#نزوة_دائمة
روااااايات ايوتة 😍😍😍
الحلقة الخامسة
لاحظت مني نظرات وسيم جت بدلع وسكرت الباب وراها
وسيم.. معرفتش كيف خشت واني مش قادر ننطق حرف اول م بدت تنحي ف وشاحها والكاب متاعها خشيت ف عالم ثاني معاش قدرت نوقفها او حتا نرفض الشي اللي اديرلي فيه....
كنت مقعمزة نقرا ف الأخبار ل سالم بس مش عارفة علاش قلبي ناخصني نفسي ضايق مع هذا قلت مرات تعب بس
وسيم.. فقت علي روحي وجت صورة نيرز قدام عيوني بس بعد مغلط غلط مستحيل حد يغفره ليا، اني مش هكي اني وسيم اللي درت حياتي كللها نصلي ونخاف ربي وتزوجت وصنت نيرز زي ماهي صاينتني ف حضوري وغيابي، لا مش معقول اني نخون ابدا، نضت مخلوع مصدوم ف نفسي ومن مني اللي سلمت روحها ليا
مني.. خيرك شن صار
وسيم.. استغفر الله العظيم شن درت اني
مني.. درت اللي مفروض اديره من زماان
وسيم.. نوضي اطلعي برا معاش نبي نشوف وجهك اهني
مني.. لالا غالط انت حتشوف وجهي هلبااا
طلعت وعلامات النصر علي وجها اخيرا قدرت توصل للي تبيه من دون اي تعب
اما اني قعدت مكسدة ع النت ونهدرز مع وصال وفات الوقت
وسيم.. السلام عليكم
سالم.. وعليكم السلام
وسيم.. بوي بنركب نرقد تاعب هلبا
سالم.. استنا تغدي وارقد
وسيم..لالا بعدين كان نضت ف العشية تو ناكل، قول ل نيرز بعد تكمل تركب
سالم.. فيك حاجة ياولدي
وسيم.. لالا، هيا سلام
ركب وسيم الحوش خش بدل وصلي وهوا يدعي ربي يغفرله الغلط اللي داره
نيرز.. مقالك شي ياعمي
سالم.. لالا تغدي وشوفيه
نيرز.. تو نرفعله غداه فوق ونتغدو فوق اني واياه مرات صايرة حاجة
سالم.. علي راحتك طمنيني عليه
ركبت واني قلبي مش مطمن من تصرفه لانه كان حتا تاعب بس ياكل ويرقد معمره صار هكي
نيرز.. وسيم وسيم نوض
وسيم.. خليني نرقد
نيرز.. شن فيه خيرك
وسيم.. تعب خدمة مش قادر نحكي
نيرز.. متبي شي باهي
وسيم.. لا
طلعت من عنده واني قلبي حاس انه فيه شي بس مش عارفة شن هوا
نسرعو الاحداث... مر يوم عادي ومحاولتش نضغط عليه يحكيلي...
الجمعة اليوم المنتظر، بيجو عمات وسيم الزوز كانو واعرات وميعجبهم شي ابدا طبعا مكانوش متزوجات، عماته ربيعة وامنة
صبح نضت خشيت المطبخ وبديت ف الغدي كان الشي الوحيد اللي ملهيني، بديت نطيب وناض وسيم يساعد فيا وكانت حالته متحسنة عن امس هلبا يهدرز ويضحك عادي
مع الساعة 1 وصلو، خديجة ع قد انها مش دايرة حساب ل حد بس لما يجو ربيعة وامنة ترعش منهم لانهم واعرات
ربيعة.. كنة العازة متاعك وين اماله
خديجة.. ف حوشها
امنة.. والله لو كاني عايشة معاكم اهني النوم معاش تحلم بيه
خديجة.. الحق معاونتني هلبا
امنة.. خيره عينك زرقاء يامرت خوي
خديجة.. شي غير ولد اختي يلعب عليا ناشني قعدت هكي
ربيعة.. باهي جاتك بسيطة
وائل.. السلام عليكم
ربيعة.. وعليكم السلام تعالي ياوليد خوي الباهي، سلم عليهم وقعمز
امنة.. شن مفيش موضوع هك مزال
وائل.. اي هذا علاش قلكم بوي تعالو اليوم بنمشو فيه بنت عاجبتني
