السلام عليكم 💙
كل عام وانتم بخير جميعا... رمضان مبارك🌙💛
الموضوع جه متأخر شويه بس قولت لازم تستفيدوا منه ☺️💜
♦️" فرصة موتك في رمضان متساوية لفرصة موتك طول السنة " 👀
" قراية صفحتين قرأن كل يوم أفضل من تلت ختمات في رمضان بس " 🧘
مبدأيا البوست ده قبل ما تقرأ فهو للناس الي نفسها ف حسنات تكفر بيها عن ذنوبها للناس الي دايما بيحسوا إنهم مقصرين و بيبدئوا بهمة اوي و بعد أول عشر أيام بيكملوا صلاة اليوم بالعافية .. فلو انت من الي بيختموا القرآن كل عشر أيام و بتصلي فروض و نوافل و تروايح و تهجهد و شفع و وتر طول الشهر و طول السنة فاربنا يقوي إيمانك و يثبتك و أدعيلنا نبقي زيك و نعمل كل العبادات دي بحب مش بجرد طاعة 💙
🔺مبدأيا 40% من أفعالنا اليومية هي عادات و معني عادة يعني حاجه بنعملها علي طول لدرجه انك بقيت بتعملها بلا وعي و من غير مجهود ..
🔻طيب ليه العقل بيحول السلوك لعادة ؟! 🤔
عشان يتجنب التفكير الكتير و يستغل طاقته دي ف حاجه تانية زي القراية أو السواقه مثلا أول مرة سوقت كنت بتفكر ف كل حركة قبل متعملها لكن بعد ما اتعلمتو بقيت أستاذ و بتخمس بالعربية و تكسر ع خلق الله و يشتموك بقيت بتتكلم ف التليفون و انت سايق و بتاكل و ممكن تغسل أسنانك كمان 😎
❇️ طيب بعد ما عرفت يعني ايه عادة محتاج تجاوب السؤال ده بمنتهي الصراحة " هل الصلاة و العبادات بالنسبالك عادة و لا سلوك (ساعات بيحصل و ساعات لا )❗"
لو عادة كمل معايا للاخر و لو سلوك فانت هتعرف ازاى تحول السلوك لعادة 🙋
♦️ أولا العادة بتتكون من تلت حاجات :
1) محفز cue : و ده الي بنسميه ف علم النفس "مثير" يعني اي حاجه بتجذبك انك تعمل الشئ ده أيا كان 🤷
2) سلوك routine : و ده رد الفعل ع المثير و بيبقي الاستجابه و ده السلوك الي عايز تحوله لعادة او العادة الي عايز تتخلص منها 🙅
3) المكافأه reward : و ده ممكن يكون ماديا او معنويا زي شعور حلو بتحسه لما بتعمل العادة دي و بيخليك ترجعلها تاني 💁
🔹مثال علي ده مثلا السجاير فيه ناس بتشرب سجاير لما بتحس بضغط ف الضغط هنا " محفز "و شرب السجاير سلوك او " استجابة" و إيمانك ان هي خففت من خنقتك شويه و شعورك ده هو" المكافأة " و قيس علي ده برضو الناس الي بتاكل كتير لما بتزعل او تتوتر و هتكلم عن ده بإستفاضه ف فيديو كامل بإذن الله💜
🔹 طيب لو قيسنا ده ع العبادات فالاذان هنا محفز و الصلاه سلوك و الراحة النفسية بعدها و عدم تأنيب الضمير بعدها مكافأة 🌻
♦️خدعوك فقالوا ان الواحد بيكتسب العادة في ٢١ يوم كل ده ههبببدددد و الموضوع كله جه من ان دكتور التجميل " ماكسويل مالتز " اكتشف ان المرضي مبياخدوش ع شكلهم الجديد غير بعد ٢١ يوم بس مش اكتر بس ال٢١ يوم دول حد أدني يعني ينفع بنسبة ضئيلة تتكون خلالها لكن مش تستمر ❗❗
🔶 عشان تحول السلوك لعادة هنركز ع تلت حاجات :
