نزوة دائمة 🔥 ( روايات ليبية )

حلقة 14🔥 النهاية 🔥

#نزوة_دائمة

روااااايات ايوتة 😍😍😍

الحلقة الرابعة عشر والأخيرة❤️
زي محكينا ان وسيم ومني كانو مقررين انهم يجو ياخدو الولد ويهربو او يسافرو برا وهما ف الطريق خشت فيهم سيارة كبيرة💔 معمري تشمتت ف حد لكن ربي يعرف كيف يجازي وامتا يجازي الناس
بدت عليهم الزحمة والناس التمو الزوز كانو اصاباتهم مش خطيرة بس قوية
رفعوهم المستشفى وخشو اسعاف الزوز، اسعفوهم مكانتش اصاباتهم عميقة هلبا قعدو يوم ف العناية وطلعو
وسيم كان عنده كسر ف ايده وخدوش ف وجهه، مني نفس الشي رجلها انكسرت وتشوه ف الوجه بس مش تشوه اللي يشين المرا لكن وجها تغير
امها.. هذا اللي درتوه ف البنت المسكينة
مني.. امي كان بتحكي عليها اطلعي وروحي متزيديش تحرقيني
امها.. هذا عذاب الدنيا شوفي وجهك كيف بدي مزال بس عذاب الاخرة وقت توقف مظلومة قدام رب العالمين
مني.. روحي معاش نبي نشوفك رووووحي
طلعت امها وشبه راضية ان ربي خدي الحق اما وسيم نفس الكلام اللي قالاته ام مني قاله سالم بس بطريقة خلت وسيم يفكر هوا شن دار وعلاش دار هكي اصلا
فاتت ايام وسمعت بيه قداش ربي عادل بين الناس وخدالي نص حقي مزال مزال
اسبوع وانقرت فاتحتي علي حمزة معزمت حد بس مرت بوي ووسيم واهله يندرو مكانش فيه اي اعتراض ان نتزوج بعد طلقني وسيم
مني.. توا ولدك حيعيش مع راجل غريب
وسيم.. خلاص صدعتيلي راسي
مني.. اني معاك مش ضدك افهم
وسيم.. خلاص معاش قادر نتحمل ساد
مني.. مزال قدامك ان تاخده منها بالمحكمة زي مدخلاتك ادخلها
وسيم.. ميعطوهوليش لان خنتها وف نظر القانون اني منصلحش لتربيته
بدت حياتي الجديدة مع حمزة كان يحبني ويخاف عليا اكتر من روحه ويخاف علي ولدي اللي حاسبه كأن ولده بالضبط
حمزة.. تعرفي حاجة
نيرز.. شنو
حمزة.. مش عارف شن هوا اللي خلاني نحبك ونختارك انتي بالذات
نيرز.. مش معروف
حمزة.. لكن والله معمره بنت خدتني زيك، امي ديما تقولي نخطبلك راك كبرت ندادك بصغارهم بس مع هذا مكنتش مقتنع
نيرز.. شن كبرت عمرك 28بس
حمزة.. المهم بعد هذا كله وطول انتظاري رزقني بيك وب ولدك❤️
نيرز.. ربي يخليك لينا
وسيم ومني اللي استنفذو كل المحاولات ان يرجعو الولد ويأسو
مني طبعا خلاص بدت تمل من وسيم خصوصا ان طول اليوم يفكر كيف فرط ف ولده وفرط بالانسانة اللي تحملاته بكل عيوبه وصابرة عليه، ملت من الوضع هذا وخاناته💔اي خاناته زي مخان مرته قبل ع خاطرها خاناته هي ع قلة الاهتمام مع ان وسيم مكانش مهتم بيا بس معمري فكرت نخونه حتا مجرد تفكير
بدت تطلع للأستراحات ومع شباب كان فيه منهم ب مقابل وفيه اللي من دون مقابل بس تبي ترضي ذاتها وغرورها بس
وسيم مكانش يندري علي شي لين جاه اتصال من واحد من اللي حتطلع معاهم ومشي وهوا يكذب معاش عنده طاقة باش ينصدم من جديد بس للأسف وصل وشافها
مني.. وسيم شن ادير اهني😨😨
وسيم.. هادي ثقتي فيه يامني
مني.. انت فاهم غلط
وسيم.. شن بنفهم غلط الوضع قدامي انتي معاه وعايشة جو جميل واني اللي ننقهر عادي
مني.. انت السبب خليتني نخونك لانك معاش مهتم بس تفكر ف ولدك وطليقتك
وسيم.. هه مع ان نيرز معمري كنت مهتم بيها بس لين طلقتها وهي محافظة علي شرفها وصاينتني
مني.. اني ميهمنيش الكلام هذا
وسيم.. استري روحك يا بنت الناس غطى روحك
مني.. انت اللي خليتني ف الدوامة هادي خليتني نفكر ف غيرك
وسيم.. معاش تبرري لروحك، انتي حرة من اليوم معاش دخلي فيك ولاعاد نجي جهتك
مني.. شن قصدك
وسيم.. انتي طالق طالق طالق
مني.. وسيم لالالا شن درت نحبك اني
وسيم.. العبي وديري شن تبي انتي حرة ومش علي ذمتي وحدة رخيصة
