خطة للعشر الأوائل من ذي الحجة. 💙
حاجه خفيف اقرأه كويس ولو في تفصيلة واحدة فادتك منه عرفها لصحابك 💪💙
1- الصيام
انوي إنك هتصوم كل الأيام بعون الله على قد ما تقدر مش يوم عرفة بس، أهو حتى لو في يوم ولا اتنين ولا تلاتة وقعوا منك تاخد ثواب النية وكإنك قمت بالفعل، ربنا بيقول "كُلُّ عَمَلِ ابْنِ آدَمَ لَهُ إِلَّا الصِّيَامَ فَإِنَّهُ لِي وَأَنَا أَجْزِي بِهِ" معنى الحديث إن كل طاعة بتعملها ليك انت ولنجاتك وأجرها وثوابها معروف لكن الصيام ربنا بياخده منك ويتقبله منك ويجازيك بيه جزاء مش هتعرفه غير يوم القيامة.
2- الإستغفار
استغفر كتير جدًا في الفترة دي 💖
اللي نفسه في حاجة يستغفر عشان دعوة يوم عرفة مجابة بعون الله ودعوة المستغفر تُصيب، استغفر عشان ربنا يفتح عليك في الدعاء.
كلنا عندنا ذنوب ياما، استغفر عشان يوم عرفة يُكفّر سنة عدت من حياتك وسنة جاية.
"الإستغفار مفتاح لكل باب معصلج وكل حلم كبير وكل أمر عظيم، الإستغفار توبة من أي ذنب أذنبته في حق الله مهما بلغ"
3- الدعاء
لو دعائك متحققش في ليلة القدر، لعل الله جاعلك من اللي هيفرحوا في يوم عرفة 💖:'))
ادعي كتير باللي نفسك فيه طول الفترة دي، ادعي وانت واثق إن مهما كانت دعوتك كبيرة فهي كبيرة عليك لكن مش على الله، قريب مجيب لأي دعوة ومن أي عبد.
وخليك فاكر إن دعوة الصائم حتى يفطر لا تُرَد:))
4- الصدقة
لو عايز رزق أيًا كان نوعه، طلع صدقات، اعمل حسابك في مبلغ طول الفترة دي تطلعوا في جهات مختلفة وعلى قد ما تقدر، مش محتاج مبلغ كبير يعني.
لما تطلع صدقة حط إنها بنية كذا بينك وبين ربنا، متطلبش من اللي هتطلعله صدقتك إنه يدعيلك حاجة معينة،
هو دعا يبقى زي الفل ولو مدعاش متقلقش ربك عالم بنيتك وبإحتياجك وهيكرمك آخر كرم، بلاش تحسسه إنك بتكسر عينه.
الصدقة تطلع لأي حد محتاج ولا يقدر، إما إنه لا يقدر تمامًا يعني لا يملك أو إنه يملك لكنه لا يكفي زي عمال النظافة مثلًا، وتطلع برضو لأي عمل خيري زي الرسايل اللي ب5 جنيه للمؤسسات الخيرية أو إنك تجيب مثلًا حاجة حلوة لأولاد تقريبًا ميعرفوش طعمها أصلًا:)) !
5- القرآن
لو انت تقدر تختم القرآن في الفترة دي يبقى كويس جدًا، ولو انت ماشي في ختمة فكملها في الفترة دي، ولو مش مُلزم بختمة فممكن جدًا كل يوم تقرأ سورة أو سورتين من اللي بيريحوك أو مقربين ليك زي مثلًا البقرة يس يوسُف مريم القصص وهكذاا، حتى لا تكون من الهاجرين 💚
6- الذِكر
لو انت مش ملتزم بأذكار الصباح والمساء ف دي فرصتك أهو عشان تبدأ تلتزم بيها، بالمناسبة هحكيلكوا حاجة كده، من فترة كنت بكسل أقول الأذكار جدًا فقولت انزل الأبليكشن عشان اتشجع وكنت لو قرأتها مرة انسى مرتين تلاتة، لغاية ما عرفت عظمتها والحمدلله ربنا أكرمني وحفظتها فبقيت أقولها غيابيًا، من عظمتها دي بقى إنها بتحفظك من حاجات لو عرفت إنها كانت هتحصل كنت تتخض وربي ! وأي حاجة انت خايف منها هي بتبعدها وربنا بيحميك بيها ويصرف عنك شر ما قضى ويلطف بيك بفضلها، زائد إنك بتكون من الذاكرين ودي مرتبة رهيبة هتعرف قيمتها دنيا وآخرة.
