#نزوة_دائمة
روااااايات ايوتة 😍😍😍
الحلقة الرابعة
القصة أن بوي قبل ميموت كان يشوف ف ظلم مرته ليا وكيف تعاملني صح كان ساخف عليا بس مكانش يتكلم ويدخل وقت زهرة تضربني او تعذبني، المهم بحكم انه كان يخدم ف النفط وعنده استثمارات كتبلي ثلت ارباع املاكه ب اسمي والربع محطه بأسم حد بس مسموحلهم يسحبو من حساب الشركة اللي زهرة خلت خوها يكون مديرها ويلعبو فيها زي ميبو
لذلك كانت زهرة تاخد مني ف الفلوس باش تخليني نفلس ويبدا معاش عندي شي صح كنت ضعيفة ف البداية بس بعد بدي معاي وسيم خلاص معاش نفكر ف شي ونوقف ف وجها ونقول لااا
روحت من عندها وحطني عند وصال صاحبتي اللي ليا شهور مشفتهاش
وصال.. وينك والله استاحشتك
نيرز.. حتا اني والله تعرفي منفضاش بكل
وصال.. شن الزواج هوا اللي غيرك
نيرز.. لا والله بس تعرفي ان وسيم يروح تاعب منقولاش بنطلع ولاشي
وصال.. اي ربي يعاونه
نيرز.. كان نحكيلك شن دارت مرت بوي
وصال.. ووه قاعدة تحارب فيك
نيرز.. قاعدة زي قبل والله متغير حاجة
وصال.. احكي احكي، بديت نحكيلها مش عارفة بس كنت تستريح معاها هلبا لدرجة كبيرة حتا قبل منتزوج كانت هي بيت اسراري
قعدت عندها المغرب وجت اختها ونفس الشي كانت دكتورة اطفال، بعدها جي وسيم روح بيا كنت سعييييدة ان شفتها وهدرزت معاها
وسيم.. اليوم حتا عيونك يضحكو
نيرز.. قداش منفرح وقت نشوف وصال ونهدرز معاها
وسيم.. اي واضح انها بنت كويسة
نيرز.. من زمان واحني صاحبات ياريت لو جينا خوات
وسيم.. يلا عادي انتو خوات من غير شي
وقفت ع المرايا نحيت عبايتي وقمت فنيلتي والمنظر اللي نكره نشوفه ديما هو اثار تعديب زهرة ف جسمي حاولت نتأقلم بس مقدرتش
وسيم.. ياسر والبسي
نيرز.. ياريت يختفو ونقدر نعيش بدون منتفكر شي💔
وسيم.. حيمشو مع الوقت😔
نيرز.. شوف كيف مر وقت طويل ومختفوش معقول حيقعدو العمر كله
وسيم.. ولو ممشوش يعني شن حتموتي يعني حاولي تنسي
نيرز.. الله لاتسامحها
وسيم.. خلاص البسي
نيرز.. يجي يوم وتكرهني
وسيم.. لا
نيرز.. كيف قادر تعيش مع وحدة جسمها خريطة اذا اني مخوفني ونتمني معاش نشوفه ابدا💔
وسيم.. خاطري نعرف الأسئلة هادم من وين يخطرو علي راسك
نيرز.. انت ليك اسم وشكلك ولبسك كل شي فيك يعتبر حلو اذا كان س....
