برنو الكحلاء

البارت الثاني عشر

برنو الكحلاء

بقلمي : نغم الموسوي

🌹🌹🌹🌹🌹🌹🌹🌹🌹

شفتك بالحلم فزيت ادور عليك
نسيت انة صحيت وبالحلم عفتك
اعاين بالوجوه وانت ما موجود
ما معقولة يمي وإني ما شفتك
شلتك بالكلب يوم الجنت موجود
ودمعة بالجفن يوم الرحت شلتك
ما ردتك دمع وتساير الخدين
انة عون وذخر بالدنيا الي ردتك
وحشة البيت بعدك ارجع أترجاك
وحشني بيك كولشي حتى سالفتك
ولو ادري جيتك جيت مودعين
جنت ع الأقل هميت جنت ودعتك
ما ادري غفل عن عيني راح تروح
ويخلص بالعجل ما جنت اضن وكتك

طر الفجر وكعدو الولد وصلو وسويتلهم ريوك واجتي ساعة الوداع وعود انا وصيت برنو بس انا بچيت قبلها وطلعته من البيت سودت الدنيا بعيوني والزاد همي برنو الموتت روحها من البچي
و وره ساعه الولد راح وصلو اخوهم للكراج وانا وبرنو وعمتي دخلنا وعمتي تدعيله وذبت وراه طاسة مي
التفتت وشفت نوال بت حسن واكفه بباب بيتهم وتبچي .......
من شفتها هيج تبچي گلبي نعصر عليها وخفت لا يطلع هم يحبها وظليت عيني عليها ودموعي تصب وهي هم خمت حيلي عليها عيوني عليه والدموع تتجارى وعيونها چنها تشكيلي هم يابو هم من العشگ ...
العشگ الي هي تعرف وانا اعرف امها ما ترضى بيه ولو تدري بيها مستعده تموتها خلاص .......

بقيت عيني عليها وامشي بهداي وره عمتي الي لازمتها برنو ويردن يطبن جوه وما احس غير اختها سهام طلعت وكامت تجر بيها من چتافها
سهام : خايبة امشي لا تفضحين روحج وتفضحينا ... وعلي لو امي تعرف بيج چا هسه تجنزت تجنز امشي ياله طبي جوه

عمت عيني عليها ولا فكت حلكها بكلمه بس زاد بجيها وعيونها عليه وچنها تشكيلي

اخ يا زمن چان انا عوزي هم فوگ همي....شني ذنب هالبت وعليش انا ما شفت هذا الشي من زمان شلون بيه هسه شيردلي محمد واتأكد منه يحبها يا لا

استغفرت ربي وطبيت وره برنو وعمتي الي ردت لغرفتها ونامت وبرنو بحضنها

عفتهن ورديت لبيتي وانا امشي على كيف اريد اسمع خاف صار شي ويه نوال
اخاف امها شافتها چا شيخلصنا بعد

انا ما اعول اخلص من ابوها اليركض ورايه وامها وتركض المراقبتني و واكفتلي على الزله ....انوب هي جايه تكسر ظهري
طبيت للبيت وبراسي الف حسبه وحسبة وظليت كاعده اتفكر بالراح يصير وشضاملي الوكت الاغبر

وظليت هيج حسبة تجيبني وحسبة توديني اخذتلي ساعه وكمت بعدين كلت خليني اعجن بين ما يجون الويلاد

عجنت وخلصت وبلشت البنات يكعدهن
الله يحميهن يروشن بالبيت روش خمس بنيات يخبلن ونادرات
وما احسن غير صوت الولد رجعو بس يطبون رأسا للبيت يستحون من بنات عمامهم
طلعتلهم اركض وچان بيه خيط امل اشوفن محمد وياهم بس عمت عيني عليه ما لكيته سواها صدك وراح
برنو: هله يمه هله بيكم.... وصلتو اخوكم ؟ راح بالسلامه
كريم : راح الله وياه خليه يشوف بغداد يشوف الدنيا
اجاني علي يركض صار شطوله بس ما يبطل عادته من يطب للبيت يجيني مثل الفرخ الجاهل يحضني ويشمني وهو يحجي
علي : بس چان ضايج على برنو وحتى دموعه طاحت
احسن گلبي نمرد مرد عليه بس شسوي انا قبلت لان ادري هناك احسنله وان شاء الله ما يفشلني
ضربته على جنفه على كيف
برنو: لا تحچي هيچ يم برنو هي عمت عيني شبعت بچي
رزاق : اي صگد وينها برنو ما اشوفنها
برنو : عوفها يمه شبعت بچي ونامت يم حبوبتك شويه وتكعد
صاح بيهم كريم فدوه اغديله هو ابو البيت يهتم بالزغير والچبير وبالشغل
كريم : يله اخوتي همو روحكم طمنا امي خلونا نروح للشغل تأخرنا هسه عمامي ولد عمي حسين وحدهم
جاوبه عباس وهو يضحك كالعاده هذا فطيرهم وضحكتهم بعد روحي روحه ضحكته ما تفارگه
عباس: خليهم يحسون بينا هسه تلكه عمي حسن ذاب حرگة گلبه بالولد ومشوفهم نجوم الظهر ...... اتمنى هسه اشوفنهم ومنظرهم من يصيح بيهم
كريم : امشي ولك انت ما تبطل من هاي سوالفك
عباس يجاوبه وهو يركض يوخر من يمه خافن يضربه
عباس : خلينا نضحك شويه ..... اما قابل اكرهم بس هيج اتقشمر وياهم