NAKAKALOKA ang muling pagsikat ng tambalan nina Richard Gomez at Dawn Zulueta sa Walang Hanggan. Inaabangan din sila sa naturang serye at kinakikiligan pa rin ng fans kesehodang may Coco Martin at Julia Montes na plus Paulo Avelino at Melissa Ricks.
“Pareho kaming nagugulat ni Goma na kinikilig pa rin sila sa amin,” ani Dawn. “Pero nakakatuwa na ganu’n pa rin ang epekto ng tandem namin sa mga manonood.”
Ayon kay Dawn, bagamat mahabang taon silang hindi nagkausap ni Richard at may kanya-kanya na silang pamilya, muling nanumbalik ang pagkakaibigan nila ni Richard dahil sa Walang Hanggan. Inaabangan ng tagasubaybay kung magbabalik ang pagmamahal nina Marco at Emily kapag nalaman nilang buhay ang kanilang anak.
Tulad ni Richard at ni Dawn, muli na ring nagkakalapit ang kanilang characters na sina Marco at Emily sa teleserye habang nalalapit na ang pagbubunyag ng tunay na katauhan ni Daniel (Coco).
Ano kaya ang magiging epekto ng rebelasyon sa pagkatao ni Daniel sa mga Montenegro at maging sa itatakbo ng serye? —Reggee Bonoan