وسيم.. خلاص معاش تكملي يابنت الناس اني عايش معاك انتي ومعمري فكرت ف شي تاني علاش تخلي فيه يجي علي بالي حتا 1%
نيرز.. يارب كلامك صح
وسيم.. هلبا ناس تزوجو وهما ميعرفوش بعض وحبو بعض بعد فترة عادي
نيرز.. سنتين وقريب نخشو ثلاثة
وسيم.. عادي حتا بعض عشرين سنة حتقعدي ديما الصغيرة اللي نخاف عليك حتا من روحي
تمنيت ف اللحظة هادي نسمع كلام يطمني اكتر من هكي يخليني نوثق ونتأكد انه حيكون ديما معاي
وسيم.. قداش تحبي تفكري خلاص هيا البسي وتعالي ارقدي
نيرز.. به، خشيت دوشت ولبست وطلعت خشيت الفراش، وسيم مكانش كأي راجل شافاته عيني مكانش يغصب فيا علي شي اعصابه متحكم فيهم يساير فيا قد ميقدر بس مع هذا قعدت خايفة
رقدنا الزوز وفاتت الليلة علي خير،،
صبح يوم جديد زي العادة نضت قبل وسيم ودرتله فطوره ناض وفطر ولبس
وسيم.. مديري شي وهني روحك
نيرز.. معندي مندير الغدي بس
وسيم.. لاغدي لاعشي ريحي روحك وقعمزي
نيرز.. نحاول
وسيم.. تعالي انزلي معاي
لبست وشاحي ونزلت معاه والمفاجأة الكبري اللي مكانش حد متوقعها ان خديجة كانت مدايرة الفطور صدمة وف نفس الوقت فرحة انها تهتم شويا
وائل.. اهلا اهلا
وسيم.. بصوت واطي... شن صاير ف الدنيا
وائل.. علمي علمك نضت بنطلع لقيتها موتية كل شي
وسيم.. ان شاء الله خير
سالم.. شن توشوشو ع الصبح
وائل.. شي يابوي كنت نقوله ع البنت اللي حكيتلكم عليها نبيها
وسيم.. اها اي صح، امتا بتخطب
وائل.. حددنا موعد غدوا باش يمشو النساوين ويتفاهمو وساهل
وسيم.. باهي علي خير
وائل.. تصدقي يانيرز الفطور من يديك طعمه غير والله
نيرز.. من غدوا نديره اني عادي
وسيم.. يبصر وائل قعمزي ارتاحي
اما خديجة كانت تشوف وساكتة استغربت لسكوتها وهدوءها بس محكيت شي
سالم.. كلم عماتك حتا هما يمشو
وائل.. انت كلمهم كلمة غلط يشوفو
سالم.. مش حيقولو شي غلط شن صغار هما
وائل.. والله عارفهم حيحشموني وتتفركش الزواجة هادي
سالم.. كلموني امس غدوا جمعة بيجو يتغدو اهني وبالمرة افتح معاهم الموضوع
وسيم.. شن اللصقة هادي شن يتغدو من بيطيب ان شاء الله ولانجيبوه واتي ع خاطرهم
نيرز.. مش مشكلة مدام اني قاعدة نطيب انوض بكري
وسيم.. اسس منبي نسمع منك شي
سالم.. هوا يوم ساعة زمان ويمشو ف حالهم شن يعني نقولهم لا متجوش
وسيم.. يجو عادي حوش خوهم ومنحرمهمش منه بس قلتلهم تعالو عشية شاهي قهوة ويروحو
سالم.. مخلتنيش ندوي قالتلي وبس
وسيم.. ربي يهديك يابوي
نيرز.. مش وقت ع الخدمة
وسيم.. اي نسيت كان تبي حاجة كلميني
طلع وسيم الخدمة وسالم يتفرج ع التلفزيون ونفس الشي وائل طلع واني قمت الفطور وغسلت الماعين
نيرز.. عمي شن جاي ف خاطرك نديرو غدي
سالم.. اهو خديجة قاعدة هي اللي بديره
نيرز.. عادي اني نديره
سالم.. لالا ارتاحي انتي اليوم
ناضت بدون ولاكلمة وخشت المطبخ
سالم.. تعالي قعمزي جنبي
نيرز.. خلي نجيب تلفوني ونجيك
ركبت ع السريع جبت فوني وقعمزت
سالم.. اقريلي الأخبار زي مكنتي اديري قبل
نيرز.. حاضر من عيوني
بديت نتصفح ونقراله ف الاخبار...
اما وسيم وصل الخدمة خش يكمل ف شوية أوراق عنده لفتت نظره مني
وسيم.. مني صح حبيتها بس كانت محبة مؤقته وزائلة شفت انه هي اللي يجي تكلمه وتبني معاه علاقة يعني مش حاسبة حساب لحد، فيها جاذبية غريبة يخلي اي حد يتعلق بيها، جي ف راسي كلامها لما قالت ان مرتي لاتمكيج لاتلبس مش عارف علاش فكرت هك صح نيرز بسيطة ومتعرف شي بس مع هذا كانت احلي من مني بهلبا كانت بنتي اكتر من ان تكون مرتي بس علاش عقلي كله عند مني مش عند مرتي
لاحظت مني نظرات وسيم جت بدلع وصكرت الباب وراها......
يتبع...
تفاااعلو ❤️❤️😍
أنت تقرأ
نزوة دائمة 🔥 ( روايات ليبية )
Romanceالنزوة هي خطأً و لكن عندما يتكرر الخطأ اكتر من مرة يصبح عادة 💔🔥👌🏻