ربيعة.. باهي ربي يتمملك
امنة.. متقوليش خوك وين مقابلش
وسيم.. سلام
ربيعة.. سلم وليدي شوفي هالزين
امنة.. اي والله
وسيم.. كيف حالك ياعمتي
امنة.. هذا وين عرفت عندك عمات لاتسأل لاتتصل لاشي
وسيم.. والله حتا الطلوع معاش نطلع ضغط خدمة
امنة.. ربي يعاونك قداش تاعب
نيرز.. كيف حالك يا عمتي
ربيعة.. باهي شفناك نحسابوك مش نازلة
نيرز.. لا علاش كيف كملت ونزلت
امنة.. اللطف اسمني شويا وانتي تقول لاتاكلي لاتشربي، شن مرتك ياوسيم
وسيم.. شن بدير بيه السمن ياعمتي
ربيعة.. الضعف يشين ياوليدي اسألني اني
نيرز.. عادي يعني كل حد ووين راحته
امنة.. اي صح
قداش يحبو يدخلو ف الناس بس يلا ساعة زمان ويمشو
حطيت الغدي مخليت شي مدرته لكن زي ميقولو ميعبي عينهم غير التراب
وائل.. عاد ف الحوش مفيش من يطيب زي نيرز عندها نفس خاص
ربيعة.. عادي ماكلتها مش زي متقول
امنة.. مزالت صغيرة مفيش موهبة ف الموضوع
سالم.. الموهبة فيه غير انتو ميعجبكم شي خواتي ونعرفكم
ربيعة.. لا ياوخي مفيش منها الدوا هادي الحق ينقال
كملو ماكلة ولايخلو الامر من التلقيح والدوا الزايدة بس فات كل شي، لمينا السفرة وخشيت مع وسيم وكان يساعد فيا
امنة.. متقوليليش مخلياته خاتم ف صبعها كيف هالفرخة
خديجة.. لاخاتم لاشي هو نوعه يحب يساعد
ربيعة.. لكن هلبااا هكي وينه توا الراجل اللي يعاون ف مرته
خديجة.. هوا مريحها ومش مخليها تتعب
امنة.. سعد الناس
تلفوني يرن طلعت خديته وكانت وصال
نيرز.. اهلين شن جوك
وصال.. تمام وانتي
نيرز.. تمام كويسة
وصال.. اسمعي اليوم فيه ناس جايين يشوفوني بروحي خايفة تعالي
نيرز.. كان تعرفي حتا سلفي بيشوف بنت ضروري نمشي معاه
وصال.. ملقاش الا اليوم
نيرز.. بعدين نكلمك واحكيلي
وصال.. تمام نخليك توا ياعمري سلام
نيرز.. سلام
كملت وحطيت الشاهي والقهوة والحلويات وقعمزو يشربو ويهدرزو
العشية لبست ومشينا وتعرفو المفاجأة وين؟؟؟ ان وائل صدفة جاي ل حوش وصال عرفت ان هوا بيخطب وصال، فرحة لاتوصف، نزلنا ونفس المفاجأة لوصال واهلها وقعمزنا
فات الوقت وروحنا وكان وائل نفس الشي مرتاح وشافها وعجباته
ربيعة.. وائل تروح بينا
سالم.. الوقت تأخر اقعدو اليوم وغدوا روحو
وائل.. حتا الطريق مش كويسة
امنة.. باهي عادي
ركبت واني تاعبة دوشت وبدلت ومشيت ف نوم عميق....
بدت تمر الأيام وسيم يتغير معاي، معاش يهدرز هلبا نص يومه برا الحوش يروح يبي يرقد بس مشكيتش حتا ثانية ف الموضوع وكنت نصبر ف روحي ونقول يخدم وتاعب
وسيم.. تغيرت حياتي مليون درجة معاش نروح الحوش الا وقت نبي نرقد او نبدل ونطلع من جديد اسبوع تام واني حالي متغير بدي وقتي كله مع مني، عمري متوقعت ان يجي يوم ونخون ولانفكر فيه حتا تفكير، خيانتي المرة هادي كبيرة مفيش من يغفرها لان خلاص غرقت فيها....
يتبع....
تفاااعلو ❤️❤️❤️🙈
أنت تقرأ
نزوة دائمة 🔥 ( روايات ليبية )
Romanceالنزوة هي خطأً و لكن عندما يتكرر الخطأ اكتر من مرة يصبح عادة 💔🔥👌🏻
