قلتا ليها مالك ي روان ،،،،قالت لي ي ماما خالتو منال قالت عايزة ترسلني الدكان وقلتا ليها خلي اكمل الواجب دا سريع سريع وامشي ليك ،،،قامت كبت فيني الموية وكفتتني وقالت الا امشي ليها ،،،،شلتا منها الا الكوز ومليتو وكبيتو فيها واديتها كف ومسكتها معصمها تمام وقلتا البحصل يحصل ولو عايز يطلقني خلي يطلقني ،،،،سقتا روان جوا عشان اغير ليها ملابسه ورفعتا الكراسات والحاجات وخليت الحيوانه ديك لمن م قادرة تمشي الا ابتعرج عرجان بعدين وصلت غرفتا.
منال ولا كذبت طلعت التلفون واتصلت لي حامد قالت ليهو وين انت ،،،قال ليها في مشوار بقت تبكي ليهو في التلفون قالت ليهو بس تجي هسي دا لو م عايز تجي البيت وتلقاني مافي ،،،،قال ليها في شنووو ،،،قالت ليهو م بعرف المهم تجي هسي عشان تشوف بنفسك.
اصلآ كدا كدا عارفة انها بتكون اتصلت لي حامد لكن الليله لو عايز يعمل لي حاجة والله م بسكت ليهو اي شي ولا بناتي مش كفايه انو اتحملتا انو مد يدو علي ،،،،.
منال برضو اتصلت لي اخته ولي نسيبتي قالت ليهم تجوني هسي دا واصلآ البيت م بعيد يعني تكله ،،،،اي وحده ضبت توبا وجات هن اصلآ بعرفن لي الشمارات لكن شماراتهن ديل بوريهن ليهن الليله ،،،،صفاء جات خاشه قبل حماتي وبقت ترفع في صوتها وليه انتي وبناتك تدقن اختي عشان لقيتنها براها قلتن تنفردن بيها انتي وبناتك لكن انا بشيل لي اختي حقها منك هسي قبل م راجلها يجي وخلي العدالة تاخد مجراها ،،،،جات تمد يدها علي بس واتناولتها هي قصيره وزي سلك الاقاشي وبقيت ادق فيها وقلتا لي بتي امشي اقفلي علي خالتك منال الغرفة لانو لو طلعت هن الأتنين م بقدر عليهن ،،،،وبتي تعجبكن بسرعة البرق كانت متربسة الباب من برا ،،،،وانا هنا ياداب انعدلته في دي عديل ،،،،وصدتها كفوف في وشها الذي العيشة البايته دا وقلتا ليها خشمك دا من يوم الليله فتحتي معاي بكسر ليك سنونك العاجباتنك ديل وبمسكك ليهن في يدك نسوان م تجن غير بالعين الحمرا سكتا ليكن وسكتا ليكن قايلاتني مسكينة لا والله انا الدنيا علمتني الشر بس كنتا عايزة اشوف نهايتكن شنو وقلتا ممكن تنعدلن بس الطيب م نافع معاكن.
طبعآ سوسن جارتي بالحيطة سمعت العياط جات جارية وبقت تمسك فيني منها ،،،،شويه وهديت وبعدين طلعت الحيوانة دي من تحتي وشعرها واقف زي بوخ الحله 😂،،،اتفكت وجري فتحت الباب ودخلت مع اختها جوا وقفلنو عليهن،سوسن لا عرفت تضحك ولا تبكي قالت لي عملتي الصاح بس الله يستر من البعملو حامد ،،، قلتا ليها اصلآ عارفه بقول عايز يمد يدو علي لكن والله لو مداها الا اكسرها ليه ،،،ولو عايز يطلقني خلي يطلقني احسن زاتو من العيشة العايشنها دي ،،،سوسن قالت لي والله م عايزة اخرب عليكي بس البيني وبين ربنا بطلعو انتي وبناتك الاتحملتنو كتير.
