الكاعده هي وبتها يرشن بالثنيه( الساحة الخارجيه) يردن يفرشنها
طلعت اركض وصحت على برنو وسمعتهن

( اي خيه چا شعدالج حتى الحزن بعد موش الاولي والنسوان بعد ما بيهن حيا وصوتهن مسموع سابع جار يسمعهن بحجة بتي )

تحجي نوريه وهي تهز بروحها بعصبيه ومتعمده تسمعني هذا الكلام وسنيه خطيه تعضلها شفه عبالها ما شافتني
اني ما حچيت شي شلت بتي وردت اطبن للبيت بس صوتها اجاني

(وين طابه ام محمد تعاي جاي ... عدنا حجي وياج )
تحجي وياي وهي ما تعاين علي
( خير خيه خو ماكو شي ....)
( خيه انا اجيبلچياها من الاخير ...)

تحجي وهي تتهز جسمها وحركات وترجف واني بقيت واكفه منتظرها اسمع حچيها الي متوقعته من زمان
( اي خيه انتي حرمه ارمله والبيت بيه زلم .... شني خاله نطردهم من البيت .... خاف عدالچ مات رجلچ وبعد محد يگدرلچ....)
خليتها تكمل وبهاي اللحظه عرفت نوريه علنت حرب جديده وياي بس لازم اوكفها عدحدها
( شوفي نوريه ما راح اردن على كل حچيچ هذا لان حچيج ما مقبول بس اگلچ شي ....لا عدالچ جاسم راح وما ظلي سند. لا والله جاسم الله يرحمه عافلي وليدات ينشد بيهم الظهر ...)
وعفتهن ومشيت وكملت حجيي وانا امشي
( لا تفكرين تندگين بيه هيله هسه غير عن هيله القديمه الساكته وتسمع وتسكت ... وجاسم يبقى اسمه عالي ومحد يدوس على طرف مرته ...)
وهي كامت مثل المخبله وصوتها وصل لسابع جار
( تعيريني هويله چي ما عندي ولد؟... والله الا اندمتچ على هالحچي هاذ .)
عفتها ومشيت بس حسيت قلبي يبچي دم وروحي معصوره
ساعتها حسيت هسه لازم يبدي دوري وما اخلي احد يستقوي على هيله و ولدها

*************************

كفينا غدنا وسوينا چاي وانا طبيت لبيتي وره شويه سمعت صوت حماي حسن يصيح على محمد ابني وكلت ما ادخل نفسي عمه وصاح عليه بس ظليت اسمع بلحجي
وسمعته يگله
( تگل لامك اذا ما تحترم نفسها ما الها كعده بهذا البيت )
( عمي تره البيت مو بيتك بس انت هذا بيت ابوي وما مسموحلك تحجي على امي
منو انت حتى تسمحلها يو لا)
( انا زلمة هذا البيت الرضيتو المارضيتو واليفتح حلكه اركع راسه بميت حايط )
بعد ما تحملت كمت لبست شيلتي عدل ولفيت روحي وطلعت وي طلعتي وشفت كريم جاي يركض وهاد على عمه
واني شاطت روحي ....
وانا ركضت عليه وشبگته
( لا يمه فدوه اغديلك لا تفضحنا ..... هذا عمك وتتفاهم وياه وهو صدك رجال البيت من بعد جدك وابوك ..چا هوما گال شي غلط ولا عيب )
كريم صبي عصبي وتاخذه الحماوه ويجاوبني بصياح
( والله يمه ما دامني اشم الهوى ما اخلي عايش الي يجيب طاريج ....)
كوه هديته وحجيت ويه حماي حسن
( خويه حسن اني موش غريبه عنكم اني بت عمك گبل لا اصير مرت اخوك والصار بيني وبين نوريه احنا خوات وهي الي بدت )
( شبدت ما تگللي شبدت هيج خويه وصلت بيچ تعيريها چا ما عدنا ولد )
(لا خويه وداعتك وداعت جاسم وداعت وليداتي ماعيرتها بس هي تگلي انا مامحترمه رجلي ومن راح عمت عيني عليه اخذت راحتي ومحترمه البيت واهله ....)
احجي وانا ارچف خفت على وليداتي واباوع بعيون حسن واحجي
( وعلي خويه وانت ما محلفني انا كلتلها ما ارد على حچيج بس اني بعون الله ابقي اسم جاسم عالي وابقى شاده ظهري بوليداتي )