مرت ابوي من اتصلت لي ابوي قالت ليهو تعال شوف بتك دي مالها قفل منها وعشرة دقايق وكان في البيت ،،، جا قبل م يسلم علي قال لي مالك يابت جايه وجايبا معاك بناتك وشنطكم متشاكلين ولا شنو انتي وراجلك ،،،،قلتا ليهو م متشاكلين طلقني عديل كان بتمسكني امسكني وكان بتطرد بتك بكوم لحمها دا وبتعمل ليك سمعه اعمل كدا ،،،،بقي يصفق في يدينو وطلع ،،، سامعاهو بقول لي عمتي امسكيها وخليها تقعد في البيت دا لحدي م اشوف ليها طريقة ،،،،عمتي مرت ابوي قالت ليهو انا لمن قلتا ارتحتا منها تاني تظهر لي ومعاها تلاتة بنات انا م لاقيه ااكل عيالي اكلها هي وبناتا ،،،وم تنسا مصارفنا ماشه زايده لما بتك دخلت الجامعة ،،،،قال ليها عليك الله ي مريم م تزيديها علي بتتحل ان شاء الله ،،،،يلا انا راجع الشغل عشان اخدتا ساعتين وراجع تاني ،،،مريم قالت ليهو سمح امشي وتعال اتصل لي راجل بتك واتفاهم معاهو احتمال يرضي يقبلها.
بليل
بعد ابوي جا شال التلفون واتصل لي حامد ،،،، حامد قال لي ابوي وعندك العين تتصل تاني بعد كل العملتو بتك ،،،،ابوي قال ليهو ي ولدي اي مشكلة بتتحل تعال قبل مرتك وبناتك ،،،،حامد قال ليهو انا م عايزها تاني وقفل ليهو الخط في وشو ،،،،ابوي نده علي عمتي مريم قال ليها تعالي ي مريم ،،،،قالت ليهو خير ي حسن في شنووو ،،،قال ليها بتي دي طول عمرها بتخت راسي في الأرض شكلها عملت ليها عمله كبيره عشان كدا راجلها م داير يشوف وشها تاني ،،،اتخيلي ي مريم قفل الخط في وشي انا الكبير القدر ابوه ،،،،مريم ربتت علي كتفو قالت ليهو كدا عرفنا انو بتك عملت غلط كبير ،،،امشي عليها انت ي حسن واتكلم معاها ،،،هسي انا لو فتحتا خشمي تقول انا م رايده ليها الخير ،،،قال ليها وانتي جبتيها خير البر عاجلو احسن اسالها هسي وبقي ينادي لي بطول حسو يامنى ،،،ي منى تعالي ،،،،مشيت عليهو لقيت عمتي مريم واقفه في راسو قلتا اصلآ دي م دايرة ليها كلام بتكون حرشتو عاينتا ليها وقعدتا قدام ابوي قلتا ليهو خير ي ابوي ،،،قال لي ي بتي لو عملتي حاجة وريني انا اتصلتا لي راجلك دا ورافض حتي يتفاهم معاي ،،،ولا كذبتا حكيت ليهو بكل شي ،،،عمتي بقت تعوي انا مش قلتا ليك ي حسن م بكون طلقها ساي وبتكون غلطت معاهو هسي لو كان صبرت وسكتت وصمت خشمها كان قاعدة في بيتها ،،،،ابوي قال ليها كدي ي مريم خليني معاها ،،،مشت وتشيل وتعوي اصلآ انا م ابتسمع لي كلمة في البيت دا لكن انتو حرين ،،،،ابوي قال لي انا م يقول ليك الا ترجعي وكدا ،،،لكن بقول ليك اقعدي وفكري مع نفسك كويس عايزة تعملي شنووو ،،،،قلتا ليهو ان شاء الله وقمتا من قدامو.
الصباح
صحيت لقيت عمتي عملت الشاي وشربت اولادها وابوي واي واحد مشي ليهو علي جيهة ،،،،لي الكفتريا بتاعت الشاي غسلتها ،، ولا كذبتا شديت لي موية في النار عشان اعمل لي شاي لي ولي بناتي ،،،،جات داخله قالت لي احسبي الكبابي عشان السكر دا بسيط ونحنا م عندنا سكر ،،،،قلتا ليها بطعم في الكبايات م دايرة اكبو في النار ،،، قالت لي ايواااا وطلعت.
