MASAYA pero malungkot si Dawn Zulueta sa pagtatapos ng Walang Hanggan.
Masaya dahil nakagawa siya ng soap opera na hindi basta-basta makakalimutan ng lahat. Malungkot, dahil mami-miss niya ang “bonding” nila ng co-stars na sina Richard Gomez, Susan Roces, Helen Gamboa, Coco Martin, Julia Montes, at iba pa. Umaasa si Dawn na makakatrabaho pa rin niya ang mga ito sa mga next projects niya lalung-lalo na ang favorite leading man niya.
Sila pa rin ba ni Richard ang magkakasama sa susunod niyang teleserye?
“Why not, di ba? For me it is not a problem. Basta okey ang schedule. Pero mukhang busy na ngayon si Richard dahil nga tatakbo siyang mayor sa Ormoc. Kaya siguro, eh, ‘di muna siya tatanggap ng kagaya ng Walang Hanggan na alam n’yo namang lahat halos ng panahon namin, eh, doon namin itinutok,” sagot ng isa sa mga paborito naming actress nang makausap namin through her manager Ms Vivian Recio.
Hangad din ni Dawn na maibalik sa big screen ang tambalan nila ni Richard, sana nga raw sa mga susunod na taon pagkatapos ng election. Hindi problema sa kanilang dalawa kung ano ang gagampanan nilang roles, at pati na rin kung sakaling may kissing scene ay hindi raw naman problema ‘yun.
“Depende naman ‘yun sa istorya. Kung talagang kailangan talaga, okey lang,” banggit pa ni Dawn.
Sa loob ng mahigit siyam na buwan sa ere ng Walang Hanggan, pakiramdam ni Dawn ay higit na dumami ang fans ng loveteam nila ni Richard Gomez. Ang pinakaaktibo raw ngayon ay ang grupo ng mayayaman na “CharDawn Penguins” na nagpakita ng sobrang suporta sa kanila sa thanksgiving concert sa Araneta Coliseum.
“Nakakatuwa talaga sila, gumagawa sila ng paraan para makipagsabayan sa ibang grupo ng fan clubs. I got a chance nga to talk sa kanila at nagpapasalamat ako sa kanila nang husto.
“Hindi talaga namin ‘yun inaasahan na tatangkilikin nila ang tandem namin ni Richard pero since nandito na rin lang, we’re really enjoying it. We’re so grateful to all the fans for their support.”
Samantala, nominado si Dawn para sa teleseryeng Walang Hanggan Best Drama Actress sa PMPC Star Awards for TV.
