#سر_نوفمبر
الحلـقة2
الكاتبة : Mariam Ali
وصلت لعمارتهم واخيراً وحست نوعاً ما بالأمان لما لقت صغار جيرانهم يلعبو ومعاهم جارهم رمضان الشايب مقعمز ويسبح بسبحته
ومجرد ما ركبت الدرجات حست بيه وراها قاعد
فتلفتت وقالت : شن تبي من بكري تلحق فيا !؟
وقفو الصغار علي اللعب وتلفت العم رمضان وشافلهم بإستغراب
فعقد مراد حواجبه وقال : شن تخرطي ؟
رهف بإنفعال : تسحابني غبية عارفاتك من بكري تلاحق فيا وكانك ما قلبتش وجهك توا والله لما نفضح بيك البلاد كلها
مراد زاد عقد حواجبه وقال بإنزعاج : مريضة وخيتي انتِ ؟ نسكن هني اني !
رفعت رهف حواجبها وقالت : بالله ؟ شني كنت شفاف امالا ؟ اني نسكن هني وعمري ماريتك !
مراد بنفاذ صبر : محول جديد ونسكنو في الشقة يلي في الدور التاني وتوا حولي من طريقي لأن عندي سطاوية يركبو في الاثاث ويراجو فيا نجيبلهم ماياكلو
نصدمت رهف وحست بالإحراج وبان في وجهها فتنحت شوية حتى يخش وهو يتمتم : ناس مريضة تاعبة
ركبت رهف بعده وشعور الخجل والاحراج قاعد ملازمها ، خشت للشقة وسكرت الباب وهي تمسح في وجهها يلي قاعد راكباته حرارة من الموقف التافه
خشت فلقت امها مقعمزة وعاقدة حواجبها وهي تشبح لشاشة الهاتف المتواضع
حطت الاكياس ع المدخل وقالت : السلام
امها قامت عيونها وابتسمت براحة لما شافتها وقالت : جيتي ؟
قعمز جنب امها وقالت بأسلوب رسمي : ايه
امها : ليا ساعة ندور في التليفون علي اسمك مافرزتاش
عقدت رهف حواجبها وقالت : علاش ؟
امها : عيوني ضببو !
ساوت رهف تقعميزتها بحيث انها تلفتت لـ امها وقالت بإهتمام : تشبحي فيا ؟
امها : ايه نشبح فيك
رهف : بجديات ؟
امها : ايه مش مكحلة عيونك
وحطت يديها علي كتف بنتها وقال : لابسة بلوزتك البيضة
وركبت يديها لوجهها وقالت : ووجهك اصفر وتعبان
نزلت رهف يدين امها من عليها وقالت : لازم نشوفو دكتور ! من الاول من لما بديتي تشبحي في ومضات الضي
امها : ياودي مافيا شي تو ناخد قطرة من الصيدلية
رهـف تنهدت ووقفت وقالت : زيدي سكري راسك لن تترزي فيهم
امها ضربتها علي ظهر ايدها وقالت : تحركي من مكانك
رهف : حتى اني متحركة !
وخشت لدارها وانحذفت ع السرير بتعب وهي قاعدة تفكر في الموقف يلي صارلها
حطت يديها علي وجهها وهي تلعن في طبع التسرّع يلي عندها
خشت عليها لجين بماسك القهوة في وجهها وقالت : خيرك ؟
رهف قعمزت : لا شي
لجين قعمزت ع سريرها وقالت : جوك طالع كيف
رهف بعد تردد قالت : صارلي موقف بكري
لجين ربعت رجليها وجبدت المبرد من قجرها وبدت تبرد في ظوافرها وقالت : شن هو ؟
رهف : واني طالعة من المحل طلع وراي واحد
لجين وهي تبرد ومركزة في ظوافرها : بااه ؟
رهف : وقعد يمشي وراي ويلحق فيا لن وصلت للعمارة
لجين شافتلها بإستغراب : شن قعد يقولك ؟
رهف بإنزعاج : وهدا يلي يخوّف ، انه ماقالي شي قعد ساكت
لجين : باه كملي
رهف : المهم اني خفت نخش للعمارة وهو وراي ويضربني ولا يخدرني ويرفعني مشي تلفتت وقتله خيرك تلحق فيا شن تبي
لجين بفضول : احسن ما درتيله ، وشن قالك هو ؟
رهف : اسوء ما درتله ، طلع جارنا الجديد
لجين انفجرت بالضحك علي رهف يلي احمر وجهها وهي تحكي في الموقف
فشافتلها رهف بإنزعاج وقالت : مافيش حاجة اضحك معاش تعصري روحك بالسيف
قدرت لجين تسيطر علي ضحكتها وقالت : غر قوليلي شن شعورك وقتها ؟
رهف : تمنيت الارض نشقت وبلعتني
لجين تنهدت بعد ما كملت ضحكتها وقالت : وكيف شكله ؟
رهف بإستغراب : شن كيف شكله ؟
لجين : قصدي حلو ؟ عضلات ؟ طويل قصير نازك ولالا
رهف : شن بديريلنا عرس ؟
لجين : كان طلع عريس لقطة علاش لا
رهف : قاعدة صغيرة ع الدوة هادي ره اقري قرايتك سلّم بنتي وبعدين ساهل
لجين : غر جاوبيني
رهف : عادي شكله عادي زي النّاس
لجين : ماهو الناس اجناس شي ذهب وشي نحاس
رهف : تشوفي فيا جهاز كشف المعادن ؟
لجين : باردة نمشي نغسل وجهي خيرلي
أنت تقرأ
#سر_نوفمبر بقلم الكاتبةMariam Ali
Lãng mạnكاتبة روايات#كروموسوم #بحر النسيان #معشوقتي #نقطة ضعف