حامد جا ماشي شايف امو بالمرايه وقف ليها وركبها ،،،قال ليها خير ي امي علي وين ،،،قالت ليهو ماشه بيتكم شكلو مني دي عملت عملة كبيرة مع منال واظنها مدت يدها عليها ،،،،منال اتصلت لي وم قادر تتحمل من البكاء ،،،،حامد سكت وساق بس العربية بسرعة (نسيبتي دي اظنها اكتر مرة كضابه في الدنيا وح تموت وهي عيونا مفتحة ربنا ينتقم منها ياااااخ)
حامد وصل البيت لقاني قاعده انا وسوسن وبناتي جنبي ونهائي م اتفاهم معاي ولا انا اتفاهمتا معاهو ،،،،مشي دق الباب فتحت ليهو منال وطوالي حضنتو وتشيل وتبكي الله يجازيها الما بتخجل ،،،م عملت حساب لي انو نسيبتها قاعدة ولا اختها قاعدة ،،،،دخلنو وبقن يملن ليهو في راسو تمام وطلع لمن عيونو حمرا ،،،وبقي ينادي في روان وجا كراها من جنبي قال لي أدب بتك وبعدين اقبل عليك وادبك انتي ،،،،بقيت اعاين ليهو ساي عايزة اشوف داير يعمل شنو ،،،،قطع صوت كهرباء وبقي يدق في روان بكل قوتو وبتي صغيره م ابتحمل الشي دا كلو ،،،طوالي جريت عليه ومسكت منو الصوت ،،،دفرني رماني ولسه بدق فيها ،،،،ولا كذبتا شلتا السكين طوالي وقلتا اليحصل يحصل لو اضطريت بطعنو اصلآ م شايفة قدامي ،،،مديت ليهو السكين وقلتا ليهو لو كان راجل نزل صوت واحد بس في بتي لو م رسلتك الأخر ،،،،امو لما شافت كدا قالت المره دي جنت احسن اجر منها ولدي ،،،،جات جرتو وقالت ليهو اعمل حساب لي نفسك ومدام مدت عليك السكين بتعمل الأكتر طلقها المره دي ي ولدي برضاي عليك وارميها هي وبناتها ،،،حامد قال ليها اصلآ انا م داي ها لا هي لا بناتا انتي طالق وهسي تطلعي لي من البيت دا انتي وبناتك ،،،،قلتا ليهو جدآ ،،،اشبع بيهو واشرتا لي نسيبتي قلتا ليها لو انتي م كنتي مره كبيرة كان م سلمتي من يدي ،،،،بس كلو م اركع ادعي ليك ربنا ياخد لي حقي منك واشوف حقي منك في الدنيا قبل الأخره.
مشت لميت ملابس وملابس بناتي وطلعتا تفلتا ليهو في وشو 😂،،،،بناتي كانن ببكن قشيت ليهن دموعهن وقلتا ليهن م عايزة اشوف دمعة من عيونكن سامعت ،،،،هزن رسينهن نظام كويس ،،،،سوسن طلعت معاي قالت لي ح تمشي وين ي مني ،،،،قلتا ليها بيت ابوي ،،،قالت لي انتي نسيتي مرت ابوكي احسن
منها منال ،،،،قلتا ليها بعرف اوضبها ولو اضطريت بعمل اي شي ،،،،قالت لي والله نفسي اساعدك بس انتي عارفة ولو احتجتي حاجة تعالي عارفة بيت اختك بوين وانا بزورك من فتره لي التانية ،،،قلتا ليها عارفاك م ابتقصري وودعتها.
وانا ماشه علي بيت ابوي كان في جزو مني بقول لي م كان اعمل كدا ،،،،بس عقلي قال لي عملتي الصح ،،،اصلآ كده كده حامد حقوقك م بديكي ليها ،،،بناتك م باكلهن ولا بشربهن ولا بكسيهن ،،،يلا م عافية ليهم ربنا يوريني فيهم يوم ،،،،وياترا ح تعملي شنو ي مرت ابوي وح تكون الحياة معاكي كيف ،،،كدا كدا الجحيم في طريقك ي مني ،،،،وصلتا البيت ودقيت الباب طلعت مرت ابوي من شافتن صرت وشها قالت لي الزكرك بينا شنو ودي شنو الشنط دي ولا اشتقلتا بيها خشيت طوالي ومشيت قعدته وشربتا وجبتا لي بناتي شربن وهي لسه واقفة بفوق لراسي ،،،،شالت التلفون واتصلت لي ابوي وقالت ليهو تعال شوف ليك طريقة مع قليلة الأدب بتك دي.....
يتبع