"ابن القيم يقول: مدمن الذكر يدخل الجنة وهو يضحك"
نوّع بين الأذكار..
عندك أذكار الصباح والمساء كده معاك يوميًا مبتاخدش منك ربع ساعة، نوّع بقى بين التسبيح -سبحان الله- والتحميد -الحمدلله- والتهليل -لا إله إلا الله- والتكبير -الله أكبر- ودي سنة عن سيدنا النبي في الفترة دي 💙
الصلاة على سيدنا النبي زيها زي الإستغفار وشيوخنا علمونا إن جايز دعائك ناقصه الصلاة على سيدنا النبي عشان تشوفه قدام عينك زائد إنها أعظم وسيلة لراحة البال وتفريج الهموم.
لا إله إلا أنت سبحانك إني كنت من الظالمين، سيدنا النبي قال عنها "ما دعا بها رجل مسلم قط إلا استجاب الله له".
لا حول ولا قوة إلا بالله.. بتحقق معجزات
7- الصلاة
المفروض النقطة دي تكون رقم 1 أصلاً :'))
لو انت مش ملتزم بالصلاة فمبدئيًا في برنامج من كذا سنة كان اسمه أحبك ربي، في حلقتين عن الصلاة لازم تشوفهم
مفيش تهاون في الفروض ومفيش حاجة تعلى لمرتبة الفروض.. فالفرض لازم يكون فرض، مفيش حاجة اسمها اصلي سنن بدل الفروض اللي فاتتني.
بجانب الفروض حاول تبدأ تصل قيام الليل وهم ركعتين خفاف جدًا وأجرهم لا يحصى.
كان في أيام الصحابة قاطع طريق.. يقطع الطرق الصبح ويسرق من الناس، وييجي بليل يصلي قيام ليل.. الصحابة راحت لسيدنا النبي تشتكيله منه، قالهم "صلاته ستنهاه" ثم أصبح الراجل ده من أهم رجال الصحابة بعد كده "الفضيل بن عياض" 💚
اعرف قصص كتير جدًا عن دعوات اتحققت بسبب قيام الليل، منهم دعوات ليا أنا شخصيًا.
- صلاة قيام الليل ركعتين -وده أدنى عدد- ثم تختم بركعة وتر وتقرأ في الركعة الوتر سورة الإخلاص.. وقتها من بعد صلاة العشاء لغاية قبل الفجر، وأفضل وقت ليها بعد الساعة 12 بليل -الثلث الأخير من الليل- عشان ربنا بيتنزل لينا ويقول هل من سائل فأعطيه؟ هل من مستغفر فأغفر له؟
ولو انت خلاص مش قادر تصلي أي ركعات قيام فيا سيدي لو أوترت -صليت ركعة وتر- بعد العشاء لغاية قبل الفجر فدي برضو تعتبر قيام ليل وسيدنا النبي قال عنها "إن الله وتر يحب الوتر" أي الله واحد يحب الركعة الفردية الواحدة 💙
صلاة الضحى ركعتين وقتها بيبدأ في النتيجة تحت مسمى "الشروق" أول ما شعاع الشمس يظهر وبتفضل لغاية قبل الضهر بحوالي تلت ساعة، حاول تلتزم بيها 🌸
8- صلة الرحم
اسأل عن قرايبك، اسأل عن صحابك، عيّد عالناس لآجل ما ربنا يفرح قلبك 💚
سيدنا النبي يقول "من أحب الأعمال إلى الله سرور تدخله على مسلم".
دول بإذن الله أهم النقاط يعني وكل سنة وانتم طيبين:))💙
#شخابيط_منتقبة💜
#اترك_أثر💚