1) الزمان : زي الاذان او تحدد وقت معين كل يوم تعمل فيه الشئ ده و التحديد مهم جدا
2) المكان : زي المحراب في بيتك او المسجد او اوضه هادية و تحدده برضو
3) الجهد : و دي طاقتك الي لازم تكون مناسبة جدا مع العادة الي انت ناوي تمارسها و هنا نعمل زززوووومممم
♦️ مينفعش يا سيدي الفاضل تكون بتصلي قبل رمضان بالعافيه و يدخل رمضان تصلي الفروض كلها بسننها و تصلي تراويح و تهجهد و شفع و وتر و تقرأ تلت اجزاء كل يوم و لو اتبقي معاك وقت تحرر القدس 🙆
🔹لو مارست عبادات أعلي من طاقتك الروحانيه ممكن تتمزق او بمعني اصح تنتكس..النبي صلى الله عليه وسلم قال: "اكلفوا من الأعمال ما تطيقون، فإن الله لا يمل حتى تملوا. وإن أحب الأعمال إلى الله أدومها وإن قلّ".🌸
فا إنك تقرى كل يوم صفحة و تزود أحسن من انك تختم القرآن كل عشر أيام او حتي مرة في الشهر و ساعتها هتحس انك انت الي قلبك تقيل ع العبادة مش ان العبادة هي الي تقيلة عليك و ابليس هياخدك ف حضنه ..😅
🔸" لا تفكر في النجاح و لكن أصنع عادة ناجحة " طول مانت بتفكر انك تخلص القرآن تلت مرات و تصلي النوافل كلها هتفضل مستصعبها لكن لو مشيت خطوة خطوة هتلاقي نفسك بتقول ازاى أنا عملت كل ده !!
جميل اوي انك تجتهد طول رمضان و يتغفرلك ذنوبك كلها بس مش جميل أبدا يكون هو ده الشهر الوحيد الي بتتعبد فيه .. فجدد نيتك إنك اه يمكن تقلل عبادتك بس هتواظب عليها طول حياتك .. فكرة انك تبقي ناوي تلتزم اصلا لمدة معينه بس حقيقي مش حلوة خالص
" تبني العادات بالتوازي و ليس التوالي "
أنوي إنك تبدأ تقرأ ربع قرآن بعد كل صلاه و بعد تلت ايام زود لكن متبتديش سخن و تيجي بعد اول عشر أيام مش قادر حتي تبص ع الكلام ..
🔹" الإستمرارية أهم من النتائج " سيبك من الناس الي بتفضل تسألك بقيت ف الجزء الكام و صليت كام ركعة الي بيحولوا العبادات منافسة كمية مش كيفيه المنافسة حلوة اوي بس لما تكون بالتأثير مش بالمحتوي يعني انك تقرأ صفحتين و تحس بسكينة أحسن من انك تقرأ جزئين لمجرد أنك تسبق صاحبك !!
♦️" الله أجمل و أعظم من أن يفرض عبادة لمجرد الطاعة" حط ده قدامك دايما و حب العبادات عشان بتحب ربنا مش عشان تبقي حاسس بس انك عملت الي عليك .. ربنا رب قلوب ألطف بكتير من انه يفرض عليك حاجه شاقة عشان بس يختبر إيمانك لكن عشان يكافئك بسكينه و راحة بال و الله عمرك مهتلاقي زيها في اي فعل تاني جددوا نواياكم ان العبادات دي هتستمر بعد رمضان حتي لو علي حساب أنها هتقل و علي قدر الهمم تأتي العزائم 💙
✳️ " قليل دائم خير من كثير منقطع " ❤️
❇️أتمني يكون البوست عجبكم و جددوا نواياكم تاني و اكتبوا في الكومنتات قررتم تعملوا ايه و ايه العادات الي عايزين تغيروها ⁉️
"واغفر لنا إن عاهدناك ألا نعود وعُدنا، اغفر لنا وردنا إليك ردًا جميلًا..💙 "
#ضموني_بدعوة💚💗
