برنو الكحلاء

البارت السادس

برنو الكحلاء

بقلمي نغم الموسوي

🌹🌹🌹🌹🌹🌹🌹

====================

انتي مــو أم لا بشر انتي ملاك
انتي من الله الج هيبه وقدر
أنتي الله مفضل عليج بنعيم
يعني قدرج عالي وأعلى من الكمر
تحت اقدامج الجنه يكـــــــول
جنه وشلون أرد أوصفها بسطر
يانهر يابير زمـــــــــزم والحياة
أنتي أعجب من عصا ألشطرت بحر
ألله حط كل الصفات بقالبج

====================

الكحلاء ١٩٧٠

بذيچ اللحظات الحلوه ونسمع صياح وهوسه صوت زلم وعمتي ام جاسم وياهم وكمنا مرعوبين انا وجاسم ووي كومتي حسيت بطني تقلصت لان كمت بهمه وصحت بصوت خافت
( اخ يمه .....)
جاسم تخردل يبلس بدشداشته واجاني بسرعه
(هيلة مابيه حيل مصيبه اكعدي ولا تطلعين خليني اطلع اشوف شهالصياح ورادلج لا تتحركين رحمه لامچ) جاوبته وانا ارد لكعدتي على الدوشگ
( لا تخاف شويه شد ببطني عادي شني قابل هاي اول بطن الي )
طلع يركض وما رد عليه بس اني بالي يمهم وما تحملت كمت بيه ما بيه واحس بطني ملها مشنجه وطلعت اشوف شني هالهوسه هاي ولاكاني كريم وهو يطب جوه يركض واجاني ينشدني وصاير اعصاب
( يمه صدك مرت عمي ضاربتچ ؟.....وحگ علي ابن الي طالب ما يطلع حگچ غير ابنچ كريم ....)
جاوبته وانا كاضه چتافه وذابه كل حيلي عليه
( يمه اروحن فدوه لحسك وطولك اني اليوم الفرحة ما سايعتني ابني يذافع عليه.... هيج كبرتو وكمتو تدافعون عليه )

بداخلي چنت اخجل اگول لولدي اني حامل صحيح اني مو چبيره بس ولدي صارو بطولي
عيوني دمعت خوفعلى ولدي وفرح بوليدي وهو معصب ويدافع عن امه بس بنفس الوكت لازم اكون ام قويه وانهي هاي المشكله لخاطر ولدي بعدهم ميعرفون يلزمون اعصابهم
شبگت كريم واني اكوله
( يمه لخاطر امك واخيتك الي بطني مو هيچ السالفه انا امك شتعرفني اسكت عن حگي )
صفن بوجهي وتلاكت عيونا بس الفرق عيونه مليانه فرحه وعدم تصديق وعيوني مليانه خجل وخوف
( يمه انتي صدگ تحچين انتي حامل )
جاوبته وايدي على ظهره والايد الثانيه تمسح بوجه حتى يهدى شويه
( اي يمه ولا تعبني.... لخاطري يمه ما اردن مصايب )
ستت وانا اباوع بره والصياح بعده وكتله
( يمه كريم خلينا نطلع نحلها وفدوه اغديلك لا تحچي لخاطري )
طلعنا وشفنا عمي ابو جاسم وعمي حيان ابو نوريه وجاسم وعمتي ام جاسم واكفين ويتصايحون ونوريه واكفه على جهه ولافه روحها بالعبايه وتبچي
ضحكت بداخلي شلون مكرت وتبچي وچنا احنا طگيناها
وكفت يمهم وسلمت على عمي حيان بصوت عالي حتى يسمعوني
( حياك الله عمي هلا بيك ... عليش هيج معصب )
كلهم التفتو عليه وعمي جاوبني

( انتي لا تحچين توسين المصيبه وتضمين راسچ )
بقيت صافنه عليه وهو سكت وبعدين كمل كلامه بتردد وصوته بيه رجفه
(سفحلتي يهويله شفي روحچ جبتي وليدات وبعد ما تنگدرين ) لزمته من ايده وكتله
( اهدى عمي واسمعني انتي عليش صاير نار وشرار )
حسيته انتبهلي وهو يسمعني
( عمي احنا خيتات ونهاوش ... هي مصارين البطن تتعارك هذا موش كدرك )
شفت معالم وجهه تغيرت وبده يهدى
( دكعد اكعد )
ودرت عيني على جاسم وچني اكلله هدي الوضع وهو فهمني وكالهم
( دكعدو بويه عمي صدك چذب نتعارك على النسوان والوادم تضحك علينا )
ونبيت انا من يمي
( اي والله الوادم تريد بس سالفه تحچي بيها وتصيرون سالفه والسلف تله يحجي بيها )
عمي حيان هدأ واندار على نوريه الكامت بس تخزر بعيونها
وكعدو وانطيتهم ماي وبعدين الفتت على نوريه
( يلاخيه شني احنا محلها بيناتنا شلون تدخلين عمي حيان هم الزلم عودهم مصايب .... يالا خيه خلينا نروح نسويلهم نومي )
وجريتها ورحنا وهي ماتقبل الزمها
( ميلي عني لا تلزميني )
كالتها وهي تدفعني
وما سمعنا غير صوت عمي حيان يصيح بيها
(نوريه بويه لا تخاذين على خاطرچ روحي ويه اخيتچ)
قبلت تجي وياي بس كوه عليها
ومن دخلنا كلتلها بنبرة تهديد
( شوفي خيه نوريه شفتي الصار مساعه انا اعرف شلون اهديهم وشلون اشعل الموضوع)
تفاجأة بيه وبكلامي وخزرتني
( شني تهدديني يا هويله )
طبطبت على چتافها وكلتلها
( لا خيه لا اهددچ ولا شي بس انا اريد اكللچ انا كادره اسولفلهم كل الصار ووتعرفين عمي ابو جاسم گلبه محمل منچ ومن عمايلچ... وتكب العيطه وما خسران غيرچ انتي وهالبنات المالهن ذنب )
رادت تحچي وقاطعتها
( خيه انا وياچ نعرف انتي شسويتي وعلتي علي... وكل هذا الساويتي والبچي عدالچ تفرين الشغله بس انا هسه اكللچ احنا خيات وبنات عم وانا ما شايله عليج وخلينا ننسى كل الصار )
باوعتلها بنظره استفسار وهي تباوعلي چني كاتله ابوها بس ماعدها خيار ثاني
( ها خيه شگلتي ؟... چا احسن اهلنا يتكاونون ؟ ترضيها انتي ؟)
جاوبتني بعيونها وهسه رگبتها بعصبيه وعافتني وراحت واني صحت وراها
( صلي على النبي خيه وگولي يالله )
وضحكت .....
🌹🌹🌹🌹🌹🌹