طلع وسيم حيله مهدود يسوق ب ايد وحدة ويشوف لأيده المكسورة ب وجع، كيف قدرت نخون نيرز مع وحدة رخيصة زي مني واني عارف ان هذا ماضيها ورجعتله بس توا شن ينفع الندم شي
بعد فترة سمعت ان زهرة مرت بوي مرضت هلبااا وهذا ثاني حق يردهولي ربي حقي فيها اللي عذبتني وخلتني نكره الحياة مع ان عمري 18سنة بس، يلا اني حندير الواجب وهي ربي يسامحها لكن قلبي ميسامحش حد، وصلني حمزة عندها خشيت وطول عيونها دمعو، تصدقو ان مأثرش فيا ونشوفلها بعين بااردة
زهرة.. اني السبب ف هذا كله اني اللي مخليتكش تعيشي
نيرز.. ربي يسامحك انتي دمرتيني بس الحمد لله اعطاني حمزة اللي عوضني عن كل شي، مفروض انتي تكوني ف مكان امي تيتمت صغيرة لابو لاام لاخوت زي الناس
زهرة.. عارفة روحي ظلمتك
نيرز.. وربي مينساش يمهل ولا يهمل
زهرة.. حتا نموت نموت وانتي مسامحة
نيرز.. جيت اهني من باب الواجب بس ربي غفور رحيم يمكن يسامحك ومش حندعي عليك بس قلبي مش حيسامحك
زهرة.. منبي شي غير انك تكوني راضية ومتدعيش عليا بس
نيرز.. هه ارتاحي مش حندعي عليك ربي يغفرلك حتا ربع اللي درتيه فيا
ساويت وشاحي وركبت مع حمزة وقلبي مرتاح قمة الراحه وروحت حوشي
ايامي عسل مع حمزة وحبيته مش حبيته بديت نموت فيه نموت ف كل شي فيه، طيبته حنيته رجولته وقفته معاي اللي اقرب الناس ليا موقفوهاش
بعد سنتين بالضبط....
اني حامل توا ف الشهر التاسع وقريب موعد ولادتي طلعت اني وحمزة نتمشو ومعانا سند(ولدي) كنا نتمشو صدفة جت عيني ع شخص مقعمز ع الكرسي ف المنتزه كان وسيم تصدقو معرفتاش، واضح عليه الهم والحزن بشكل كبير حتا لبسه ولحيته اللي مش مرتبه معمره كان وسيم هكي هامل روحه
نيرز.. ماما حبيبي شوف من فيه غادي
سند.. هذا بابا
نيرز.. برا سلم عليه ولدي
سند.. تعالي معاي
نيرز.. لالا برا انت سلم ع بابا وهدرز عليه
حمزة.. متكسريش بخاطره ونوضي معاه
نضت معاه وهوا فرحااااان وبدي يعيط بابا بااابا، فرحة وسيم ب شوفت ولده لاتوصف خداه ف حضنه ودموعه ينزلو
سند.. اني معاك يابابا حتا لو ماما مش عايشة معاك اني حنجيك
وسيم.. لا ياولدي اقعد انت مع ماما وعمو حمزة
سند.. كويس عمو حمزة يحبني ويحب ماما هلبااا ياريت حتا انت تعيش معانا
وسيم.. توا تأكدت اني خسرتك يانيرز خسرت احلا شي صار ف حياتي
نيرز.. توا مينفعش الندم حاول تكون مع ولدك اقلها هوا اللي يدوملك
وسيم..ربي يخليه ليا
سند.. ماما عادي نمشي مع بابا اليوم
نيرز.. اكيد عادي، وانت ياوسيم ف اي وقت تقدر تجي تاخده منيش بنت حرام باش نمنع اب عن ولده
وسيم.. شكراََ
نيرز.. هيا ماما نروحو الحوش نجيبو حوايجك ونرفعك
سند.. حاضر هيا
نيرز.. نوتيله حوايجه ونجيبه حوشكم يقعد عندك
وسيم.. تمام
يمكن وسيم ندم ندم عمره بس بعد شنو
وسيم معاش تزوج ابدا لحد اليوم رافض فكرة الزواج، حتا سند بديت نخلي فيه عند وسيم مطمنة وساخفة عليه لانه قعد بروحه ومفيش من معاه
جبت بنوتي عمري كله فرحت بيها وعشت مع حمزة قصة حب كبيرة ❤️❤️
طبعا قبل هذا كله مني اعترفت ان كانت مدايرة ل وسيم سحر باش يقعد ف امرها وتحت طوعها بس لما خاني وتزوجها كان ف كامل وعيه، وربي جازاها ب ان جاها سرطان وتعاند ف الموت💔

النهاية...
هادي نهاية قصة نيرز اللي تاعبتها الدنيا وخلتني نواجه كل المصاعب متاعها بروحي واجهت الظلم الحقد الكره التعذيب كل هذا واجهته وعمري 18سنة بس
ربي عوضني ب حمزة اللي نشوف ل ربي ونشوفله، ف الدنيا هادي كل حد ياخد نصيبه وربي ياخد الحق اليوم قبل غدوا
مدامتش ل حد مني او وسيم وكل حد مشي ف حاله وشاف حياته
نهاية قصتي فيها مليون عبرة ومليون نصيحة كلكم عرفتوها....

راايكم من دون ملصقات نبي نقرا❤️❤️❤️🙈